Tala I Vaifanua

BRIAN CRUZ CONBOY - TAMO'E TRIATHLON FA'ALAUILOA AMERIKA SAMOA

Ina ia fa'amanatuina le aso na maliu ai si ona tama faia'oga, lea na ala ai ona fanau a'e Brian Cruz Conboy i Amerika Samoa, sa lesitala ai le igoa o lenei ali'i Amerika Samoa e tamo'e i le tu'uga e tolu ituaiga tauvaga i le "Arizona Ironman Triathlon” i le setete o Arizona.

E te a'au i le 2.4maila le mamao; 112 maila e vili ai le Uila ma tamo'e i le 26.2 maila e fa'ai'u ai lea tu'uga.

O Conboy na soifua a'e i ona matua o faia'oga papalagi na malaga mai e faia'oga mo Alataua 11 ma fanaua ai o ia i Se'etaga. Ua atoa ai lenei o le 10 tausaga talu ona maliu si ona tama faia'oga, Roy Conboy ma lona faletua o Josephine Conboy. Ua alaala pea Brian Conboy i Long Beach Kalefonia.

Ina ua mae'a lana lea taumafaiga i le Triathlon sa iloga ona va'aia e i latou le pulupuluina e Conboy o le fu'a a Amerika Samoa, le atunu'u sa fanau ai.

"Ia te a'u, o sa'u toe fa'afetai lea i lo'u tama, ae o le atunu'u fo'i sa fa'afaileleina lo'u nei tagata fa'atauva'a. Ua ou lagona le mafanafana o lo'u lagona, o le atunu'u lava lea ua fa'asino mai e le Atua ou te ola a'e ai. Ua ou lagona le olioli o lo'u loto ma ou te fa'aauau pea lava ona tamo'e i so'o se mea ma le Fu'a a lo'u malo,” o se tala lea a Conboy e pei on fa’asalalauina i Amerika.

"O le taimi lenei, ua fa'afouina fo'i lo'u tusi folau, o lo'o avea lava au ma Nesionale o Amerika, e le o se sitiseni, ma ou te le suia lava lea tulaga, aua afai ou te suia, e le atoa ai lo'u avea o le tagatanu'u o lo'u malo na ou fanau a'e ai."

O le taimi nei o lo'o avea o ia ma Faia'oga i le Special Eduation i Long Beach, Kalefonia. Ma ua atoa lona 50 tausaga.

E tusa ma le to'a 40 i latou na fa'amae'aina atoa lea tu'uga ma sa ia fa'aalia, "O se mea ua ia lagona, ua silisili ua ou mafaia mo a'u lava ia e fa'amauina ai lo'u avea ma tagatanu'u moni o Amerika Samoa."

Na malaga mai i Amerika Samoa o ia i le 49 o ona tausaga, se'i toe vaai i le falema'i LBJ Medical Center sa fanau a'e ai. Ma e atoa la le 50 o ona tausaga, o i ai pea o ia i Amerika Samoa i le tausaga e 2017.

Sa tamo'e fo'i lenei ali'i i Italia, ina ua asiasi e maimoa ma tafao i lea malo, sa ia tamo'e ai fo'i ma e fa'aaoga lava e ia le fu'a a Amerika Samoa e fa'ailo ai o ia i so'o se mea e tamo'e ma fa'amae'a ai ana tamo'ega.

FONOTAGA FESO'OTA'I MA MATUA O FANAU FA'APITOA: SPED

I le aso Lulu na te'a nei Novema 21, 2018 na fa'atautaia ai le fonotaga taua a le Pulega o le Polokalama a le SPED ma le vasega o Matua o lo'o aofia fanau i lea polokalama ina ia fa'amalamalama ai nisi o tautua taua mo fanau o lo'o i ai mana'oga fa'apitoa i lo latou soifuaga.

Na tula'i le sui o le Matagaluega o A'oga, lea ua fa'apa'aga ma le SPED ina ia fa'ao'o le polokalama i a'oga, ia a'oa'oina tutusa fanau ua i ai mana'oga fa'apitoa ma isi fanau uma i le atunu'u.

O le tama'ita'i Sui Fa'atonusili o A'oga, Fa'auifono Vaitautolu sa tula'i mo le Faatonusili Ruth Matagi Tofiga, ona o lo'o malaga i fafo le fa'atonu i tulaga fo'i tau le galuega.

O folasaga fa'apitoa mo lea fonotaga taua, na fa'atulaga ina ia fa'ailoa atili i matua aia tatau a latou fanau ma ia tima'i i latou i tautua eseese e mafai ona latou fa'aaogaina mo fanau ua i ai mana'oga fa'apitoa.

Sa ia tima'ia le mamalu o matua, "O outou lava o ulua'i faia'oga i le fanau, ua i ai fo'i le tatou sao mo fanau i lo latou fanau mai, ‘Ia a'oa'o le fanau e tusa ma ona ala, a o'o ina matua e le toe te'a ese ai’, ma o la tatou galuega lea ua mae'a fa'atulaga mai e le Atua ia i tatou, o outou o matua ma i matou fo'i o faia'oga, ina ia malamalama ma soifua atamamai fanau."

O le folasaga na mua'i fa'afofogaina e le vasega o matua, o le tama'ita'i Fa'atonu o le Ofisa o le Medicaid, Sandra King Young.

I lea folasaga sa matua iloga ai nisi o suiga fo'i ua fa'atula'ia mai lea Polokalama talu mai le tausaga e 2014 na toe fa'aleleia atili ai nisi o mea patino na fa'ailoa mai e tautuaina ai le atunu'u e le Medicaid.

Ona o lo ua agava'a uma nei tagatanu'u o Amerika Samoa i le Medicaid talu ai e vaivai uma lava le tamaoaiga tausi o latou aiga, o lea ua mafai ai ona totogia e le Medicaid talavai i falema'i e pei ona faia nei i Falema'i fa'aitumalo uma. Ua na'o le totogi lava o vaila'au ma fuala'au ua faia nei e matua mo fanau.

Ua fa'apena fo'i ona totogia uma talavai a le fanau e le'i atoa le 18 tausaga e le polokalama a le Medicaid.

Afai la ae avatu se pili e le falema'i ia te oe le matua, e tatau ona e fa'ao'o maia lea pili i le Ofisa o le Medicaid e feutaga'i atu ai lea pili mo lau tama. Peitai o fanau uma sa fanaua i malo e ese mai Amerika Samoa, e ao ina atoa lelei le lima tausaga o alaala lea tamaititi i Amerika Samoa, pu'ea ona ID ona fa'ato'a gafatia lea ona totogia e le Medicaid ona pili falema'i.

Ua toe fa'aleleia ma fa'aolaola mai le "Auina atu i fafo o tatou tagata gasegase ae totogia e le Medicaid o latou pili mo togafitiga." Ua toe faaleleia lea tautua ma ua fa'aaogaina ai Niu Sila mo le taimi nei, aua e taugofie ae lelei atoatoa tausiga o gasegase.

Ma le vaega lona tolu o le tautua lea ua mafai ona fa'atauina mai ai mea faigaluega e fa'aaogaina mo togafitiga o gasegase po'o le fa'aaogaina fo'i e i latou o i ai afaina tumau i le tino ina ia fa'aleleia ai lo latou olaga. O lea polokalama e fa'aigoaina o le DME - Durabe Medical Equipment.

O nisi o folasaga i lea fonotaga e aofia ai LBJ Medical Center; Matagaluega o Alamanuia mo Tagata Lautele (DHSS); Puipuiga o Aia Tatau a i Latou e i ai mana'oga Tupito (OPAD); Vocational Rehabilitation ma le Matagaluega o le Soifua Maloloina.

SAMOANA JROTC FOA'I MO LE HOPE HOUSE

O le aso Lulu na te'a nei sa tu'ufa'atasia ai e le to'a 243 o fanau a'oga o lo'o tau'avea le polokalama a le JROTC i le A'oga Maualuga a Samoana le latou foa'i o mea'ai eseese e foa’i i le Hope House i Fatuoaiga.

"O lenei polokalama e fa'atautaia lava i tausaga ta'itasi e le JROTC e avea ma se latou tautua mo le lautele, ae maise fo'i i le agaga o le Fa'afetai i le Atua o manuia eseese i le vaitau o le Aso Fa'afetai, ma ia maua fo'i le agaga o le foa'i atu i so'o se tasi e i ai le mana'omia e fa'afiafiaina ai i latou,” o se fa'amatalaga lea a le tama'ita'i o Cadet Major Venessa Covarrubias.

O le fesoasoani tele i lenei taumafaiga e ala lea mai Matua uma o le fanau a'oga o lo'o tau'avea le JROTC i Samoana, fa'apea ma alii faiaoga SFC Leutele, Senior Army Instructor [SAI] ma SFC Fe'a.

I tausaga ta'itasi e tu'ufa'atasia ai a latou foa'i, e tu'u lava i le fanau a'oga e filifili i latou po'o fea e foa'i i ai le latou lea saoga, ma le isi, po'o le a fo'i le galuega e aoga mo le mamalu lautele latou te fa'atinoa.

O le latou poloketi lea ua fa'aigoaina o le Community Service Learning, po'o le iloa ona tautua le atunu'u. O se tautua e aoga tele, e fa'ailoa ai fo'i le agaga moni ma le aganu'u a Samoa o le alofa ma foa'i.