Tala I Vaifanua

FOA'I BLU SKY MO HOPE HOUSE - FA'AALIA AI LE AGAGA FA'AFETAI

O le taeao ananafi, na faia ai le sauniga fa'apitoa e taua'ao aloa'ia ai e le kamupani telefoni a le Bluesky Communications le latou meaalofa mo le Nofoaga o Faamoemoega - Hope House - ma i latou uma o matua matutua ma fanau ua tausia fa'apitoa i lea nofoaga.

O le susuga le Pulesili i Amerika Samoa a le Bluesky, Raj Deo, sa auai ma sui o le kamupani.

O le foai e $3,000 le tinoitupe ma le tautua o le cable TV e lua e leai se totogi mo le tausaga e tasi, fa’atasi ai ma le pusa turkey mo le Aso Fa’afetai. O le aotelega o lea feoai pe a fa’atupe atoa e $5,000.

O le tama'ita'i o Sherry Sele o le Bluesky sa avea ma fofoga o le Pulega a le kamupani na te fa'aleoa le foa'i, ae o Deo sa ia taua'aoina le siaki i le afioga Epikopo Peter Brown, lea na saunoa, "O le fa'afetai e le mafai ona fa'aitiitia aua o lenei lava le Kamupani Telefoni, ua latou foa'i tele mo i matou i le Hope House. Ua le tasi ae ua lasi lava taimi, ma ua foliga mai o se matou pa'aga e aualofa mai ia i matou i le tele o taimi e lagona ai se mafatiaga tupito o le mana'omia. Fa'afetai tele, ua mafai fo'i ona maimoaina le televise matagofie ma ua fa'anofo filemu ai nisi o tiga o i latou o tausia fa'apitoa i lenei nofoaga o fa'amoemoega. Fa'afetai tele, ia toe fa'atumu e le Atua mea ua foa'ia, ma ia faasautualasi manuia o le pisinisi."

Sa i ai fo'i se keke sa tusia ai se fe'au taua, "Ia manuia le Aso Fa'afetai Hope House!" sa avea ma se talisuaga mama i le aso ananafi.

O latou meaalofa laiti e aoga mo i latou o tausia i le Hope House e aofia ai i le ato o mata tioata ma mitiafu ua lomia ai le igoa Bluesky.

Sa va'aia le fiaifa tele o le susuga ia Deo e fa'alatalata ma talanoa i se tasi o tina matua i le Hope House, lea sa pu'eina le la'ua ata, ma ina ua fesiligia o ia, pe aisea ua talanoa fa'apitoa ai i le tina matua, ae ata o ia ma fai mai, "Ua ou toe manatu i lo'u tina ina ua ou va'aia le tina matua lea, amuia lava i latou o i ai pea le avanoa e talanoa ma tausia ai o latou tina."

E ese mai lea sa mua'i faia se foa'i e $1,000 mai le Cost U Less i le Hope House. O le susuga Peter Foskitt, le Pulesili i Amerika Samoa fa'apea ma le ali'i pule Lua o Jerome Porter sa avea ma sui o le Cost U Less.

Na talia fo'i ma le agaga fa'afetai tele lea foa'i e le Pulega a le Hope House fa'apea le afioga  Epikopo Peter Brown.

FONOTAGA TUPULAGA TALAVOU I FITI MATI 2019 FILIFILIA SUI MAI ATUMOTU PASEFIKA

Ua fa'alauiloa mai e le susuga le Sui Failautusi o le Initeria - Doug Domenech e tatau ona amata sailia loa ni sui mai atumotu ta'itasi o le Pasefika e auai e suia o latou malo ta'itasi i le fonotaga ua fa'atualga ia Mati 2019.

Ua ia naunau fo'i e sapaia lea avanoa mo tupulaga talavou e matutua a'e avea ma Ta'ita'i i o latou malo. Ua le gata la ia i tatou ma isi teritori o Amerika i le vasa pasefika, ae ua manatu i latou uma e tatau ona so'ofa'atasi uma i ai talavou mai isi malo fa'aatumotu uma o le pasefika e aofia ai: Ausetalia, Atu Kuki; Fiti, FSM; Tahiti; Kiripati; Atu Malesala; Nauru, Niu Kaletonia; Niu Sila , Niue, Palau, Papua Niukini; Atu Solomona ae maise Vanuatu, Wallis & Futuna; ma teritori lea o Amerika i le vasa pasefika e aofia ai Hawaii, Amerika Samoa, Guam, Atu Mariana ma Hawaii.

Ona o lea fonotaga e faia i le tausaga a sau, o lea ua fautuaina ai o tupulaga talavou e vave ona fa'atutumu a latou tusi talosaga mo avanoa i lenei fonotaga mo le siliga o ni ta'ita'i lelei o tatou malo i le lumana'i. O tausaga o taulia i nei e 25-35 tausaga le matutua ma o le agaga tonu o lea fonotaga ua manino lona fa'apupulaga i le autu o le a usuia ai le fonotaga lea: "2019 Fonotaga Taitai Talavou o le Pasefika."

E taua tele le lelei o lau fa'asoa ma faaalia o ou manatu i le gagana peretania, aua o le fonotaga atoa o le a fa'atautaia lea i le gagana peretania.

E tatau ona atoa le 2 ma sili atu o tausaga o lo'o galue lea sui o le a talosaga ma filifilia e auai i lenei fonotaga taua.

Pe afai fo'i o le a fa'amanuiaina lau tusi talosaga, o le a totogia uma lau malaga fa'atasi ma le tausiga fa'apitoa o oe i le fonotaga ma toe taliu mai i lou malo faapea ma le tausiga o oe ma lou nofo ai fo'i i Fiti mo lea fono atoa. Ina ia talosaga sou avanoa i le fonotaga e mafai ona e auai i le fonotaga lea Emeli i le: https://fs2.formsite.com/AIPT10400/form150/index.html

FA'ATAUA TAFUNA HIGH NHS ASO FA'AFETAI - TU'UGA TAMO'E FELANULANUA'I

O lo ua mafuli nei le a'ogaTafuna High le Aso Fa'afetai i le latou fa'atinoa lea o se tamo'ega felanulanua'i ina ia mafai ona gaua'i ai le to'atele e tamomo'e, a'o le fe'au taua i lenei tausaga, "Ia tatou maua le avanoa e fa'amalositino, fa'aitiitia le so'ona mamafa o le tino, ma ia le toe maua ai i gasegase tau le Fatu."

Ua fa'ailoa mai o se seleni o le a mafai ona tu'ufa'atasia mai lenei taumafaiga, o le a taua'aoina lea i le Matagaluega o le Soifua Maloloina ina ia mafai ona fa'aaoga e tima'ia ai le to'atele o le atunu'u ia faaitiitia le a'afiaga o fanau ma tagatanu'u i le gasegase tau le fatu.

Ua fa'ailoa mai fo'i e le vasega o ta'ita'i o le NHS i Tafuna, ia la'eia uma e tagata tamomo'e i lea taeao mitiafu papa'e, aua o so'o se vaega lava o le tamoega e ausia, o le a sasa'a mai ia te oe se lanu ese mai le isi lanu na sasa'a muamua atu. O lona uiga o le a felanulanua'i le lanu o lou mitiafu, ma e matagofie atoa lou la'ei pe e la'eia le pa'epa'e i lea aso.

O le taimi masani o le vaveao lava e tatau ona fa'atino ai le tamo'ega o le Aso Fa'afetai, Aso Tofi itula e 5:00 i le taeao lava e tatau ona amatalia ai lea tu'uga saili seleni mo lea fa'amoemoe lelei, ma fa'apa'aga lava fo'i lenei fa'amoemoe e le NHS Tafuna High ma le Matagaluega o le Soifua Maloloina RHD/DOH.