Tala I Vaifanua

FA'ATAUTO AUMUA AMATA - FA'AAUAU TAUTUA MO AMERIKA SAMOA

Ia Ianuari 3, 2019 na tula'i ai Aumua Amata, le sui o Amerika Samoa i le Konekeresi, i le sauniga e fa'atauto Faipule o le Maota o Sui a le Konekeresi a Amerika, i le tauaofiaga lona 116, i i le Laumua i Washington DC.

Sa ia saunoa, "Ou te fiafia e avea lo'u nei sui fa'atauva'a ma auauna e tautuaina lo'u malo pele o Amerika Samoa. O le lona tolu ai lenei o nofoa'iga talu ona tulai mai, ma ua fa'atolu fo'i lea ona ou mataituina le amataga o nofoa'iga fou a le Konekeresi, ma ua ese fo'i lagona faia'e i lenei tausaga, ona ua i ai se tala'aga fou ua fa'amauina fa'atasi ai.”

I lona fa'atautoga sa avatua le Tusi Pa'ia e fa'atauto ai. Na tula'i le ali'i Faife'au Apisaloma Toleafoa o le First Samoan Congregational Christian Church i Alexandria e taofi le Tusi Pa'ia, tu'u atu i luga le isi a'ao o le Faipule, ae fa'asolo lana tautoga.

“I so'o se amataga lava o le Tauaofiaga ta'itasi a le Konekeresi, ua iloga o se amataga fou. E i ai ona lu'iga i le tele o mataupu e iloiloina ma taumafai fo'i e fa'apasia, ma e fa'afaigata fo'i ona o le Konekeresi e lua ona itu o ana faigaupufai, peita'i o galuega ua mae'a a'oa'oina ina ia agava'a e milo ma tau ai. Ua ou iloa fanoga o lo'u atunu'u, e ao ina ou fa'ailoa ma tau ai i le va lea ina ia maua mea o lo'o mana'omia e o'u tagatanu'u, ua tutusa lava ma isi fo'i setete ma teritori o le Iunaite Setete o Amerika atoa,” o le saunoaga lea a Aumua.

O le mataupu ua lalamua i le lisi a le tatou faipule, o le taumafaiga lea ia tamau ma fa'alautele atili le sapaia a le Feterale i tausiga o le Soifua Maloloina o le atunu'u; mataupu mo Vetereni ma latou alamanuia; le talafatai o Amerika Samoa ma latou fa'asao i le gataifale ma le vaomatua; tulaga o A'oga mo fanau talavou; ala o fesoasoani tau tupe mo teritori tau atina'e o le Malo Tele; ma ia puipuia lava le tausiga lelei ma le tamaoaiga mo fitafita tiute ma o latou aiga a'o tautua i Vaega Au.

O le tulaga fo'i tau le Siomaga o le atunu'u ma fa'alavelave e ono tutupu fa'afuase'ia e afaina ai le soifua o tagata uma i Amerika Samoa.

Fa'ailoa fo'i e Aumua, "Amerika Samoa, e mana'omia e la outou auauna a outou tatalo, e leai se mea e faigata i le Atua, a'o le malosi ma le mafaufau tonu o ana fo'i e foa'i i le tagata e taumafai mo se lelei o tagata e to'atele. Ia manuia le tausaga fou lenei ua tatou aulia ma le manuia ma ia fa'aauau pea ona fa'afofogaina e le Atua a tatou tatalo."

A'E A'OGA - TUFATUFA PEPA FA'ATAGA MATUA MO TUI PUIPUIA FANAU.

I le a'e a'oga i le aso, Aso Gafua Ianuari 07, 2019, ia nofouta matua i pepa fa'atumu e fa'ataga ai fanau talavou ona faia o latou tui puipuia o le ma'i Meningococcal. O lea fa'atagaga a matua mana'omia ina ia faia ai tuiga mo le fanau e amata mai i le 11 tausaga seia o'o i le 18 tausaga le matutua.

Ona o lo'o i ai nisi o fanau sa malaga mai Niu SIla, ae ua togafitia nei i le i le  falema'i LBJ i Faga'alu, ma ua atagia mai ai auga o le ma'i lea, ma e pepesi fo'i lea ua avea ma ala e fa'avave ai le gaoioiga a le Matagaluega o le Soifua Maloloina e puipuia fanau ina ia le a'afia o latou soifua i le ma'i fita.

O aso Tofi ta'itasi o vaiaso uma nei e lua ua te'a, sa faia ai fa'atasiga a le Soifua Maloloina, Foma'i ma le aufaigaluega o lo'o tala fa'auto atu i nofoaga faitele, ina ia mataituina le aotelega o i latou pe ua mae'a ona faia tui puipuia.

O i latou na e fa'auia mai a latou lipoti o fa'amaumauga o a latou galuega ua mae'a faia, pe fia fo'i i latou ua mae'a faia tui puipuia ona o le a malaga ese atu mai Amerika Samoa. O nisi fo'i ua ulufale mai, afai e lei mua'i tuia i latou i le tui puipuia lea o le Meningococcal, e faia lava i le taimi lea ua ulufale mai ai.

O le tui puipuia ua mae'a fa'atulaga nei e faia mo le fanau e 11 tausaga se'ia o'o i le 19 tausaga le matutua. Peita'i o le pepe o lo'o taofia nei mai Niu SIla ma ua avatu fo'i i fafo sailiiliga pe moni o le Meningococcal o lo'o maua ai, e na'o le 2 masina le matua.

Ua talosagaina matua ina ia va'ai toto'a i le saogalemu o lau tama, fa'atasi ai ma le atunu'u atoa lea e mana'omia ona tamau le latou tulaga saogalemu mai lea fa'ama'i fita o le Meningococcal, po'o le Fiva Matuia, Pua'i ma le fa'afaufau, ma e niniva mata ma e tiga le Ulu i le tele o taimi, ma vaivai ai fo'i ma le tino.

A mae'a ona fa'atumu le pepa o le a taua'aoina atu e ala i le fanau a'oga, ona toe fa'afo'i ane lea i le faia'oga mo le silafia e i latou ua mae'a sainia e le matua, ina ia faia loa le tui o lou alo.

SUIGA O LE TAU, SAU FA'ATASI AI MA LE INFLUENZA

I lenei vaitau o le fesuia'iga o le tau, ua iloga le vevela tele o le la, ae le o matua la le tatou atunu'u, ma ua toto fa'afuase'i mai fo'i timuga tetele i le taimi lava e tasi, ua fa'ailoa mai ai e le Matagaluega o le Soifua Maloloina, "O lo ua sau fa'atasi nei suiga o le tau, ma le ma'i o le "Influenza" ma e “ao ina nofouta i ai le to'atele."

O le susuga le fa'atonu o Togafitiga o gasegase i le Falema'i o le LBJ Medical Center, Dr Iotamo Saleapaga, sa ia saunoa, "Ua mae'a sulufa'i mai le to'atele i le falema’i mo togaifitga o latou flu, ma ua lapata'ia tagata uma, nofouta i lea tulaga, aua e le taofia e se tasi suiga o le tau, ae o le tagata lava ia e tausia lelei lona soifua maloloina lelei."

O lona uiga, aua le so'ona fa'asusuina o lavalava ma toe mago ane lava o la'ei. Ia ave'esea ae suia lavalava mago, ma ia va'ai lelei le suavai e fa'apupuna aua ua tetele tafega ma lologa ua tauau ina o'o fo'i i le suavai taumafa nei tulaga.

O le to'atele lava o le fanauiti lea e la'u mai, ae tatau fo'i i matua ona va'ai toto'a i latou aua e matele lava le fanau e fia ta'a'alo i fafo i timuga, ae matuitui lava le malulu lea i ai nei i lo tatou atunu'u.

E ese mai lea, ua so'ona vevela fo'i ma ua le maua se tonu e le mamalu lautele, ona ua le mailoa pe ofu la'ei mafanafana pe la'ei i ofu o le malulu.

Ua faatonuina lava matua e puipuia fanau mai le fa'atimu ma o mai e le suia lavalava. Ia va'ai fo'i le taimi o mugala, ia faia mea uma a le fanau i le paolo, e feololo lea nai lo le faia i le mugala, ma o'o ai ina vevela i le afiafi i latou, ma po'ia ai e le flu.

O leisi fo'i gasegase e fa'autagia lava i taimi o lologa o vai i autafa o maota ma laoa o le atunu'u ma tatafe fo'i vaitafe, o le Leptospirosis, lea e matuaina i otaota o manu ua taetafea mai i lologa ma tafega, ona o atu lea o fanau ta'a'alo ma fa'avai ai, ae ua ulufia ai o latou tino, taliga ma gutu le suavai palapala lea o i ai nei siama uma.

Ia fa'autagia e taofia fanau mai a latou aga na, ae ia mautinoa ua tausia lelei lo latou soifua maloloina ma le maua i nei fa'ama'i tiga.