Tala I Vaifanua

ASIASI SUI NATIONAL ASSEMBLY OF STATES COUNCIL OF ARTS:

O lenei vaiaso na asia mai ai e le sui iloga o le Council of ARTS a le Iunaite Setete le tatou Matagaluega o Tu ma Aga & Galuega Alofilima i Amerika Samoa, le tama'ita'i o Ms Pam Breaux mai Uosigitine DC.

Sa mafai ona ia molimauina le galuega o lo'o ua fa'agasolo nei mo le Fale Mata'aga fou, o nisi fo'i o tatou measina o lo'o fa'aalia i totonu o le maota tuai o lo'o fa'atautaia mai ai le tatou lea matagaluega ma latou galuega.

Na i ai fo'i la sona taimi aoga tele na asia ai ma maimoa i le polokalama mo le fanau talavou lea o lo'o fa'atautaia i le TAOA i Pago Pago, ma sa galulue feso'ota'i fo'i le Fa'atonu o le TAOA Evelyn Satele ma le tama'ita'i Fa'atonu o le Humanities & Arts Lauagaia Mary Taufete'e.

O se mea lelei sa va'aia e Ms. Pam Breaux aua o lo'o ia va'aia le a'oa'oina o fanau talavou e le vasega o matua matutua i galuega alofilima, ua faigata ona toe maua e le fanau se avanoa lelei i o latou aiga, e iloa ai ona gaosia, pe fa'aaogaina.

"Ua matua matagofie le ala ua fa'aaogaina e le tou matagaluega ina ia fa'aofi ai le atamai i le gaosiga o galuega taulima fa'asamoa i o outou alo, o faia'oga sili nei ona agava'a, ua soso'o ai fo'i le atamai i tu ma aga i le fanau talavou, aua o matua matutua nei o lo'o nofo uma ma le sosia o le aganu'u." O sana tala lea ua fa'aalia ai lona fiafia tele i le faiga o lo ua fa'aauau ai ona fa'ao'aina e le tupulaga matutua le augatupulaga faia'e o Amerika Samoa.

O lenei polokalama e maea lelei ia Iulai 22, 2018, ae o se mea sili, ua mae'a maimoaina e lenei sui iloga mai fafo.

O lea aso sa o'o ane ai fo'i ma le tama'ita'i o Reggie Meredith mo le tusiga o ata o siapo, le taina i Upeti Samoa mo elei ma le taina o fa'atagata o so'o se ituaiga o mamanu Samoa, ae maise o isi galuega taulima uma o lo'o gaosia ma a'oa'o i le fanau e tagata matutua i le TAOA.

PERESETENE FOU EKALESIA METOTISI-REV. FAULALO PA'AGA O NUUULI

Ua toe tula'i mai se tama fanau a Amerika Samoa i le tofi Peresetene o le Ekalesia Metotisi e tusa o le iugafono a le Koneferenisi lea e tauaofia i Foga'a, Fale'ula i Samoa.

O le susuga le Faife'au Rev. Faulalo Leti Pa'aga ma le Faletua o Fa'alelei, o alo na fofoa a'e fo'i i le Ekalesia Metotisi i Nuuuli lo la'ua soifua auauna ai i le galuega a lea Atua i lea fo'i tovine.

O le fa'alua ai lenei ona tutula'i se tasi o alo o Amerika Samoa i lenei tofi Taiulu o le Ekalesia Metotisi i Samoa ma Amerika Samoa. O le ulua'i sui na tutula'i i lea tofiga o le susuga le Faife'au Rev. Taeao Tauau'u ma le faletua, lea sa soifua a'e i FItiuta ma Leloaloa ma sa tautua i le tofi peresetene i le tausaga e 1969-1971. E  vala'auina fo'i o ia i lea tofiga o lo'o galulue i Leloaloa.

O Rev. Faulalo ma le faletua na mua'i avea ma faife'au tausi ekalesia i Aukilani i Niu SIla i le tausaga e 1983 ma e lima tausaga o le la'ua lea auaunaga, ona si'itia mai ai lea galulue i South City i San Francisco, Kalefonia mo le isi lima tausaga.

Ona soso'o lea ma le tofia e galulue i Oceanside i Kalefonia mo le valu tausaga a'o le'i si'itia i galulue i Salt Lake Hawaii mo le fitu tausaga. Toe si'itia fo'i lea i le Ekalesia i Nanakuli Hawaii mo le isi fitu tausaga o la'ua va'aia ai lea Ekalesia Metotisi iina.

O le fa'aiuga o le la'ua lea auaunaga tausi ekalesia ae vala'auina e avea ma Failautusi Aoao a le Ekalesia i le tausaga e 2015 ma o lo'o ua tofia nei e avea ma Peresetene, o lo'o ia tau'avea lava lea tofiga.

Peita'i o se tasi fo'i o Fa'afeagaiga Taulagi a le Ekaelsia Metotisi i Nuuuli, Rev. Dr Eteuati Tuioti, ua tofia nei e avea ma Failautusi Aoao a le Ekalesia i lana laulauatofi i le Koneferenisi lenei.

O Rev. Dr Tuioti, o se tama fanau mai Salelologa Savaii, na avea fo'i ma faifeau a Nuuuli se'ia o'o mai i le tausaga 2016 ona si'itia ai lea e avea ma Faife'au i San Francisco, Kalefonia. A'o le'i filifilia e avea ma Faife'au i Nuuuli sa pulea e ia le Aoga Fa'afaife'au a le Metotisi i Piula Theological College.

I le amataga o le tausaga fou lenei o tofiga, o le a tutulai ai nei sui e to'alua i o la'ua tofiga fou e fa'atautaia le Ekalesia Metotisi a Samoa ma Amerika Samoa. E i ai lala malolosi o lenei ekalesia o lo'o fa'atula'ia i le tele o a'ai ma setete o Amerika, Niu Sila ma Ausetalia fo'i.

FA'ATAUTAIA POLOKALAMA O LE TU'UAGA A LE DYWA

Ua amatalia nei le Polokalama a le Matagaluega a Tina ma Tupulaga Talavou (DYWA) mo fanau i le tu'uaga umi lenei o a'oga. Ua faia lava i le Fale Ta'alo i Pago Pago lea polokalama, ae aofia ai kosi e tolu: Aoaoga o le Masini Komipiuta; A'oa'oaga o le Elei ma Kosi Fa'amalosi i Ta'aloga e aofia ai le Volleyball; Futsol ma le Wrestling.

O lenei polokalama ua fa'atautaia mo le na'o le tolu vaiaso ma ua va'aia fo'i le agaga fiafia o le fanau.

O le aotelega o le fanau o lo'o tauavea kosi nei e latalata i le to'aselau i latou mai le 7 tausaga se'ia o'o atu i le 15 tausaga le matutua.

Mo le fa'atautaiga o nei kosi ua fa'apa'aga ai fo'i le DYWA ma le Asosi Volleyball i le atunu’u ASVF. Ua malaga atu ai le susuga Iose Afu ma le 'aufili a tama talavou U19 Amerika Samoa, e avea ma faia'oga.

O le kosi Komipiuta ua fa'atautaia lava lea e sui faia'oga o lo'o ua fa'afaigaluegaina e le DYWA, Maria Seumalo mo le Kosi i le itula 8:30 i le 10:00 i le taeao lava. Kosi lona lua e amatalia lea i le itula e 10:30 i le 12:00 i le aoauli, e faia'oga ai le tama'ita'i o Jane Sefo.

I le vaiaso lona lua o le a tumau pea le a'oa'oga mo Komipiuta a le fanau a'oga i ona vasega e lua, ae fa'aopoopo loa ma le a'oa'oga mo le Elei e fa'atautaia lea e le susuga Collins o le DYWA. A'o le itu i ta'aloga e a'otau ai le fanau o le a fa'atautaia ai le ta'aloga Soka po'o le Futsol. O lea ua fa'apa'aga ai le DYWA ma le AS-FIFA Asosi a le Au Soka i le tatou atunu'u.

Vaiaso lona tolu e fa'atautaia uma lava polokalama e tolu, Elei Komipiuta ae suia mai le ta'aloga i le Wrestling lea e fa'atautaia e le susuga Zena Iese o le DYWA.

Ona o lenei polokalama e fa'atautaia mo le tolu vaiaso, o lea ua faia ai le latou polokalama fa'apitoa e tufatufa ai tusi pasi ma avatu ai fo'i se latou fa'afetai tele i Asosi eseese sa latou fa'apa'aga.