Tala I Vaifanua

FA'AAOGA E LEOLEO DPS - ALA O FANAFANAGA I LE US ARMY RESERVE:

O le vasega o leoleo uma a le Matagaluega o le Puipuiga o le Saogalemu Lautele, ua mae'a fa'atulaga nei e mafai ona latou fa'aaogaina le vaega mo Fanafanaga a le  US Army Reserve lea e aofia i le faletele o lo ua aiaia nei lona fausia i totonu o le Lotoa a le US Army Reserve i Tafuna lava.

O lea vaega o le atufalega a le US Army Reserve ua amata fausia i le va o le VA Clinic ma le South pacific Academy i Tafuna. Ua mae'a fo'i ona fa'asalalauina fa'alaua'itele i le mamalu lautele o le atunu'u i ona vaega eseese, ina ia nofouta i lea faletele ua fausia, atoa ai ma lona aoga i le tulaga tau a'oa'oina o fanafanaga, po'o le a'otauina o tomai tau fanafana a fitafita fa'aagaaga a le Vaega Au. Peita'i o lea ua fa'ailoa mai fo'i, o le a aoga tele fo'i lea itu o koleniga fa'apitoa e a'oa'o ai ma Leoleo o le tatou malo, i lea lava tomai.

E lua lelei fonotaga fa'alaua'itele sa usuia i le tatou US Army Reserve Center mo ni manatu fa'aalia e tusa o lenei mataupu, o le aso Lulu ma le aso Tofi i afiafi ta'itasi sa fa'atautaia ai.

"O le 'auga lava o le fa'amoemoe, ia lava tapena leoleo ma fitafita fa'aagaaga uma mo tiute fa'afitafita i taimi uma e vala'auina ai. Ua iloga lelei e tagata uma, e aoga lea ituaiga o tomai, a'o fa'atino tiute o le puipuiga o le saogalemu lautele, ae maise fo'i o tofiga fa'afitafita tiute."

O nisi sa fa'aalia o latou taofi e tusa o lea mataupu, sa latou aumaia lava le mau tau le saogalemu atoa ai ma le ituaiga malomaloa o le papa o fana i le taimi e faia ai nei ituaiga o fa'ata'ita'iga ma a'oa'o le atamai e fana, ia le gata i le o lo'o ia faaaogaina le fana, ae o le mamalu lautele fo'i o fegasoloa'i i lea vaifanua, a'o faia fa'ata'ita'iga nei.

O le susuga Command Executive Officer Jon Lee, sa ia fa'ailoa mai, "O le a toe taliu mai i le latou i le amataga o le tausaga a sau, ma ua fa'atulaga fo'i e i latou ni folasaga aoga tele mo le vasega o fanau a'oga i Tafuna High ma le South Pacific Academy ina ia nofouta i latou i nei mea ua fa'ailoa mai ai fanoga o le atunu'u lautele."

O se tasi o mea sili ua ia fa'ailoa mai, "O le a aoga tele fo'i lea nofoaga fa'apitoa mo a'oa'oga tau fanafana ma tomai uma fa'aletulafono o le fa'aaogaina o fana, e le gata i fitafita uma ua agava'a mo le US Army Reserve ae maise fo'i, o Leoleo uma i le Matagaluega o le Puipuiga o le Saogalemu Lautele, lea ua amatalia ona feoa'i solo ua fa'aauupegaina."

EEO [AVANOA TUTUSA TAGATA FAIGALUEGA] FA'APA'AGA MA 2 SOSAITE I AM SAMOA:

 Ua matauina nei ua tula'i mai le Sosaiete a le "Pae ma le Auli" ae maise fo'i o le American Samoa Alliance Against Domestic & Sexual Violence, ina ia latou tutu fa'atasi e una'ia le mau mo le "Avanoa Tutusa mo Tagata Faigaluega.

O lenei mau o lo'o ua mae'a iinei le tama'ita'i o Ms Glory Gervacio Saure,  Fa'atonu mai le Ofisa o le Avanoa Tutusa mo Tagata Faigaluega  Honolulu Hawaii, lea ua fa'aalia mai o le a fa'atautaia ni ana semina e tusa o lea tulaga i le tatou nei malo.

Ua fa'ailoa mai o le a faia nei semina uma e le tama'ita'i fa'atonu mai Honolulu, ae e mana'omia ona fa'afofogaina e le mamalu lautele o le atunu'u, ae maise fo'i i latou o lo'o a'afia o latou soifua faigaluega i ni fa'aletonu fa'apenei.

Ua mae'a ona lomia fo'i i le tatou Nusipepa Samoa News le tala tau se Kamupani ua mae'a totogia taimi uma sa nofo aitalafu ai i ana tagata faigaluega, ma o nisi nei o mataupu e tatau lava ona va'ai toto'a i ai le vasega o tagata faigaluega. O lo'o i ai a outou aia tatau e fesiligia ai o outou totogi ma tulafono fo'i tau le kamupani po'o sa'o ona latou totogia oe e tusa ai ma vala uma o le fa'afaigaluegaina o tagata.

Ua fa'ailoa mai fo'i, i lana lea malaga mai o le a fa'aavanoa ai lona taimi e talanoa ai i le Asosi a le Aufaipisinisi,   Chamber of Commerce, i le afiafi o le aso Lulu o le vaiaso nei.

Ua fa'ailoa mai fo'i e Ms Mata'utia o le AS Alliance Against Domestic & Sexual Violence, "Ua fa'atulaga le aso Lua mo fonotaga fa'apitoa e tolu i le aso e tasi. Semina muamua e amata i le 8:00 se'ia pa'ia le 11:30am; soso'o lea ma le 1-3:00 i le aoauli ma le semina mulimuli i le 4-6:30pm. E le mailoa pe tutusa uma mataupu e fa'asoa mai ai le tama'ita'i lea mai le EEO pe eseese, ae o le a i ai avanoa mo fa'afesili mai le mamalu lautele i nei vaega uma e tolu. Afio mai ma fa'afofoga, ma fa'ailoa fo'i sou mana'oga tau lou totogi, itula faigaluega, ma isi lava mataupu uma o lo'o e fia manino ai, tau lou soifua ma avanoa faigaluega."

O se mea lelei lava le avanoa lea e amatalia i le 4:00 i le afiafi se'ia paia le 6:30, aua ua iloga mai e aoga lea mo tagata faigaluega uma, ua o'o i le taimi e manava ai galuega.

I le aso tofi lea ua fa'atulaga ai le fonotaga ma le American Samoa Legal Aid poo le Loia mo le Mamalu Lautele ina ia fa'amanino nisi vala o le tulafono pe fesiligia fo'i nisi fautuaga fa'aletulafono mo le silafia a le mamalu lautele. O le taimi o lea fonotaga o le 11:00 i le 12:00 i le aoauli.

O lo ua i ai fo'i se avanoa lelei mo nei sosaiete e lua e talanoa vavalalata ai i lea tama'ita'i fa'atonu o le EEO mai Honolulu, e tusa ai o latou lava mataupu i le toe aso o Fonotaga, aso Tofi i le itula e 4-6pm, ae o isi uma avanoa ua agatonu mo le fa'afofoga a le mamalu lautele.

AUAI LE BLUESKY I GALUEGA FA'AMAMA MO LE FA'ATAUA A LE LALOLAGI:

O lo ua mae'a ona faia le sao matagofie o le Bluesky Communications i le Aso Fa'amama a le Lalolagi, lea e fa'atulaga e ao ina fa'atino i le aso 15 Setema i tausaga ta'itasi.

O le sao o le Bluesky Communications sa faia lava i lea i vaipanoa atoa o lo'o siomia e le Laufou Shopping Center, ma o le tele fo'i o nei otaota na aoina, ua aofia ai ma le Muli sikaleti, o tapa'a ua mae'a ona ulaina ae tia'i loa ma le muli sikaleti i lalo.

Ua fa'ailoa mai e tusa ma le 150 atunu'u ua aotelega i lenei galuega fa'amama ia Setema 15, i tausaga ta'itasi, ma ua fiafia tele le Bluesky e avea i latou ma sao o Amerika Samoa e amata mea lelei ai i lea fo'i ituaiga o galuega aoga mo le lautele.

Ua fa'ailoa mai e tusa ma le 100 kalone o otaota e ao ina tia'ia i lapisi na aoina e le aufaigaluega a le Bluesky i lea aso, ma ua fa'ailoa mai e i latou, "E sili ona tele le mulisikaleti nai se isi lava ituaiga otaota na pikia i lea aso." O isi ituaiga otaota e aofia ai ma ipu una sa inumia ai kofe ma atigiapa inu e pei lava ona masani ai, ae maise fo'i o taga pepa i'ila o chips eseese.

O le tama'ita'i o lo'o fa'auluulu i ai lea galuega lelei a le Bluesky, Nerelle Que, o ia lea ua avea ma ta'ita'i o le World's Cleanup team mai Amerika Samoa, ua ia vala'au mai i le mamalu lautele o Kamupani eseese ma fa'alapotopotoga fa'apea ma sosaiete eseese ina ia so'otau'au i lea fa'amoemoe lelei, ia fa'amama le lalolagi o tatou o ola ai i le tatou nei fo'i malo.

O Steve Jewett ma Jim Sharman o le "World Clean Up Day" ua mae'a fa'atasia ma Que i lenei fa'amoemoe lelei, ma le lagona maualuga, o le a talisapaia lea mau aoga e le to'atele o tatou tagatanu'u ma isi sosaiete ma fa'alapotopotoga uma o fa'atasi i ai.

"Ona o a'u o se sui ua mae'a fa'atauaina la'u taumafaiga e fa'amama le si'omaga, ua ou fiafia ua fa'afaigaluega a'u e le Bluesky ma ua auai fo'i lea Kamupani i le taumafaiga a le lalolagi atoa ina ia fa'amama lo tatou siosiomaga, ae maise le atunu'u ua matou tautuaina nei. Fa'amama ma fa'amatagofie lo tatou siomaga!" O sana lea tautinoga.

O le World Cleanup Day, ua fa'ailoa mai, o i latou nei ua mae'a fa'amamaina le tusa ma le 80% o otaota uma o lo'o feavea'ia e peau o le sami fa'apea ma matafaga o lo'o taula uma i ai le tele o tafeaga ma otaota o lo'o aoina mai ai.

Ua fa'ailoa mai fo'i, "O le amataga o lenei taumafaiga, ia mautu le fa'amoemoe i nisi o fa'alapotopotoga ma Sosaiete e auai ma fai so latou sao mo le ituaiga o galuega lelei mo le aotelega o le talafatai o le tatou atunu'u. Ia faia sou sao aoga, ma ia ulufale e auai i lea fo'i taumafaiga lelei mo Amerika Samoa atoa."

TOETOE A MOU ATU "FAGOTAGA" I AMERIKA SAMOA:

O Ali'i Faipisinisi Hyong Park ma Frank Barron, o nisi ia o faipisinisi tau fagotaga sa faia o la'ua sao e saunoa fa'apitoa ai i tulaga tau fagotaga Longliner i le tatou atunu'u, ma sa la'ua fa'atepa le Sosiaete a Faipisinisi i Amerika Samoa, i le tulaga moni ua i ai nei lea fo'i ituaiga o tautua ma ona fa'aletonu ua a'afia ai i le atunu'u.

"Ua toetoe ina mou atu le vasega o fagotaga mai va'a i'a perseiners ma le fagotaga afaafa loloa i va'a i'a mai Amerika Samoa." O se tala ma'oti lea sa fa'aalia e nei ali'i i le fonotaga lea i le afiafi o le aso Tofi o le vaiaso na te'a nei.

O le susuga Frank Barron, o le Pule SIli o le Purse Seiner Services sa ia fa'ailoa mai nisi o mea e iloga ai lea fa'aiuga ua ia saunoa i ai.

"Muamua lava o le tau o le i'a e fagotaina i Ogasami o le tatou malo lea ua mafua ai ona le toe gafatia e va'a fagota ona fa'aauau latou pisinisi."

Ua ia mua'i fa'aalia. "O le totogi o le laisene e fagota ai iinei ua si'itia mai le $100,000. i le tasuaga i le $1.8miliona i nisi lava o taimi. Peita'i o le fagota ai i nisi o malo fa'aatumotu o le Pasefika ua fa'atulaga mai i le $15,000. i le aso e tasi, ae le mailoa pe maua se i'a i aso uma?"

"E le gata i lea ae ua si'itia fo'i sala e totogia i le US Coast Guard latou, mai le $1.5miliona i le $2.5 miliona, e leai se tagata fai pisinisi o Va'afagota na te gafatia na ituaiga sala." O se faamatalaga fa'aauau lea a Barron.

Peita'i o se tala sili ona maofa ai le vasega o le au faipisinisi, "O lo ua tu'uina mai e le Bumble Bee i le vasega o va'a fagota uma e totogi mai ai e i latou le $165. i le tone o le i'a e fa'atau atu ia i latou i Fiti i le taimi nei, ae matua leai lava ni sala ma aiaiga a le US Coast Guard i lea fo'i malo."

I le folasaga a le ali'i Fai Va'a fagota Korea Mr Park sa ia fa'ailoa mai ai, "E tusa ma le 350 va'a fagota Korea sa i ai mai le amataga, ae o le taimi nei, ua matua fuamoa a'ato lava. Leai ma se va'a ua toe ulufale mai ma sasa'a latou uta i'a.  E leai se tagata fai va'a fagota e fia ulufale mai, ae mautinoa e i ai le suesuega a le US Coast Guard e ono sala ai i latou i le tele o lena vaega tupe ua fa'ailoa i luga $2.5miliona."

"O le tele o va'a i'a sa masani ona tautuaina i tatou i Amerika Samoa nei i le i'a, ua fa'alaiseneina nei mo Apia Samoa ma Fiti." O se isi lea o vaega fa'ai'u o le tautalaga a Mr. Park.

Peita'i, ua fa'ailoa e le ali'i o Barron,  "Pe afai e le toe i ai se i'a e fa'aulufaleina mai i le tatou Kamupani I'a i Satala a le Star Kist Samoa, o lona uiga e leai se isi mea e tatau ona faia e i latou le pulega o le kamupani I'a, vaea tagata faigaluega, ae a fita na'ua, o le tapunia loa o le kamupani I'a ma o se tala moni lea e ao ina nofouta i ai le malo ma tagata uma. Ua na'o se tala po'o a fea e tupu ai? Ae le toe i ai, pe tupu ea?"

I lea lava fo'i fonotaga ua maea fa'atumuina ai nisi o nofoa sa avanoa o le Komiti Fa'afoe a le Sosaiete a le Au Faipisinisi, "Ua tofia nei Ta'afano Joe Tavale, Tasi Scanlan, Louisa Kuea ma Mike Gebauer."