Tala I Vaifanua

lASCC-BAOA - 18 FANAU FA'AU'U TIKERI BUSINESS I LE FA'AIUGA 2018

O fanau a'oga i le Kolisi Tu'ufa'atasi a Amerika Samoa (ASCC) o lo'o tauavea kosi fa'apisinisi ua aofia i le latou Kalapu o le BAOA, sa faia le latou fa'atasiga i le afiafi aso Tofi Oketopa 4, 2018.

I lea fa'atasiga, ua mafai ona taua'aoina aloa'ia atu ai i matua faila o galuega a fanau sa faia i le tausaga a'oga o a'oa'oga i le Kolisi i Kosi Pisinisi.

O le tama'ita'i peresetene o le BAOA  Mayanne Fa'atau na ta'ita'ia le polokalama fa'asolo mo le afiafi fiafia a Matua, fanau a'oga ma latou Faia'oga, ae maise fo'i le Pulega a le Kolisi i le Sui Peresetene Dr Lina Scanlan ma le Pule i mataupu uma e tau'avea e fanau a'oga, Letupu Moananu sa vala'aulia fa'apitoa e molimauina lea fa'atasiga.

Na saunoa le Ta'ita'i o Kosi Fa'apisinisi, Dr Vaofua Fa'atoafe e fa’apea, "O faila ua taua'aoina ia te outou, ua avatu ai ia te outou se aotelega o le taumafaiga a lou alo a'o matou a'oa'oina mai le amataga o le tausaga se'ia o'o mai i lenei taimi, ua sauni i latou e faau'u nisi, ae o isi e si'itia fo'i a latou kosi i le isi la'asaga fou, ina ia o'o atu i le taimi e fa'au'u ai po'o le tausaga fou."

"O le pau lava lenei o le Kosi tau'ave i le Kolisi Tu'ufa'atasi e le mafai ona fa'au'u se tamaititi a'oga ma se C- i lona lipoti o ana mataupu tau'ave, e tatau lava ona ausia le C+ po'o le B ona fa'ato'a fa'ataga lea fa'au'u."

Tautalagia fo'i e Dr Fa'ato'afe le tulaga o toniga ma aso e la'ei ai e le fanau aoga. "O le suti fa'apisinisi o tama'ita'i ma ali'i, e la'eia lea i le aso Gafua, ae o le Puletasi o le la'ei lea i aso ta'itasi o le vaiaso se'i vagana ai le aso Lulu e la'ei ai le Mitiafu pisinisi ma lou lava ofuvae masani, a'o le aso Faraile e fa'amamalu au le puletasi. O le taumafaiga lea e a'oa'o le fanau ina ia masani e la'ei talafeagai ma le kosi o Tagata Faipisinisi e la'ei o tagata e lavalava mama ma lautogia mo so'o se ituaiga fonotaga i taimi uma.”

Tautalagia e ia le tulaga o fa'asea a nisi matua ona o lavalava ua le toe la'eia e latou fanau talu ona auai i kosi fa'apisinisi, ae ua faia toniga fa'apitoa nei. "O lena mataupu e fai sa'o lava i matua, afai e le mana'o oe e poto si ou alo e fa'atautaia sana pisinisi i le lumana'i, ona e aia lea i ona la'ei, ae afai e te naunau i se mea e lelei ai lou alo ma e aoga atu ai ia te oulua i le lumana'i, ona tu'u mai lea o lou alo e avea ma tamaiti a'oga i le matou vasega, matou te a'oa'oina fo'i i latou i ala ua matou mautinoa, e lelei ai lona olaga faigaluega i sana pisinisi i le lumana'i."

E tolu ala ua a'oa'oina ai fanau e ali'i polofesa e to'alua, Dr  Papalauena Ioapo Taua'i, Mr. Lam Yuen ma Dr. Fa'atoafe; "Ia ma'ea atu le a'oga a le tamaititi i le Kolisi Tu'ufa'atasi ua taulimaina lona fa'ailoga ua gafatia e i latou ona ulufale atu i nisi Iunivesite e sailia fa'ailoga maualuluga atu i lea lava kosi, gafatia e i latou ona amatalia sana lava pisinisi pe gafatia fo'i ona faigaluega i ni faiva fa'apisinisi i le malo po'o nisi lava pisinisi tumaoti i le tatou atunu'u."

O nei filifiliga e tolu, e mafai ona faia e so'o se tamaititi a'oga ua mae'a pasi mai ma se fa'ailoga AA Business Administration, AS in Business Management ma AS in Accounting. Peita'i o le fa'aiuga o lenei tausaga ua agava'a ai nisi o le fanau ina ia fa'au'u mai ma se fa'ailoga fou mai kosi lava fa'apisinisi ma ua fa'ailoa mai fo'i i le vasega o matua lea fo'i si'itaga o a'oa'oga i le Kolisi Tu'ufa'atasi i lenei tausaga.

“Ua fiafia e fa'alauiloa atu o lea ua maua fo'i le fa'ailoga AA in Business Administration. Fa'afetai i le va'ai mamao fo'i a le susuga le Pule i Mataupu tau'avea i le Kolisi Letupu Moananu ma le pulega aua ua latou va'ai toto'a i nisi ala e faaleleia atili ai tomai o le fanau. Peita'i e mana'omia lava ona sailia tusi pasi maualuluga o tatou fanau i le tatou nei malo, fa'aaoga ai le tatou Kolisi Tu'ufa'atasi nei,” o se fa'aiuga lea o le tautalaga a Dr. Faofua Fa'atoafe.

I pepa fa'ailo na taua'aoina ua lisia uma ai mataupu e ao ina tau'avea e le fanau a'oga i kosi faapisinisi ta'itasi, ua aofia ai ma le kosi fou lea ua mae'a fa'atulaga. E le gata i lea ua aotelega mai ai fo'i ma le aofai i unite e ao ina pasi ai le tamaititi mai le ASCC i lea kosi.

Na tula'i se sui o matua ma fa'afetaia lava le vasega o faia'oga e to'atolu mo lenei aotelega o le fanau e tau'avea kosi fa'apisinisi. O lo latou mataituina ma fa'atonu fanau i amioga e ao ina faia, aua e moni e tatau lava ona savavali ma amio a'i i latou e pei o kosi ua a'oa'oina ai.

Saunoa Scanlan, "O lenei le kosi e matua maualuluga lava maka e ausia e le fanau i a latou mataupu ma e fa'au'u mai lava le to'atele ua avea fo'i ma sui o le PTK po'o tamaiti ua maualuluga togi i mataupu tau'ave i le Kolisi nei. O se tala'aga lea e fia fa'alogo i ai le Kolisi i taimi uma i fanau e faauu mai i le tatou nei Laumua. E le gata i lea, o e na malaga i fafo e tausailia fa'ailoga, ua toe taliu uma mai ma le manuia, ua maua tusi pasi na tausailia ma ua amata faigaluega i le tatou malo, po'o pisinisi tumaoti fo'i."

I le toega o le afiafi, sa toe fa'alauiloa nisi o mea sili ona mata'ina ua fa'amaumau mai fanau na malaga atu ma tomai fa'apisinisi e tausailia o latou fa'ailoga i Iunivesite i fafo. "Ua ou fiafia tele e fa'alauiloa atu, o le aofai o fanau malaga atu i fafo e sailia fa'ailoga i kosi faapisinisi, e 100% lava o i latou na malaga ua toe taliu mai ua maua fa'ailoga na tausailia. O le isi mea silisili ona matagofie, ona o se tasi o lenei vasega o fanau pisinisi na malaga atu i fafo e sailia ona tusi pasi maualuluga, ua toe taliu mai ma fa'au'u ma ona fa'ailoga ia Me 2018, ma ua avea ma Summa Cum Laude po'o le togi silia i le vasega faaiuaso, i le Iunivesite o Utah lea sa a'oga ai.”

TOE SAUNIGA LE SUSUGA LE MATUA - UTU ABE MALAE

Ona o le usuia o le fono a le susuga le Matua Utu Abe Malae, o lea ua finagalo aiga ina ia fa'alauiloa atu fa'ala'ua'itele taimi atofa mo ona toe sauniga.

O le sauniga lotu fa'apitoa a le aiga, ua fa'atulaga lea i le Gov. Rex Lee Auditorium i Utulei i le aso Lulu, Oketopa 10, 2018, itula 5:00 i le afiafi.

Ona soso'o lea ma le aso Faraile Oketopa 12, 2018 e amata lava i le sauniga pu'upu'u i le Malumalu o le Maota Gasegase Faga'alu i le itula e 7:00 i le taeao lava. Soso'o lea ma lona sauniga fa'apitoa i lana Ekalesia CCCAS i Amoulii le itula e 9:00 i le taeao lava lea, ona molita'i atu lea o lona va'a i le maota o le Aiga Sa Utu i Mata'ava, Amouli lava. O lona toe sauniga e faia lea i le itula e 1:30 i le aoauli o lea lava aso ma lagomau ai i le Tia o Utu i lona aiga lava, Amouli.