Tala I Vaifanua

2LT RYAN TAIFANE - FA'ATINO ULUA'I TIUTE I LE US ARMY RESERVE

O 2LT Ryan Taifane na tu'ua le atunu’u ia Fepuari 2018, ua toe taliu mai ma fa'atino ona ulua'i tiute fa'ata'ita'i o le US Army Reserve ma ua mata'ina fo'i le taumafaiga a lea alo o le atunu'u, aua ua na'o le 6 masina na fa'atauto ai, ae o lea ua mae'a uluai fa'atino ona tiute fa'ata'ita'i i le US Army Reserve.

Ua faailoa mai e ia, i lona tu'ua ai o le atunu'u mo ana taumafaiga ina ia avea ma se tasi o ta'ita'i o lea vaega o le Vaega Au a le Malo Tele, e le'i manatu o le a vave ona ia toe taliu mai e fa'atino ona ulua'i tiute fa'apenei, peita'i, ona o le vala'au fa'apitoa mai le fa'auluuluga o le vasega o i latou na fa'aulufaleina nisi o le fanau o taumafai mo le tautua mai le US Army, lea ua mafai ai.

"Sa ou auai lava i koleniga fa'apitoa a nei fanau, ina ia mafai ona ulufale atu i le vaega 'au ae ua masani i lea itu o le tautua. Peita'i o lea fesoasoani malosi ia i latou i le fa'auluga o le fanau ua ausia togi fa'atasi ma le malosi e ulufale ai i le BCT ma fa'asolo atu i a latou AIT, o lea ua toe tu'u mai ai ma le avanoa matagofie ou te fa'atautoina ai nei fanau e to'atolu sa kolenia fa'apitoa."

O i latou nei e to'atolu o Senetenari Fa'atili, lea o le a tu'ua le atunu'u i le masina fou; Leota, Teofilo ma Logwood, Monalisa e malaga ese ia Ianuari, 2019.

O Taifan e 10 ona vaiaso sa mua'i a'oa'oina ai i tomai fa'ata'ita'i OCS i Fort Linwood i Missouri, ona soso'o lea ma le 12 vaiaso na a'otauina ai o ia i faiva ma tiute fai fa'ata'ita'i o le US Army Reserve i Fort Benning Georgia ma taliu mai ai nei, ua a'e manumalo faiva.

I le taimi nei ua toe tu'ua nei le atunu'u ina ia fa'atino tiute e pei ona vala'auina ai e le US Army ma ua malaga fa'atasi uma i latou ma le faletua ma le fanau. Sa auai si ona tina i lona fa'au'uga, le tofa Taula Niualama Taifane mai Amanave.

O le tatua a lea alo i lona afio'aga e aofia ai lana tautua i lana Ekalesia, EFKAS Amanave, o ia o le Tiakono Fa'au'u ma le faletua, ma o se totino fo'i o le latou Aufaipese, ma o ia fo'i o se talavou galue malosi i lana Autalavou ua ia tu'ua nei.

Fa'ailoa mai e le ali'i Tiakono, "Po'o fea lava o le a tofia mai e galulue ai, i so'o se nofoaga a le US Army, o le a taumafai e fa'aaoga le ma'ua tofi i so'o se Ekalesia e tau latalata atu ia i matou, ua fa'atonuina a'ia'i i ma'ua e le tina, ‘Aua ne'i galo le Atua i lou olaga taumafai i galuega ma faiva, a'o tu'ua ai lou aiga ma lou nu'u ae maise lau ekalesia iinei, ia tutumau pea ma galue i le tofi ua tofia ai oe e le Atua mo sau auaunaga, ia manuia ai ou faiva i mea uma ua e aga atu e galue ai," afai ae le faia le mana'oga lea o le tina, e misi atoa lava le taumafaiga’."

SOOTAGA TAUTUA US COAST GUARD & MALO AMERIKA SAMOA

Ua mae'a feutaga'i le faigamalo Kovana Lolo Moliga ma lana kapeneta ma le Pulega fou o le Ofisa fa'alotoifale o le US Coast Guard i le atunu'u i ala e ao ina feso'ota'i ai le tautua ua latou faia pea ina ia saogalemu gataifale o Amerika Samoa.

Ua fa'ailoa mai o lea fonotaga o le ulua'i taimi fo'i lea ua feiloa'i ai Lolo ma le susuga Admiral Kevin Lunday lea ua ta'ita'ia nei lea Ofisa fa'alotoifale o le US Coast Guard.

O se tasi o mataupu sa fa'ananau i ai le Kovana e fia fa'amamafa i le latou talanoaga, o le tulaga o aiaiga o tulafono uma e ao ina usita'ia e va'a fagota lea e tatau ona la'uina maia le i'a mo le Kamupani I'a.

Peita'i ua fa'ailoa e Lunday, "O le a fa'ateleina taimi e toe fa'alauiloa, faia fa'aaliga ma fa'amanatu i le vasega o Kamupani Va'a fagota i le atunu'u ma i latou fo'i e tautuaina falei'a, ina ia mautinoa ua latou mua'i iloa le gaoioiga e fai, a'o le'i ulufale mai ma  latou faiva e sapalaia ai le Star Kist Samoa.”

"O aiaiga nei a le US Coast Guard, e mafai ona tu'uavanoa le matou Ofisa i va'a ina ia latou fa'aleleia ni mea o lo'o lape ai le latou Sa i aiaiga o tulafono o va'a folau i le tatou sone, ae le mafai ona fa'asafua ia tulaga, e ao lava ina usita'ia."

O nisi o tautua a le US Coast Guard ua mautinoa lava le faia o vaitaimi atofa e fa'atino ai a'oa'oga eseese mo ali'iva'a Kapeteni ma latou soatau, ina ia iloa e i latou taimi e fana a'e ai latou fa'ailo, ituaiga o fa'ailo ma le latou uiga pe a va'aia e nisi o va'a o lo'o latalata ane i le latou ogasami o i ai. Ae maise o le fa'aaogaina fo'i o nei masini eseese ua mautinoa ua aofia i totonu o le latou va'a folau pe fagota i taimi uma.

Ua talisapaia fo'i ala o fesoasoani faapitoa ua fa'ailoa ane e Lunday o le a latou va'ai toto'a i ai ma faia fa'ai'uga e fesoasoani mai fo'i ona o le mana'omia o lo'o ua i ai i le tatou nei malo.

Ua fa'ailoa mai fo'i e nisi o sui o le US Coast Guard mai le Ofisa Autu e va'aia atumotu o Amerika i le Pasefika i Honolulu, ituaiga va'a fou a le Coast Guard ua faia ana malaga ta'amilo i le sone atoa e va'aia e le Malo Tele e fa'aaogaina va'a tetele ua matua iloga fo'i ona si'itia ai le tautua a ali'iva'a o lea vaega o le Puipuiga Lautele o le Iunaite Setete atoa ma ona teritori.

Ese mai lea o se tasi fo'i o atali'i o Amerika Samoa, Coast Guard Reservist Frank Vernatius Thompsen, lea ua litaea mai ona tiute i le Reserve Unit a le Coast Guard ae o lo'o fa'aauau pea lana tautua i le US Coast Guard o se tasi o ali'i Ofisa Coast Guard i le latou ofisa fa'alotoifale se'ia o'o fo'i ina manatu o ia ua lava lana auaunaga.

O Oketopa 1, 2018 lea sa muta ai le auaunaga lea a Frank i le Coast Guard Fa'aagaaga.

O nisi o le aiga o Thompsen, fa'atasi ai ma sui o le Ofisa Autu o le US Cost Guard, sa auai i le 'aiga na taua'ao fa'apitoa ai lona fa'ailoga e taualoa ai lana auaunaga i lea vaega taua o le US Defense.

O le tautua a Thompsen ua atoa le 28 tausaga e aofia ai ma lana tautua i le US Navy. O ia sa avea ma US Coast Guard Reservist o se Senior Chief Maritime Enforcement Specialist ma ua silia lana tautua lea i le 20 tausaga, ae o lea ua litaea ma ai nei.

I sana fa'amatalaga sa ia fa'ailoa ai, "E leai se mea e sili ona fa'agaeetia ai le loto ona o le avanoa sa tautua ai i le US Coast Guard Reserve, ua ou malamalama ai i tulafono uma mo va'a o so'o se ituaiga, ina ia folau ma le mautinoa ua mae'a usita'ia uma na tulafono fa'ataoto a le Coast Guard. Ua maua le avanoa e tautua ai fo'i ma faamalamalama lelei o tatou Ali'iva'a i tulafono e taumafai ai ona fa'asaoina le soifua o i latou fa'atasi ma pasese femalaga'i i va'a. O se sao matagofie mo tatou tagata, ia folau ma le saogalemu."