Tala I Vaifanua

TAULA MAI LE USCG SEQUOIA

O ua va'aia se tasi o va'a o le US Coast Guard ua taula mai i lo tatou Uafu i Fagatogo, ma ua fesiligia fo'i lona tuta mai aua o lo'o ua matauina, o se tasi lea o matagaluega o le Malo tele o lo'o a'afia fo'i a latou tautua i le taofiga o galuega a le Malo tele.

Na taula i le aso Tofi ma ua fa'ailoa mai, ona o lo'o i ai ni galuega toe fa'aleleia o meafaigaluega i luga o lea va'a e puipuia le gataifale ma tuaoi uma o le gataifale o Amerika i le Pasefika.

Ua faailoa e Lt Commander William Adams, "O galuega toe fa'aleleia e aofia ai le tele o Pole ma masini e fa'ailo i Amerika Samoa nei lea e aofia ai Lauli'i Breakers Point ma Aunu'u ae maise Ofu ma Tau i Manu'a."

O lea va'a suesue a le USCoast Guard o le Sequoia, e masani ona fa'ailo o le Penina Uliuli o le vasa Pasefika, e fa'atumau ana galuega i le teritori o Guam, ma e to'afitu Ofisa o le Coast Guard o i ai i luga ma le 42 o le 'au va'a masani e malaga ai.

E toe tu'ua e le va'a lea i tatou ia Ianuari 23 ma ua fa'ailoa mai e le ali'i Kapeteni Adams, o lo ua fiafia i latou ua maua nai o latou aso malolo iinei.

Ua fa'ailoa e le ali'i Kapeteni e matagofie fo'i laufanua o Amerika Samoa, e mama lava lona sami ma le lanu lauava o ona laufanua ua va'aia. Ona o lana auva'a fo'i e fou mai i o tatou laufanua nei, ua fiafia o lo ua maua sina taimi e tafafao ai ma maimoa i le matagofie o le tatou fo'i teritori ae maise o le aganu'u sili ona talimalo lelei.

Na mua'i fa'ato'ai mai fo'i le Sequoia iinei muamua, peita'i o le to'atele o le auva'a e fou ma ua fai fo'i sina leva e le'i toe malaga mai lea va'a i o tatou nei tuaoi. Peita'i o nisi tuai o le auva'a ua latou matauina nisi o tatou fale'aiga lelei e mafai ona latou asiasi i ai, ae maise fo'i o faleoloa taugofie o le motu ma ituaiga o ala e feoa'i ai.

Afai fo'i e feiloa'i ane i nai nei ali'i folau i so'o se nofoaga faitele, ia fa'aalia lo tatou aganu'u o le fa'amasani gofie ma le laumata fiafia, ae silisili le alofa ia tausia lelei nai ali'i o le malo.

MAUA I LUGA O LE VA'A FAGOTA SE PUSA TUPE

O suesuega masani a le Ofisa o Tiute a le tatou malo i luga o le Uafu i Fagatogo na maua atu ai se pusa tupe i luga o le va'a fagota ua fo'i mai Apia, ma ua afua ai ona faia se suesuega tele i lea tulaga, atoa ai mani fa'atauga e faia nei tupe, po'o a fo'i oloa o le fa'atauga.

Ua le faia na'o le tatou malo lea suesuega, ae ua faia fa'atasi e malo na lua, Samoa ma le tatou nei malo, i le Ofisa o Tiute fa'apea fo'i ma le Ofisa o Leoleo.

O le va'a fagota "Lady Ann" o le va'a o le Kamupani a se alii Korea, na talosaga e fia alu i Apia e piki mai sana Inisinia. Peita'i na fesiligia fo'i, le afuaga o le talosaga lea a le Ali'i Korea e malaga lona va'a i Samoa ma fa'aalu ai se kesi e tusa ma le $2,000 e fa'aalu ai, ae pau lava lana mea e fai o le fa'aoso mai o lea tagata i le va'alele mo le $150 pe afai ua vave mana'omia, po'o le sau fo'i i le Lady Naomi na'o le $80.lona pasese?

Lea la, ona nei fa'afesili, ua fa'aosofia ai lagona, aisea ua faia ai lea mea? Ma ina ua toe taliu mai le va'a fagota lea, na o atu loa le vaega a le Customs ma fa'atino le latou suesuega, ae o le tali la lea ua maua mai ai.

Na fa'ailoa mai i ni tala a nisi sa i ai, na maua atu se tama'i atigipusa e pei lava o se atopa'u, ua matua tumu lava i tupe, o pepa tetele fo'i e le o ni ta'i $$.

Ua le fesiligia, o le ali'i kapeteni o le va'a fa'apea ma le ali'i e ona le va'a lenei, ua fa'afesiligia e leoleo i le taimi nei.

Ua taofia nei lea pusa tupe e le matagaluega o Leoleo mo a latou suesuega i fa'atauga, ma oloa o le fa'atauga ua afua ai ona tele lea vaega tupe ua maua i luga o lea va'a fagota.

TOE AMATALIA FAIGAMALAGA A LE "MV MANU'ATELE" VAIASO FOU

Ua fa'ailoa mai ua i ai nei se ali'i Inisinia o le a malaga lava i so'o se malaga a le MV Manu'atele, ma o le a amatalia fo'i ana faigamalaga i le va o Pago Pago ma le Manu'atele i le vaiaso lenei.

E tusa ma le lua masina o motusia pea faigamalaga a lea Sa o le atunu'u ona o le taofiga a le US Coast Guard e ao lava ina i ai se Inisinia sinia i luga o le va'a i so'o sana malaga e faia i le va lea.

O le ali'i Inisinia sa faia lea tiute, ua le toe mana'o e fa'afou lana Konekarate, ona ua mana'o o le a malaga e nofo mau i Amerika.

O le susuga le Sui Fa'atonu o le Uafu ma Taulaga & Malae Va'alele a le tatou malo Christopher King sa ia fa'ailoa mai o lenei ali'i Inisinia fou na talosaga mai Mississippi ma na to'ai taunu'u mai i le vaiaso ua te'a ma ua fa'afaigaluega lava i sana Konekarate i le taimi nei.

O lana konekarate fo'i ua saunia nei, e filifili ai o ia pe ua ia mana'o pea i le galuega lea ma alaala iinei pe leai.

O lo'o fa'atautaia lava malaga a le "MV Sili" i le Manu'atele talu mai lava le taimi atoa na le malaga ai le "MV Manu'atele," ae o lea la ua fa'atulaga malaga mo le MVManu'atele, o se fa'amama avega fo'i lea i le "MV Sili" ae ua lualuagia ai le tautuaina o le Manu'atele i uta ma pasese.