Tala I Vaifanua

SAILIGA SIAMUPINI SOFTBALL A TAMAITAI AOGA MAUALULUGA

O le ta’aloga faitaulia o le sailiga siamupini o le Softball League Aoga Maualuluga na fetaui ai le au malosi a le Cougars mai Fa’asao Malisi ma le Wildcats mai Nuuuli VocTech High i le afiafi ananafi.

O lenei se tausaga ese i le taumafai mai a le Nuuuli VocTech lea e ta’ita’i mai e le tama’ita’i faia’oga o Elena Esau Lefiti, ma ua iloga lava fo’i le tula’i mai o le taumafaiga ia ua toele uma ai isi ‘au malolosi a Tafuna i le vaiaso na te’a, ae taumafai mai so latou avanoa e saili siamupini ai i lenei tausaga.

E ui ina sa matua tuu i ai le mafai a lea ‘au a le Wildcats ae ua malosi lava le puipui mai a le Cougars i le latou manumalo i se’e i lea ta’aloga faitaulia. O le i’uga o le ta’aloga lea, e 7 fa’atini a le Cougars mai Fa’asao Malisi, ae na’o le lua fa’atini a le Nuuuli VocTech High.

Mai le amataga, sa mua’i tatao ai lava e le Cougars a latou fa’atini e lima, ona oso mai lea o le Wildcats ma latou maua fa’atini e lua. Toe soso’o mai le isi tataga e le’i tau ‘ai uma au e lua, se’ia oo lava i le tataga mulimuli ae toe maua loa le isi lua fa’atini a Fa’asao Malisi ma ua maua ai latou ‘ai aofai o le ta’aloga atoa e 7.

Peita’i o le Nuuuli VocTech, e le’i toe tau ‘ai lava i latou ina ua ma’ea fa’amau le lua ‘ai mai le amataga, ma ua maua ai lava ‘ai o le filigamaea i le malae o Tony Solaita.

Fa’amalo i ‘au e lua, o lo’o a’aia lava le aga’i i luma o le taumafai a le Voctech i lenei tausaga, ae fa’aalia e Elenoah le latou faia’oga, “Fa’afetai i le fesoasoani malosi lava a Louis Solaita sa ia faia a’oa’oga mo i matou fa’atasi ai faia’oga ma le ‘au na fili mai a le a’oga matata eseese i lenei tausaga. Atonu o lea tausaga, ua tatou gafatia ona aumai le talita o le Manumalo i le tatou Laumua.”

O le Cougars ua ono ai lenei o tausaga soso’o o tumau ai pea le siamupini o le Softball a tama’ita’i aoga maualuluga.

AVANOA FAIGALUEGA FANAU POLOKALAMA O LE WIOA

Ua tatala avanoa  mo talosaga mai fanau talavou mai le 14 tausaga e oo i le 24 tausaga le matutua, o lo’o saili ni avanoa faigaluega ai i le malo O le matagaluega o Tagata Faigaluega a le malo, DHR Employment and Training Division lea ua latou fa’alauiloaina maia lenei avanoa i le vaitau ole taumafanafana e afua ia Iuni 2017.

O le polokalama lenei e fuafua e fesoasoani i fanau a aiga e maulalo le tamaoaiga, ina ia fesoasoani fo’i le faigaluega o le fanau, i le tamaoaiga tausi o le aiga.

Ua fa’atulaga e le DHR i a’oga maualuluga taitasi aso e lesitalaina ai i latou e fia auai i le WIOA:

• 20 Mati e o’o i le aso 21 Mati,  mo aoga maualuluga a Leone ma Fa’asao Malisi i le Ofisa autu i le EOB po’o le Maota o le Malo i Utulei.

• Fagaitua High ma Kanana Fou High ia Mati 22- 24.

• Mati 25 ua fa’aavanoa mo so’o se isi mai so’o se a’oga i le teritori.

• Tafuna High ma Iakiina Academy ia Mati 27-28 i le Ofisa autu o le DHR i le Maota o le Malo i Utulei.

• Samoana High ma Nuuuli Vocational Technical High ia Mati 29-30 i le Ofsia autu lava i le EOB. Utulei.

• Manumalo Baptist Academy ma South Pacific Academy ia Mati 31, i le ofisa DHR i Utulei.

O le aso Toonai, 1 Aperila, o le toe aso lea e talia ai talosaga mai so’o se isi i le Ofisa Autu DHR i le Maota o le Malo i Utulei mai le 9am se’ia pa’ia le 4:00 i le afiafi.

Ua fa’atulaga fo’i le aso o Manu’a i lenei polokalama ia Mati 20-24  i Ta’u, ae o le fanau i Ofu ma Olosega, ua fa’ailoa mai o le a fa’alauiloa mai lona aso e patino i ai lea auaunaga. Mo le fanau fo’i i Manu’atele  o le tuatusi emeli e mafai ona e talosaga atu ai: Registration@Manu’aHigh School. Mo se fesili valaau Ms Foga Gaoa 677-5901.

Mo se fesili i lenei polokalama valaau le DHR i le 633-4485.

FANAU FA’AU’U MAI FORT JACKSON - U.S ARMY

O nisi o fanau ua fa’amanuia taumafaiga i koleniga fa’apitoa a le US Army i Fort Jackson, South Carolina, ua fa’aalia lo latou fiafia ma ua fa’aosofia ai fo’i le agaga fa’afetai i matua ma aiga ona ua au le taumafaiga a le fanau.

O i latou e aofia ai le tama’ita’i talavou o PVT2 Taunu’u Maria Sefo, mai Leone ma o ona matua o Asoiva ma Frances Sefo o le auaiga o le tofa Salave’a.  I lona tupuga mai o lana Ekalesia o le LDS i Leone, o ana a’oa’oga i le Leone Midkiff Elementary ae fa’au’u i le Leone High i le 2016.

Na au ona togi e ulufale ai i le US Army ma manuia taumafaiga i le pasia o koleniga fa’apitoa a le BCT, ma ua fa’au’u ai ma ana uo mamae sa latou ulu fa’atasi i le US Army i le aso, Mati 16, 2017.

O isi alo o le atunu’u o latou fa’atasi: Bernice Si’ulagi Leupolu Toluao o Pavaiai, Sina Danielson Tauti ma le Drill Sgt Tuitasi.

Faaalia fo’i le agaga fa’afetai o le tina o Frances Sefo ona ua gafatia e si ana tama lenei la’asaga muamua o ana koleniga fa’amiliteri, “E le o ni teine e fai fe’au mamafa i tatou aiga, ae o lenei ua ta va’ai atu i le fita o nei ituaiga o koleniga, se fa’afetai ua latou gafatia, fa’afetai ai i le Atua, ona ua manuia le taumafaiga.”