Tala I Vaifanua

TU'UMALO LE AFIOGA MAGELE APELU AITAOTO

O le taeao o le aso Faraile ua te’a na fa'atautaia ai le toe sauniga o le afioga Magele Apelu Aitaoto i le Malumalu EFKAS i Taputimu, o le Ekalesia sa galulue ai i la'ua ma le faletua Tutuluomanulagi Pulepule Fonoti Sailele ma le fanau.

Na soifua mai o ia Me 28, 1944 ae ua ia tu'ua lenei olaga ia Setema 5, 2018. Na fa'au'u mai o ia i le Kolisi a Avele i Vailima, Samoa ma e tele fo'i taleni sa ia iloga ai ona agava'a, ma sa faigaluega ai i Samoa fa'apea fo'i iinei.

E tele ana galuega e faigaluega ai ona o lana taleni tusitusi, i le gagana Samoa e mitamita ai tele, ma fa'amama'i i ai ona lagona. Peita'i e lelei fo'i lana fa'aperetania, ae sa matele ina nanau lona loto i le measina Samoa moni o lana Gagana Samoa.

Sa tusitusi o se tusitala i le Samoa Times a'o i ai le uso o lona tama i le tulaga Fa'atonu, le susuga Liva Seiuli, o ia lea sa fa'aulufale ana tusitusiga "O Vae o Fealualua'i!"

Ina ua nofomau lava Magele i Seetaga ua avea fo'i Amerika Samoa ma malo e fa'amautu i ai lo la'ua aiga ma le faletua ma le fanau.  E to'a 7 lana fanau ma ua 15 fanau a fanau a la'ua fanau ua tupuga mai i lenei tama.

Na molimau le faletua Tutuluomanulagi Fonoti Aitaoto, "Se le o se olaga faigofie le ma'ua mafutaga ma lenei tama, aua atonu e matagofie ona uiga i ana fa'auoga ma ana galuega sa galue ai, ae le'i i ai se faigofie i le maua mafutaga mai. O se tagata e malosi i le inu, e le vave mai i le fale, ae le fa'amoemoe fo'i i ai se mea i lona aso totogi, e fiu e tatali."

"Po'o le a lava la le fita sa mafuta ai, ae o le aso lenei ua tu'u ifo ai lona tino i le tu'ugamau, ua tatala le mafutaga i le oti, ma fa'ato'a malolo lelei fo'i lea, ua leai se toe faigata. Peita'i e i ai lava ona uiga 'auro, e afua ai ona umi le mafutaga."

O uiga na sa fa'asoa mai ai le afioga Aumua Amata, le faipule i le Konekeresi. o lona toe pule fo'i lea a'o soifua Magele.

"E leai se taimi ou te vala'au mai ai e le tali atu ma le fiafia. E fiu fo'i e fa'ae'e atu le livi e nofo ai se'ia mae'a togafitiga o lona gasegase, ae fai mai lava e avatu galuega e fai mai, o lo'o malosi lava e fai. O le taua lea o le auaunaga a Magele i lona atunu'u o Amerika Samoa ma ona tagata. Ua alu ae sa fa'apea ona fai!"

Ua lagomau nei o ia i lona maota i Seetaga lava. Tau ina fa'amaise le Atua i le tina ma le fanau ma aiga loto fa'avauvau, ona o le tu'ua o le galuega e lana auauna. Tau ina ia pa'ua se toa ae toetu mai se toa.

POLOKALAMA FAAPITOA MO AIGA O FITAFITA UA MALILIU SETEMA 2018

O le Sosaiete mo Aiga Pele o Fitafita ua maliliu {SOS} ua fa'ataua nei o se tasi o polokalama i totonu o le US Army Reserve, ma ave ai le latou fa'amuamua i auaunaga e taua mo i latou o pelega a fitafita ua maliliu e afua i le tautua i tafa o taua po'o  se isi lava mafuaga.

O se ala lea ua avatu ai ma se fe'au fa'afetai na'ua a le US Army i a latou fitafita uma sa tautua ae ua maliliu a'o fa'atino o latou faiva, pe ua malolo mai foi i o latou tiute sa fa'atino i le vaega au. O le isi vala o lea auaunaga, e fa'amautinoa ai i aiga pele o fitafita ua maliliu, o lo'o aofia pea i latou i le a'ao tautua a le vaega au, tusa lava po'o le a le umi e soifua ai i latou.

Ua mae'a fa'alauiloa atu se fanoga sa galulue i ai le SOS ina ua fa'atula'ia se togala'au o fuala'au manogi eseese ma le matagofie i le nofoaga tonu o le Ma'a Fa'amanatu i le Lotoa a le VA i Tafuna, peita'i, sa fa'aleagaina lea togala'au matagofie i lona tau amata mai e nisi, ma ua toe tolopoina ai se galuega toe fa'aleleia ma fa'amae'a lelei a le SOS i lea poloketi aoga.

Ua toe fiafia lava e fa'ailoa atu ia i latou e fiafia e molimauina lea poloketi ua fa'atautaia pea, "Ua fa'aauau pea lea galuega lelei, ma ua mafuli fo'i lagona o le SOS ina ia le to'ilalo i fa'aletonu, ae ia avea ma lu'itau o le soifua galulue pea e fa'ataunu'u mea lelei."

Peita'i ia Setema lava i lona toe aso Sa na fa'ataua ai le "Tina Pine Auro" ma ua fa'aigoaina fo'i o le "Aso o Aiga." Ua fa'atauaina fo'i e le Konekeresi a le Malo Tele lea aso fa'apitoa, "E taualoa ai le pa'ia lasilasi o aiga uma o latou Fitafita ua maliliu, o se fa'ataua sili fo'i lea e molimauina e o latou aiga, o le tautua a latou pelega ua tu'ua le mafutaga mafana i o latou aiga pele."

Peita'i o lenei tausaga, ua manatu ai le SOS i Amerika Samoa e taualoa le amataga o le masina o Setema ona o le fa'amoemoe e toe fa'aauau ai galuega atina'e o le Memorial Healing Garden lea ua mae'a amatalia.

O le sosaiete a Tina Pine Auro o Tina ma Taito'alua o Fitafita ua maliliu sa muai fa'ato'aia e le faletua o Pohakalani Mauga [ua maliu] ma le tina o le atunuu, Cynthia Moliga, ina ua totoina lea togala'au o fuagala'au manogi eseese, e fa'amautu ai le mau, o tautua eseese sa galulue i ai pelega ua tu'ua le mafutaga i lenei vaitau. O se ala fo'i e toe fa'atepa ai le mamalu o i latou e asiasi ane i le ma'a fa'amanatu i le VA i Tafuna, i le suamalie o mafutaga mafana ua motusia e manatua ai pea a latou pelega ua mavae.

"O se toe vaifofo lea i lagona o'otia ma le misi alofa i loto mafatia o pelega o totoe i lenei soifuaga a i latou o fitafita ua maliliu,” o se toe tala lea a le tama'ita'i ta'ita'i o le SOS Dr Julia Levi Foifua.

"Afai e aoga fugala'au manogi e toe fa'afo'i atu ai se lagona fa'afetai i le ola o tatou o soifua ai pea, ae maise o le to'atele o i latou ua maua mai ai le tele o fesoasoani ma ni fa'amanuiaga, o le toe fa'amautuin fo'i lea o le agaga faafetai ma tumau pea le fa'atuatuaga, o lo'o alofagia lava i latou uma."

O lea ua toe fuafua nei le fa'aauau ona fa'atula'ia o le togala'au o fugala'au manogi i le ma'a fa'amanatu lava o le VA i Tafuna, ma ua tumau fo'i le agaga, e ao ina fa'atino galuega lelei uma lava.

O le polokalama ua fa'ataoto mai mo Oketopa 1, 2018 ua amata lava i le ulufale atu i le Maota o le VA i Tafuna ma lesitala lou suafa.

O lo ua i ai fo'i le tele o laulau ua mae'a fa'atutuina mo nisi o auaunaga e mafai ona e fa'afesiligia a latou auaunaga ma tautua eseese ina ia fa'amalamalama atili ai oe, pe afai ua e lagona e aoga ia te oe le latou auaunaga.

11 FANAU AOGA KOLISI ULUFALE I LE PTK

E to'asefulu ma le tasi le fanau a'oga ua ausia togi maualuluga i a latou mataupu e tauave i le Kolisi Tu'ufa'atasi o Amerika Samoa, ma ua ma’ea le sauniga i le vaiaso na te'a ina ia fa'aulufale ai i latou i le Phi Theta Kappa, po'o le sosaiete a fanau ua ausia togi maualuluga.

O i latou nei e aofia ai: Marqueritta Tanuvasa, Shirley Crichton, Emla Solaita, Samantha Amosa, Vaipuna Tunoa, Epifania Petelo, Gloria Tuiasosopo, Fuianiga Tupua, Elisapeta Sagote, Faith Loia ma Mayanne Faatau.