Tala I Vaifanua

FOAI BLUESKY I LE MASI MO LE SAILIGA TAUSALA LALELEI

O le aoauli ananafi na fa'atasi atu ai le Miss American Samoa Inc., (MASI) fa'apea ma Tausala Lalelei o le a tauva e saili se tasi e pale i lenei tausaga fa'atasi ai ma latou pa'aga i le Ofisa o le Bluesky Communications i le Laufou i Nuuuli, ina ia taua'aoina aloaia atu le latou foa'i e fesoasoani i le fa'amoemoe o lo'o loma nei.

O le susuga le Pule Sili o le Bluesky i Amerika Samoa Raj Deo, sa fai ma sui o le kamupani e foai le $11,000 e aofia ai le tinoitupe ma isi tautua e fesoasoani ai i le MASI.

O Sherry Sele sa avea ma fofoga o le Bluesky ma sa ia fa'ailoa le naunau o le Bluesky, e fa'atino poloketi ma fesoasoani e atina'e ai mea fa'apenei e tauleleia ai le Amerika Samoa ma ona tagata.

“Ua a fiafia pea le Bluesky e auai ma una'ia polokalama ma galuega faapenei e fa'aleleia ai le tautuaina o le tatou malo, ma una'ia ai fo'i tama'ita'i ma tina o le atunu'u, ina ia tula'i mai e atina'e mea lelei mo le atunu'u. O se tasi lea o tiute o tama'ita'i talavou, o le fa'alauiloa atu o le lalelei o tatou tagata ma le matagofie o le tatou atunu'u, ma e auai lava le Bluesky i taumafaiga fa'apenei, aua o se tofi e faaea ai tama'ita'i lalelei talavou o le atunu'u i le va ai ma isi malo o le Pasefika ma le lalolagi atoa,” o se tala lea a Sele.

Sa fa'ailoa e Deo, "O se avanoa lelei fo'i e fa'ailoa atu ai le agaga tonu o le Bluesky e fai so matou sao i galuega lelei mo Amerika Samoa ma ona tagata lautele. Tau ina ia maua se tatou tauvaga matagofie ma e fa'amanuia atu ai i taumafaiga uma a tama'ita'i uma e to'alima o lo'o tauva i lenei tausaga.

O le fa'afetai a le MASI sa nafa lea ma le latou Peresetene Meafou Imo, ma sa ia fa'ailoa ai, "O le Bluesky o le matou pa'aga lea e fa'ailo o le ‘Taimane’ e le gata ina latou foa'i le tupe ae ua i ai ma isi a latou foa'i e fa'ao'o mai i meaalofa o le tauvaga ma le fa'atauina fo'i o latou laulau mo le maimoaga i lea po o le fa'amoemoe. O lenei tausaga e $11,000 o le sao atoa lava lea o le pulega ma le aufaigaluega, fa'afetai tele lava Bluesky. Ua le tasi ae ua lasi lou alofa mai."

I le taunu'u atu i le Ofisa o le Bluesky, ua va'aia ai le eseesega ma isi Ofisa uma ona o lo ua teuteuina fa'apitoa.

Ina ua fesiligia le matagofie o le tapenaga ua va'aia, ae fa'ailoa mai e Sele, "O le vaiaso lenei ua fa'ataua ai e le Bluesky le tautuaina o le mamalu o le atunu'u e gasolo mai i matou Ofisa ma so'o se matou tautua lava."

"Ua si'itia le a'oa'oga o i matou uma o tagata e tautuaina le atunu'u lautele pe a o'o mai mo se fesoasoani a le Bluesky, ia tautua ma le fiafia, tali fesili ma le fa'aaloalo, ae maise ia le gata i le tausia pea le va lelei ma tagata e gasolo mai mo fa'afesili ma tautua eseese a le Bluesky, ae ia aveaveo'o fo'i i le va o le tagata failgaluega i totonu o le ofisa,” o se tala lea a Deo.

"Ua matauina e ui lava ina toetoe a nonofo faatasi tagata faigaluega i le potu lava e tasi, ae ave le emeli a le tasi i le isi, ae o le avanoa lea e tatau ai ona tu i luga, fai sina la'a ma talanoa i le mataupu o lo'o fia fefa'asoa'i ai lagona. Ua atagia i le fai emeli lea, o lo'o i ai se mea e le fiafia ai le tasi i le isi, ma ua sili ai lona fai le emeli, ae le alu i ai e talanoa ma fesaga'i ma le isi tagata faigaluega o le matou kamupani,” o se tala lea a Deo.

O le 'autu ua fa'amalosia nei i le aufaigaluega a le Bluesky, "Tula'i Savali ma Talanoa” o ala na e tolu e mafai ai ona fa'afo'ia so'o se mataupu e alia'i mai e tatau ona soalaupule i ai nisi e to'alua pe to'atele o le Kamupani, ina ia fa'ao'o le tautua atoatoa i tagata uma e fia maua le fesoasoani mai le Bluesky.

O lea si'itaga o tomai e tautua ai le mamalu lautele, ua fa'atulaga mai i isi lala o le Bluesky fa'avaomalo. O lo'o faia fo'i la ma se latou tauvaga Maukeni Teuteuina aua o le vaitau lenei o le Halloween. O le a fa'alauiloa mai po'o ai le vaega o lea Kamupani e mauaina le fa'ailoga togisilia i lea tauvaga i se lomiga o i luma.

ASIA E LE MASI: HOPE HOUSE; LBJ PEDIATRIC WARD & TAOA

O le aso Lua sa asia ai e le MASI ma le Vasega o Tausala Tauva i lenei tausaga fa'apea ma le Tausala Lalelei o le Pasefika, o le Tausala Lalelei lava lea o Amerika Samoa Ms Matauaina Toomalatai i le Nofoaga o Fa'amoemoega, po'o le Hope House. Na latou avatu le tele o ie moega, ie afu ma aluga. fasi moli o vaila'au manogi u'u ulu ma mea uma fa'apena.

Ona soso'o lea ma le asiasiga i le LBJ Medical Center Pediatirc Ward mo fanau iti. O i latou o lo'o tausia ai o latou gasegase e to'a 19 i le aso Lua, o lea sa saunia uma fo'i latou meaalofa mo i latou taito'atasi, ma faia latou lotu ta'ito'atasi.

O le taeao ananafi na asiasia le TAOA i Pago Pago lea sa mafai ona feiloa'i ai i latou ma le vasega o tama ma tina matutua.

Na faia le maimoaga i galuega taulima a Samoa o loo gaosia ai e matua matutua, ma sa maimoaina e i latou le vasega o tama o lo'o ta fa'atagata, o tanoa palu ava, o tanoa fai mea'ai, o pate Kirikiti, o to'oto'o ma fue, o measina uma a Samoa.

JORDANNA MAGA - FAIA'OGA O LE TAUSAGA 2019

O lenei tausaga i le sailiga o le Faia'oga e avea ma Faia'oga o le Tausalaga 2019, ua filifilia ai le tama'ita'i faia'oga mai le a'oga maualuga Tafuna, Jordanna Maga.

O le to'alima na tauva o le faia'oga mai Fitiuta, Faia'oga na tula'i mai Leone, Faia'oga na tula'i mai Lauli'i ma le faia'oga na tula'i mai Matafao.

"Ua fili fa'apitoa mai tagata e le o faigaluega i le Matagaluega o A'oga ina ia latou fa'amasinoina galuega a Faia'oga tauva, ina ia itiiti po'o le leai lava fo'i se lagona o lo'o fa'aauau pe matele i se tasi itu le faamasinoina o lenei tauvaga mo faia'oga,” o se fa'aaliga lea a se tasi o sui iloga o le Teacher Quality lea sa latou fa'atautaia ma tapena le tauvaga lenei.