Tala I Vaifanua

FETUFA'I ATUMOTU PASEFIKA SUIGA TETELE & SUIGA FA'ATA'ALISE O LE TAU

O le fonotaga ua tu'ufa'atasia e le Matagaluega o le Puipuiga o le Gataifale ma le Vaomatua (DMWR) fa'atasi ai ma le ASCC Land Grant ma le Secretariat Pacific Regional Environment Program (SPREP) na amatalia mo le tolu aso o lenei vaiaso i le Malaeimi LDS Hall i le taeao ananafi.

O le SPREP e to'a 26 atunu'u tuto'atasi pe o teritori fo'i o lo'o aotelega ai o latou totino ona o lo'o aofia i le vasa pito i tele i le lalolagi, le Alamoana o le Pasefika.

O le lauga fa'apitoa mo lea fa'atasiga tele ina ia soalaupule sui o atunu'u ta'itasi na malaga mai, o i latou fo'i o aofia fa'atasi i le SPREP, ma o tatou sui iloga, ae maise o le fanau talavou mai a'oga ta'itasi i totonu o le tatou Malo sa vala'aulia fa'apitoa e fa'afofogaina lea folasaga taua, ina ia mautinoa e i latou uma fa'atasi ma e ua tino matutua o le atunu'u, "O lo ua tele'ai suiga tetele o le tau i le lalolagi atoa, ma ua tele taimi e fesuia'ia ai, ona iloa lea, ua le toe faigofie le aga'i atu i le lumana'i o le tatou soifua i le tatou paneta atoa."

I le saunoga a le susuga le Fa'atonu o le SPREP, Kosi Latu mai Samoa, sa ia fa'ailoa ai, "Ona o fa'amaumauga ma suesuega mae'ae'a a vasega o saeanisi fa'apitoa i tulaga o le tau ma ona suiga tetele ma le fa'ata'alise ua i ai nei, ua tatou maua mai ai lenei tima'iga, ae maise ia i tatou uma o lo'o talavou, o le taimi nei ma le lumana'i, e le o toe faigofie lava, i suiga o le tau. O lona uiga, afai o faigata ia te oe le suiga ua tatou fa'alogoina i o tatou tino i le taimi nei, ia silafia e le mamalu lautele, e le toe fo'i i se lelei, e fa'atuputeleina le fita o suiga o aga'i atu i ai."

"O le ala lenei o le faiga o fa'apotopotoga fa'apenei, ina ia tima'ia le mamalu o malo fa'aatumotu laiti o le Pasefika, aua e ui ina laiti o tatou atumotu, ae ia silafia lelei, o i taotu e tele ai lava lo tatou alamoana i le lalolagi atoa.”

"O galuega fai a le SPREP, ia mataituina a'afiaga o atumotu ona o suiga o le tau i le lalolagi ma i nei fa'amaumauga o suesuega ua mae'a faia mai e tatou saeanisi suesue, ua mautu ai le mau, ua ogaoga a'afiaga o atumotu i suiga matuia o le tau ua i ai nei."

"Ua a'afia le saogalemu o a tatou mata'ai, ma ua fa'apea fo'i ona a'afia le sapalai o le suavai manino mo le taumafa. E fa atumotu sili ona maualalo ua lisia i le tatou vasa pasefika i le lalolagi, Tokelau, Vanuatu, Kiribas ma se tasi o motu i le CNMI. E le faigofie fo'i ona toe gafatia vave e nei motu ona fa'aatoatoa lona sosia masani pe a mae'a atu taimi faigata i suiga o le tau.”

"Ia manatua, o suiga matuia o le tau, ua fa'ata'alise toe fa'ateleina, o lona uiga ua pupu'u vaiva'a o le folauga a lo tatou ola ai i o tatou atumotu i sosia ua i ai, aua afai ae toe fa'aopoopo atu i ai ma le lutia o i tatou i puapuaga fa'anatura o afa, mafuie, galulolo tetele, galuafi pe afai o maugamu e afua ai, ona atili lea ona toso i tua le malosi o le atumotu e toe faaleleia ai le aluga o lona soifuaga masani, a ona tagata, la'au ma manu ma isi uma meaola o lo'o soifua feso'ota'i ai."

"O le tele o suiga nei ua a'afia ai le lalolagi, e mafua uma lava i mea ua faia e le tagata soifua i lona siomaga.”

Ua fa'atulaga mai fo'i le vaitausaga ma le maualuga o le a si'isi'i atu i ai le maualuga o le suavai, ma e tele suiga o le vaaia i lo tatou apitagalu, e aofia ai le afio'aga o Amouli e pei ona fa'alauiloa mai e fa'amaumauga a le DMWR i a latou folasaga.

"E moni o le a fa'ateleina le i'a i o tatou ogasami, aua o le suiga o le tau, e suia ai fo'i ma uiga o manu ma la'au uma, e ao fo'i ina suia ai ma olaga o tagata soifua ma ua a'afia a tatou fofoga taumafa masani."

"I le taimi nei, ua va'aia suiga o mafaufauga o e talavou ma i latou o lo'o matutua ma ua avea ma sui e faia suiga ma fa'aiuga i totonu o faigamalo a le lalolagi.”

"Ua le toe fa'atali le fanau talavou, ua latou faia suiga lelei mo latou malo, ma ua iloga ona tula'i mai i lenei vaitau, ina ia mataituina le tele o suiga ogaoga o le tau ua o'o mai ma e fa'asolo ina a'afia tele ai i tatou uma."

"O Tupulaga talavou, e ao ina amata mea i taumafaiga uma ia mautinoa ua toe taumafai e toe fa'aleleia lo tatou atunu'u, ia malosi e sapaia ona tagata ma meaola uma o lo'o soifua feso'ota'i ai. O tatou malo, e ao ina toe gafatia e ona puna'oa ona fa'aauau le tausiga o i tatou uma o e soifua ai, fa'atasi ai ma manu ma la'au fa'apea fo'i le gataifale ma ona sosia."

MOLI SOLAR - FOA'IA BLUES SKY,  BARRY MARKOWITZ  & PA'AGA:

Ua mae'a foa'i e le susuga Barry Markowitz ma le Aiga i Hawaii ni Moli Solar [malosi'aga o le la e fagaina]  i nofoaga e ao ina maua le malamalama i ni taimi e motusia ai le eletise.

O nofoaga fo'i e tausia lelei ai gasegase ma tagata matutua ina ia le motusia le latou tausiga, pe faigata fo'i ona fa'atino le tausiga ona ua leai se malamalama i taimi o fa'alavelave faafuase'i e motusia ai le eletise mo se taimi umi.

O nei moli, o se mea faigaluega aoga tele mo le vasega o Leoleo i le fa'atinoga o latou tiute, ae maise o le Hope House ma le EMS fa'apea ma le Koluse Mumu o Amerika Samoa, o nofoaga fo'i nei ua mae'a ona taua'aoina i ai moli na malaga mai ma  Markowitz ia Fepuari 01, 2019.

Peita'i i le avanoa o le au fa'asalalau ina ia fa'alauiloa lea foa'i taua, sa mafai ona fa'atasi atu ai le susuga Markowitz mo sana tautalaga, i le fa'aosofia fo'i o lona agaga ina ia maua lea fa'amanuiaga e o tatou tagata, a'o taumafai e toe fa'atautaia latou fe'au ma tiute masani, pe a mae'a ni fa'alavelave faafuase'i fa'anatura e pei o afa, galulolo, mafui'e po'o se mu fo'i o se fale nofo o se aiga.

Ona sa lutia le ali'i tusitala ma pu'eata i le malo tuto'atasi o Samoa i le taimi tonu o le Tsumani i le 2009, sa ia va'aia ai le tagolima ma fememea'i o le to'atele o tagata o le atunu'u ina ua mavae ese atu le pagatia, ae ua matua leai se mea e toe mafai vave ona fa'amalamalama ai latou lotoifale ua toe tau atia'e.

Peita'i o ia lava e nofo mau i Hawaii, e matele fo'i ina mafai ona fa'alauiloa vave ai ituaiga masini fa'aonapo nei e mafai ona fa'aaoga i so'o se ituaiga tau, ma taimi e lutia ai lotoifale o aiga ona o pagatia fa'anatura. Lea ua ia agava'a ai e va'ai ma matau le tele o na ituaiga o tekonolosi aoga mo i tatou i taimi o toe tau fatufatu o tatou aiga ina ua mavae atu ni fa'aletonu.

"O lea lagona e matua tele atu nai lo lo'u va'ai ane lava o a'u ia i lo'u aiga, ua naunau ia fa'alauiloa atu le aoga o lea fo'i ituaiga o moli, ae maise i taimi fa'apenei, semanu e le'i o'o mai ni pagatia fa'apea, ae o lo'o ua mautu i lou iloa, e i ai nei ituaiga o moli o maua fo'i i le tasi lava o le faleoloa iinei,” o lana tala ata lea ma fa'ailoa mai, o lea ituaiga moli e lua, o le isi e la'ititi, ae tele le tasi.

E tutusa lelei lava, ae pau o le mea, o le moli lapo'a e i ai ma le faga ma'a e mafai ona fa'aaoga le panele o le moli, ae soso'o atu i se telefoni po'o se laptop e fa'aaoga mo feso'ota'iga aga'i fafo a lou aiga.

Ina ua mautu o lana tapenaga mo le taumafaiga e fa'ao'o mai nei Moli aoga tele mo i tatou iinei, ae paga lea sa ia mana'omia tele le fesoasoani, o le ala lea sa ia fa'afeso'ota'ia ai le Bluesky Communications ma le Hawaiian Air ae maise le Sadies by The Sea ma le susuga Tom Drabble, le VCX Technologies a le susuga  Howard Helg ina ia mafai ona fa'ao'o mai le 100 o nei moli solar mo aiga ma tagata galulue fo'i.

O le umi e mumu ai lea moli e aunoa ma le toe fafagaina o le ma'a e 50 itula, ae na'o le pau a lau mea e fai i le moli, pe a susulu mai le la, o le fa'ata'atia lelei e fa'au i luga lona panele e mitiia ai le malosi'aga o le la ma toe aoga fo'i lea mo le isi 50 itula e ola ai.

O Markowitz e fa'akonekarate e le Samoa News ina ia tusia ma pu'ea mai ata o mea e tutupu i Hawaii ma isi setete , ae maise fo'i o taimi o ta'aloga fa'avaomalo.

Ua fa'aipoipo o ia i le tama'ita'i Samoa, Tafaoga Tuioti Markowitz ma ua i ai fo'i si a la fanau teine o Catalina Rose Salafai & Winnie Ipolani, ma le atali'i e to'atasi o Abraham.

E ese mai lea meaalofa i le Komesina o Leoleo, Hope House, Koluse Mumu ma le EMS,  ae ua ia taua'aoina fo'i le masini e mafai ona a'oa'o lelei ai le fa'atonutonuga o le fa'aaogaina o le ituaiga mea pu'eata o le “drone”. O lea meaalofa o le a taua'aoina sa'o  lava fo'i i le vaega o DPS. O lena foa'i o lo'o faia sa'o mai lava i le au aiga Tuioti Mariner - Markowitz.