Tala I Vaifanua

TOE FA'AA'E POLOKALAMA ROTC I LE KOLISI TU'UFA'ATASI

Ua toe fa'aa'e le polokalama fa'apitoa mo le a'oa'oina o metotia ma faiva fa'amiliteri i le Kolisi Tu'ufa'atasi ua fa'aigoaina lea o le ROTC. Manatua o a'oga maualuluga e fa'aigoa ai lea polokalama o le JROTC.

I le Spring 2018 ua iloga mai ai le fa'ato'ateleina o le aofai o le fanau ua mae'a lisia o latou suafa i nei kosi fa'amiliteri, ma ua fa'apena fo'i i le Fall lea na fa'ato'a mae'a atu nei.

Fa'ailoa e Kitzingen Moliga, "O lo ua fa'afiafiaina lava i le va'aia o le suiga i le aotelega o fanau e tauavea nei kosi, aua o le toe fa'atulagaga lea ua i ai nei, e tatau lava ona silia ma le 100 le fanau a'oga e tau'avea le kosi lenei ona fa'ato'a tau'avea lea i se Kolisi."

"E mafai lava ona lisia le suafa o le tamaititi e tau'avea le kosi lea a le ROTC, peita'i afai ae toe tau'avea e ia ma koleniga atoatoa a le ROTC, e mafai ai iina ona maea mai lana taumafaiga i le ROTC ma lana galuega, ae toe fa'au'u ma lona tikeri mai le kolisi i le isi 4 tausaga ma maua lona avea ma ali'i po'o se tama'ita'i Ofisa i le Militeri."

O le aoga i le Kolisi e eseese ai tulaga o fa'ailoga mo fanau e fia ulufale i le Militeri. A fa'aogaina e le fanau le ROTC e amata fa'ama'ai ai ona tauiviga i totonu o le Militeri.

Fa'ailoa fo'i e Moliga nisi o fanau ua fa'ai'u ma le manuia latou a'oga ma ua ulufale atu i le UH Manoa e fa'aauau ai a'oa'oga. O i latou sa tau'avea lelei le ROTC lea ua fa'asolo atu aga'i i luga latou a'oa'oga i fa'ailoga maualuluga, e toe taliu mai ua suia fo'i fa'ailoga ma tulaga e tautua ai i le Militeri. O i latou nei e aofia ai Cadet Sunia, Cadet Acosta ma Cadet Kwon, ua fa'aaogaina latou konekarate ROTC i le Iunivesite o Hawaii Manoa.

“Ua mae'a fa'akonekarateina le Iunivesite o Hawaii ma isi ana a'oga fa'apa'aga e faaaogaina ai le ROTC e totogia ai latou kosi. O le paketi lea e i ai nei mo lea fa'amoemoe i le UH ma ana a'oga fa'apa'aga lea e aofia ai ma le ASCC e $1.2miliona mo sikolasipi lava latou, ma e le'i taitai lava ona mae'a lea aotelega o le tupe ia i latou nei ua fa'aaogaina le Polokalama ROTC,” o se tala lea a Moliga.

FOA'I ANZ BANK - SPECIAL EDUCATION I MATAFAO

Ua faia e le faletupe, ANZ Amerika Samoa Bank, se foa'i aoga tele mo le fanau i le polokalama a le Special Education lea e soso'o ma Matafao Elementary i Faga'alu.

O i latou uma lava o lo'o aofia i lenei polokalama i totonu o le teritori, ua taua'aoina i le Ofisa Ulu o le SPEd a outou meaalofa ina ia taua'aoina atu ai ia te outou i so'o se a'oga o lo'o e a'oga i ai.

O le fa'apolokalamaina o lea fa'amoemoe, sa latou mua'i fa'atulaga ai se latou "Toy Drive" ina ia afifi mo le fanau ua soifua ma mana'oga fa'apitoa.

O le tama'ita'i o Tasi Scanlan sa o'o atu mo le fa'amoemoe e taua'aoina le tusa i le 300 o nei meaalofa.

Ua sili ona fa'afetaia e le tama'ita'i ia Scanlan i latou uma na foa'ia meataalo mo le tele o nei afifi ua taua'aoina mo fanau ua i ai mana'omia fa'apitoa i tino po'o le mafaufau.

O le tama'ita'i o Papali'i Fa'anati Te'o sa tula'i mai e avea ma sui o le Pulega a le SPEd e talia le fa'aaloalo ma le foa'i a lea faletupe mo le Polokalama.

Na ia fa'afetaia le foa'i ua to'ia ai o latou ulu i lenei tausaga, ma o se fesoasoani fo'i e fa'afiafia loto i le fanau fa'apitoa, ma o le a malaga fa'apitoa fo'i nisi o le aufaigaluega ina ia molita'i afifi nei a le fanau i o latou aoga po'o aiga pe afai e le o toe a'e a'oga ae ua o'o atu le tufatufaga.

Ma sa fa'ailoa mai, "Tafefe fo'i i se fiafia ma le taumafaiga e taofiofi mai le vaega lea pe a o'o ina maua nei meata'alofa ua foufou e taua'ao atu ia i latou. E moni lava ua o'o mai Sata Claus!"

MAEA FONOTAGA #2 A LE FEMA MA SUI O LE ASG - MAOTA FONO FOU

Ua mae'a le isi fonotaga a sui o le FEMA ma tatou sui na malaga atu i le Ofisa autu o le FEMA Region 9 i Okaland Kalefonia, e fa'atatau i se mea o le a fai i le Falefono fou lea ua taofia lona galueaina.

I sui o Amerika Samoa sa malaga, e aofia ai le fa'atonusili o Galuega Lautele a le Malo, Faleosina Voigt ma loia e to’alua a le Fono Faitulafono - Nathaniel Savali ma Mitzie Jessop Ta'ase.

Ua silia ma le lua masina talu ona taofia le fausaga o le Maota fono fou, ona e tusa ai ma le mau a le FEMA, ua le o gatasi le fa'avae o lea falefono ma aiaiga o fale e fausia i eleele vailaloa ma a'afia tele fo'i i lologa ma tafega.

Na mua'i malaga le isi auusufono a le tatou malo na aofia ai ma le susuga le Lutena Kovana Lemanu Peleti Mauga ma afea fo'i le Ofisa autu o le FEMA Region 9, ma sa latou fa'ailoa mai e mafai ona galulue fa'atasi le FEMA ma Amerika Samoa i se ala e mafai ai ona fa'amae'a lea galuega.

Ua mae'a fa'amanino mai e le FEMA, pe afai e fa'aauau pea ona faia fa'aiuga fa'apenei e le tatou malo i galuega ua mae'a pasia mai e le FEMA e latou te totogia lona fausaga, e tauau e lusi e Amerika Samoa nisi avanoa lelei e fesoasoani mai ai le FEMA pe a toe tutupu ni faalavelave fa'afuase'i ma fa'aleagaina ai nisi fale aoga e ao ina toe fausia ma fa'aleleia. Lona lua e tauau fo'i e le toe maua e Amerika Samoa tupe e toe faaleleia ai fale ma meatotino sa mua'i fausia i tupe a le FEMA ma le CIP funds.

I le malaga muamua na mua'i fa'atutu ai le aumalaga ma fa'atagisia se fesoasoani mai a le Ofisa o le Initeria mo le latou mataupu ma le FEMA, peita'i na toe fa'asino lava i latou e ao ina talanoa sa'o i latou i le Ofisa autu o le FEMA Region 9, e tusa ai o le "Falefono ua taofia lona fausaga."