Tala I Vaifanua

PISINISI LE FA'AFOUA LAISENE 2019 - TATAU ONA TAPUNIA LATOU TAUTUA:

Ua fa'alauiloa mai e le Matagaluega o Fefa'ataua'iga a le tatou malo, e tatau ona fa'autagia mai e le mamalu o le au faipisinisi, e tatau ona o'o atu ia Ianuari 31, 2019 ua mae'a lelei ona fa'afou laisene o lau pisinisi, a leai ua tatau loa ona tapunia se'ia mae'a fa'afou a latou laisene.

Pe afai o le a toe fa'afou atu au laisene o pisinisi ae ua pasi lea aso fa'atulagaina, ua i ai totogi e fa'aopoopo e ao ona totogia ai  fa'atasi ma le fa'afouga o lau laisene.

Ua faapena fo'i ona fesiligia lau pisinisi pe mata o agava'a e toe fa'afou lau laisene.

O pili uma o fa'afouga o laisene e ao ina totogi i le Matagaluega o Tupe a le tatou malo, lea e fa'atautaia e le Revenue Branch.

Ua fa'ailoa mai fo'i o le a fa'atautaia suesuega a le Matagaluega o Fefa'ataua'iga i nofoaga o lo'o fa'atautaia ai pisinisi uma, e le fa'ailoa atu muamua a latou asiasiga, o le a faia lava i so'o se taimi.

Ua fa'atonuina fo'i pisinisi ina ia fa'apipi'ia laisene pisinisi o lenei tausaga i luga i mea e iloa lelei atu ai e le mamalu lautele ma i latou o le a asiasia lau pisinisi i lenei vaitau.

Afai e le'i taua'aoina atu lava sau laisene pisinisi i lenei taimi e le Ofisa o le Revenue Office, ua tatau ona e toe asia lea itu o le tautua ma le lisiti ua mae'a totogia o lau peimeni mo le laisene.

FOLASAGA ALA E FA'ALELEIA ATILI AI TAUTUA MO TURISI

O le afiafi o le aso Lulu na fa’alogologo ai le Komiti Komiti Fa'afoe o Turisi a le malo ma nisi o le atunu’u i le folasaga a le tama'ita'i o Carmel Beattie, o se tasi e faia feso'ota'iga tau Turisi mai le Malo o le Atu Kuki. O lana folasaga lea sa fa'ailoa ai lana ripoti fa'amaumau o le tulaga ua i ai le tautuaina o Turisi i lenei vaitau, ala e fa'aleleia atili ai lea tautua, faatasi ai ma fuafuaga fa'ataoto mo le aga'i atu i le lumana'i.

Ua fa’ailoa mai e le Komiti Fa'afoe lea ua ta'ua ai, "O le manuia ma aga'i i luma o le Tautua mo Turisi i Amerika Samoa e fa'alagolago lea i le galulue so'ofa'atasi o le Malo ma le mamalu lautele o le atunu'u i so'o se fuafuaga e fia fa'atino.

O Beattie ua iloga lona tomai fa'apitoa i feso'ota'iga ma le atina'ega o le Turisi i totonu o lona atunu'u, Niu Sila, Ausetalia ma atu motu uma lava o le Pasefika, ma e mafai ona ia feso'ota'ia fo'i le tatou atunu'u i nisi o malaga ta'amilo e aofia ai ma malaga asiasi i Kuinisela ni ma New South Wales i Ausetalia faapea fo'i le laumua o Sydney i le Opera House o i ai.

I ni nai tausaga ua tuana'i sa galulue fa'atasi ai o ia ma le Ofisa o Turisi a le Malo o Atu Kuki ina ia fa'aea fo'i i luga le latou tautua mo Turisi, ma sa fa'ailoa mai, o lana fo'i lea faiga na matua manuia ai fo'i lea Malo, ona ua ia so'ofa'atasi agaga o tagata lautele ma le faigamalo ia galulue fa'atasi i laufanua ma le si'omaga ae maise le gataifale e fa'amatagofie atoatoa, e mafai ai ona fia malaga maimoa mai tagata asiasi po'o turisi i le latou malo.

"JAI OPETAIA" TAMA FUSU SAMOA - AUSETALIA FEILOA'I MA LE PALEMIA

I lipoti mai Samoa, o lo’o fa’ailoa ai le ali’i fusu i faipelega Jai Opetaia ua feiloa'i ma le Palemia, Tuilaepa Sailele Malielegaoi. Ma ua fa'amanuia atu fo'i Tuilaepa ia te ia, ma lona taumafai i lana fa'agatama, aua o lea ua sauni le tama e ulufale atu i le ta'amilosaga i Belgium.

O lo'o ua asiasi Opetaia i si ona aiga, ma amata atu ai fo'i ana koleniga fa'aitoa aua o lo'o fusu nei o ia mo Ausetalia.

O Opetaia sa soifua a'e i Sydney Ausetalia i ona matua o tagatanu'u moni o Samoa. I lona soifua tauva ai i le fa'agatama o le faipele ua ia ausia ai le 16 o ana fusuaga leai se faia'ina. 13 fusuaga ua malo ai i le KO pe TKO a'o le isi tolu o ana fusuaga e malo ai i 'ai.

O lana fusuaga na fa'ato'a uma atu na fetaui ai ma se tasi o ali'i e lelei fo'i lana fusu Kurtis Pegoraro ma sa faia le fusuaga lea i Brisbane, ia Iuni 2018.

O lana fusuaga o lo'o loma nei ma o lo'o taumafai ina ia manuia fo'i e fetaui ai o ia ma Bilal Laggoune ia Mati 22, 2019 i Belgium. O lo'o fusu o ia i le paga Cruiser Weight. O le fusuaga lea ua fa'atulaga e fusu ai fo'i i le fusi o lo'o ia umia o le International Boxing Federation Inter-Continental Cruiser Weight Title.

Opetaia, 23 tausaga o le soifua, o se tasi o tama fusu o lo'o aofia i le lisi o tama fusu Olimipeka a Ausetalia. Sa ia mua'i umia le Pine Auro mai le 2011 World Junior Championships. Peita'i sa ia tauva mo Ausetalia i le Olimipeka o le 2014 i Lonetona, Peretania ma fa'ato'a pa'u lava i le ali'i fusu mai Azerbajan.

I le taimi nei, ua tulaga 13 nei o ia i le fa'asologa o tama fusu fa'apolofesa i le Cruiser Weight i le lalolagi ae o le sui lea o le a la'ua fetaui e tulaga fitu o ia i le lalolagi i le la'ua vaega o fusu ai.

O lo ua fa'amanuia atu fo'i le Palemia ia te ia, aua e ui lava ina fusu o ia mo le malo na fanau a'e ai, ae o le toto o le Samoa o lo'o ola ai lona tino.