Tala I Vaifanua

LAULAUAFONO FOU - EFKAS PASIA MA FA'AU'U I LE FONOTELE 2018

I le toe sauniga e fa'amae'a ai galuega uma o le Fonotele 2018, ma fa'apa'ia ai tofiga fou o le Laulauafono 2018-2020, ae maise ua fa'au'u ai fo'i ma fa'afeagaiga fa'au'u i lenei tauaofiaga a le fonotele a le Ekalesia Fa’apotopotoga Kerisiano i Amerika Samoa (EFKAS).

I le laulauafono fou ua tutula'i nei e aofia ai le Taitaifono Rev. Nafatali Faleali'i, o le sui sa Sui Taitaifono i le nofoaiga 2016-2018. O le Sui Taitaifono ua fa'ato'a toe filifilia ma ua fa'apa'iaina fo'i o le susuga Dr. Rev. Leatulagi Fa'alevao, lea o lo'o tausi Ekalesia i le afio'aga o Amouli.

O le Failautusi tofia ma ua fa'apa'iaina fo'i mo lenei vaitausaga ua tula'i mai ai Rev. Elder Fa'aeteete Saifoloi.

Peita'i o le tofiga Teutupe a le EFKAS, ua toe filifilia ai fo'i le tina Tiakono mai Pago Pago, Fiasili Puni Haleck.

I le toe sauniga i le aso Sa na te'a nei e tapunia aloa'ia ai le Fonotele 2018 sa ta'ita'ia lea e le susuga Rev. Elder Fiti Aofia lea o lo'o tausi ekalesia i le afio'aga o Aoa, Amerika Samoa. Peita'i o le sauniga mamalu sa fa'apa'iaina ai Fa'afeagaiga fou a le EFKAS na ta'ita'ia lea e le le Faife'au Toeaina mai Taputimu EFKAS, Elder Rev. Tautalatasi, ma sa ia faia fo'i se upu apoapoa'i mo auauna fou tausi ekalesia ua fa'au'uina.

FAIFEAU PENISIONE EFKAS - MALOLO MANUMALO MAI LE GALUEGA EFKAS

O le vasega o faife'au ua atoa le 70 tausaga o le soifua, ae ua fa'amalolo manumalo mai o latou tofiga tausi ekalesia a le Ekalesia Fa’apotopotoga Kerisiano i Amerika Samoa (EFKAS), e to'a ono i latou ua ausia lea tulaga i lenei tausaga ma ua fa'amavae aloa'ia i ai le Fonotele i le latou sao iloga i le tautuaina o le Upu a le Atua i afio'aga ma tiute i tofiga sa tutula'i ai i latou i le aotelega e silia ma le 20, 30 ma le 40 tausaga o le tautua matavela.

O i latou e to'aono e aofia ai:

• Rev. Elder Eveni Mamoe ma le Faletua o Leumete, ua atoa le 31 tausaga o le tautua ma e penisione nei i laua o lo'o galulue punoua'i i le Ekalesia i Ma'ama'a i  Tafuna, Amerika Samoa. O le laua auaunaga na amatalia mai i le tausaga e 1987 - se'ia o'o mai i le 2018 ae ua atoa fo'i le 70 tausaga o le Faife'au.

• O le susuga Rev. Faletoi Uso ma le Faletua o Violina ua atoa lelei le 46 tausaga o le la'ua tautua i le Ekalesia Fa'apotopotoga Kerisiano i Amerika Samoa i Vailoatai, Amerika Samoa. Na amatalia le la'ua auaunaga fa'afaife'au i le Ekalesia mai le tausaga e 1972 se'ia o'o mai i le 2018, ae atoa loa fo'i ma le 70 tausaga o Faletoi Uso.

• O le susuga le Faife'au, El Cid Fa'asese ma le Faletua o Tofi T. Mamea ua atoa fo'i le 30 tausaga o le auaunaga i le EFKAS ma sa mua'i avea i la'ua ma fa'afeagaiga i le Ekalesia i Fort Ord, Congregational Christian Church, mai le amataga 1980 se'ia o'o i le tausaga e 1998. Ona si'itia lea o i la'ua mai le tausaga e 1998 - 2018, lea ua atoa nei i ai le 70 tausaga o le susuga le Faife'au ia El Cid Fa'asese Mamea, a'o galulue ai i le EFKAS i Sunnyvale, Kalefonia i Amerika.

• O le susuga Faife'au Samoa Ekepati ma le Faletua o Ness Ameperosa Panama ua atoa fo'i le 27 tausaga o le tautua i le EFKAS, na amata mai le tausaga e 1991 se'ia o'o mai i le 2018. O le amataga o le la'ua tautua sa avea ai i la'ua ma le faletua o Helena Onosa'i Panama [maliu] i le tausaga 1991-2003 i Fagaitua, ona si'itia lea i Ekalesia i Amerika mai le tausaga 2004-2018 ma le faletua o Ness Ameperosa Panama, ma ua atoa ai fo'i le 70 tausaga e penisione ai le susuga le Faife'au Samoa Ekepati Panama.

• O le fa'afeagaiga o Dr. Rev. Fatuati Ta'ape ma le faletua o Doreen Ameperosa Auau ua atoa lelei fo'i le 37 tausaga o le tautua i le Ekalesia Fa'apotopotoga Kerisiano i Amerika Samoa, ma sa amata mai le tautua i le tausaga e 1981 se'ia o'o mai i le tausaga e 2018 i le Ekalesia Emanuelu Congregational Christian Chirch. Ua atoa nei fo'i le 70 tausaga o le ali'i Faife'au Samoa Dr. Fatuati Ta'ape Auau.

• O le fa'afeagaiga o Rev. Fiatupu ma le Faletua o Taimua Tavai ua atoa le 36 tausaga o le tautua i le EFKAS, ma sa amata mai le auaunaga i Samoa, ona soloa'i mai ai lea ma avea ma Faife'au i le EFKAS i Aasu, Amerika Samoa. Peita'i ua atoa fo'i le 70 tausaga o le Faife'au Samoa Fiatupu Tavai ae ua o'o le auaunaga i se tasi o lala o le EFKAS i Amerika.

O i latou nei sa matua patino i ai se saunoaga fa'afetai a le Ta'ita'i Rev. Elder Fiti Aofia i lea sauniga mamalu, aua e le o manatu i latou ina ia tu'ua le galuega, ae ona o aiaiga ua mae'a pasia e le fonotele ua fa'amalolo manumalo ai so'o se auauna a le Atua i le Galuega e ausia le 70 tausaga a'o galulue pea i le tofi.

"Ua le tu'u i le oti le galuega, ae fa'afetai, ua faia le pule a le Ekalesia, ae le o loto ia o Ekalesia o lo'o outou tausia, po'o so outou finagalo fa'aalia. O le ala lea o le fa'asinasinaina o la outou tautua, aua ua au, ao i ai pea lava le malosi. Atonu o outou fo'i o le a avea ma ni faufautua lelei mo ekalesia o le a outou galulue mai ai, ma tapua'i ai i le Atua soifua,” o se toe upu fa'amanuia lea a le ta'ita'i Rev. Elder Fiti Aofia.