Tala I Vaifanua

STEPHANIE L. SAGAPOLUTELE FLOOR - MAUA LANA I'A LAPO'A:

Ona o le tama'ita'i o Stephanie Floor na ia mauaina le togisilia i le vasega fa'aiuaso a Leone High 2018, na lautogia ai mo le meaalofa fa'apitoa mao le susuga Cpt. William Andy Thomas, lea e ona le va'a fagota "Harley Rose" mo sana malaga maimoa i le gataifale o Amerika Samoa.

I le malaga lea a le tama'ita'i o Stephanie sa ia fa'amasani ai e fagota e fa'aaogaina ai laina fagota a lea ali'i kapeteni ma lona Sa fagota. E tusa ma le itula talu ona tu'ua le tatou Uafu tele ma aga'i atu le tafaoga maimoa a i latou ae 'aina le laina a le tama'ita'i ma ua maua ai lana i'a Wahoo e 34 pauna le mamafa.

Ona ua tulata fo'i i le vaitau e malaga ese atu ai lenei Au Ta'a'alo a tatou fanau tama'ita'i talavou e tauva i le Youth Olympics ia Oketopa 2018, o lea ua fa'ailoa mai ai fo'i e le susuga le Faia'oga o lea 'au a latou fuafuaga fa'ataoto a'o le'i tu'ua le atunu'u ia Aukuso 2018.

E le gata i lea, o lo ua fa'ailoa mai fo'i ma latou taumafaiga e sailia ia lava lo latou pasese ma tapenaga aua lea fa'amoemoe. "I le taimi nei, i le tatou 'au lea e lua ta'amilosaga Beach Handball o le a auai atu i ai le fanau, e tapena atoatoa ai mo le fa'amoemoe e tauva i le Youth Olympics ia Oketopa i Argentina. Afai fo'i o le a matou malaga ese atu mo le ulua'i ta'amilosaga lea i Los Angeles, o le a le toe fo'i mai, ae fa'aauau atu ai loa ona malaga sa'o i Argentina mo le Youth Olympics lea." O se tala lea a Carl Floor, Peresetene o le Handball i Amerika Samoa ma o le faia'oga fo'i i lea fa'agatama.

Ua mafuli fo'i le Beach Handball Team ma le Asosi ina ia faia le latou sailiga tupe mo lea fa'amoemoe e afua lea i se Raiothon e faia ia Iulai 14, 2018. Fa'atalosaga ai le mamalu o le atunu'u ina ia foa'i mo le fa'amoemoe o lea vasega o le fanau a le atunu'u e malaga atu mo se 'ai o le tatou atunu'u i le Youth Olympics.

"O se taimafaiga lava lea ia lelei se matou 'ai i le ta'amilosaga a le Youth Olympics ua matou milo fa'atasi ai i le ta'amilosaga lea i Los Angeles, e fuafua i ai se matou taumafaiga mo Argentina." O se tala lea a Floor.

A uma lea i Los Angeles ona malaga lea o i latou i Niu Ioka ma nonofo ai mo a latou ta'aloga ma le Westpoint Beah Handball Team, e lua latou ta'aloga faitaulia ua mae'a fa'atulaga iina, ona fa'ato'a malaga sa'o ai loa i latou i Argentina. "O le mafuaga o lo'u manatu e ao ina matou o i Niu Ioka, ona e tutusa lelei taimi a Niu Ioka ma Argentina. E fa'afaigofie ai ona fa'amasani matou teine ta'a'alo uma i le taimi a lea atunu'u matou te ta'a'alo ai i le ta'amilosaga a le Youth Olympics. O le ala lea o le le toe fo'i mai i Samoa, ae fa'aauau atu ai loa i Niu Ioka ma ta'a'alo ai, e pei lava o lo'o koleni fa'apitoa ai, ma tapena ai mo le ta'amilosaga i Argentina." O se toe fa'ailoa mai lea a Floor.

O latou pasese mo le malaga atu i Argentina ua totogia sa'o mai lea e le Youth Olympics Committee, ma ua fa'ailoa mai fo'i ua mae'a fa'ailoa mai e le ASNOC le latou meaalofa mo lea taumafaiga e $2,000.

"O le matou taumafaiga ina ia malaga lava le 'au a tama'ita'i Beach Handball, o lo'o ua tu'u atu i talosaga a le mamalu o le atunu'u ina ia fa'amanuiaina ai le taumafaiga, o le tapua'iga e taua. Ua le gata i lea, ae ua fa'atalosagaina e faia le latou toe taumafaiga e saili ai se seleni fa'aopoopo i le 'aiga fa'apitoa e faia i le Maliu Mai Beach Resort ia Iulai 27, 2018. Fa'amoemoe o le a sapaia lea tulaga e le mamalu lautele o pisinisi ma tagata uma e o'o atu i ai se fa'atalosaga vala'aulia."

17 ALI'I TINEI MU 'AS NATIONAL PARK' - MO GALUEGA TINEI AFI I KALEFONIA:

Ua mae'a tapena ma a'otauina le to'a 17 o aloali'i o Amerika Samoa lea e galulue i le Laufanua Fa'asao o Amerika Samoa ma ua fa'atulaga e malaga ese atu i le aso 17 Iulai, 2018 ina ia faigaluega e tineia le afi tele o lo'o sasao solo i Vaomatua Fa'asao o  le setete o Kalefonia.

I le fa'amatalaga aloa'ia mai le ta'ita'i o le aumalaga le susuga Anthony Wyberski, sa ia fa'ailoa ai, "O le matou aumalaga e tasi lava le nofoaga lea e malaga uma i ai, o Redding California, o i'ina o le a fa'ato'a vaevaeina ai i matou i nofoaga eseese e tineia ai le afi, o lona uiga e le o fa'atasi uma i matou i se vaega e tasi o le vaomatua o lo'o sasao ai le afi, ae mae'a loa matou fa'atasiga i Redding, ona fa'ato'a iloa lea o mea tonu e aga'i i ai le tagata latou e galue ai."

O le to'aiva o lenei aumalaga, o sui sa malaga muamua, o nisi o le fa'alua ai nei ona malaga, ae o nisi o le fa'atolu ai lenei ona malaga e galulue i fafo.

O nisi fo'i o e na malaga muamua, ua maua ai avanoa tumau e faigaluega ai loa i fafo i lenei lava faiva ma ua le toe fo'i mai.

Peita'i o nisi ua nonofo na'o le ta'i ono masina e galulue ai ma toe taliu mai i le tatou atunu'u e galulue ai, ma o lea fo'i ua toe maua avanoa e toe malaga ai mo ia lava faiva.

Fa'ailoa mai e Ronald Ameperosa o Nuuuli, "O le lelei lava o na avanoa, e mo le tagata faigaluega e le'i faia sona aiga, peita'i o i latou e fai aiga, e uma loa le konekarate lea ua ofo ai, o le toe fo'i mai lava i aiga e filifili ai."

O le susuga le ali'i Pule o le National Park, Superintendent Scott Burch, sa ia fa'ailoa mai, "Ua nofo sauni alo nei o Amerika Samoa i lo latou faiva. Ae ua masani fo'i i latou i tu ma aga a o latou aiga, e talosia ai o latou faiva i le Atua o le manuia, ina ia fa'amanuia i o latou faiva i le vao."

O le afioga le Faipule i le Konekeresi a le Malo Tele, Aumua Amata sa ia vala'auina fa'apitoa i latou uma nei, sui totoa o alo o Amerika Samoa ua ofo atu mo galuega fa'asao i le vaomaoa o Kalefonia, ina ia latou fa'atasi, avatu fo'i ia i latou sana fa'amalo, ae maise o lana fa'afetai i le tula'i mai e tali le vala'au e auina atu mo lea fa'amoemoe lelei.

"O outou o Toa o Amerika Samoa i lea fo'i faiva, ua vala'auina ma tula'i e alu e fai ma sui o le tatou malo ina ia fesoasoani atu i le pagatia o i ai i galuega foafoa a le Atua i lea fo'i setete. Tau ina ia outou o ma le manuia o le Atua, ia outou fai le faiva ma le fa'amaoni lava ma le mataala. Ia manuteleina o outou faiva! E lamatia le ola, peita'i e fa'amoemoe i le Atua e foa'i le malosi ma le tofa manino ina ia iloa patino le mea e fai. Ta'ita'ia outou e le Ali'i i le saogalemu." O se fa'amalosi lea a lea fo'i fa'atina o le teritori o Amerika Samoa.

O le 'aiga o le aoauli sa sami ai fo'i e le tama'ita'i Faipule i le Konekeresi le latou mafutaga ma le aumalaga ae mise o ta'ita'i fa'alotoifale o le Laufanua Fa'asao, ma lona ofisa mamalu atoa ma nisi sa vala'auina fa'apitoa. O le meaalofa sa taua'aoina e le aumalaga o Tinei Afi mo le Faipule i Uosigitone, o lona Mitiafu lea ua mae'a lolomia ai le aso o le malaga ma le igoa fo'i o le latou galuega fa'atino ua ofo ai nei.

Na taua'aoina fa'apitoa fo'i e le Faipule i le Konekeresi tusi pasi fa'apitoa o le tautua matavela a i latou taito'atasi ua agava'a ai ona o le tula'i e tineia le afi mu saesae i Kalefonia.

O i latou o le a malaga e aofia ai: Anthony Wyberski [Ta'ita'i Malaga; Ronald Ameperosa; Foimai To; Pouono Lomiga; Sanerivi Iopu; Ethan Mauga; Lafaele Suafo'a; Fa'amasino Livi ma Ah Keen Ah See. O i latou ia fa'ato'a o lenei i lea ituaiga o galuega.

Andre Tuiolosega; Emmitt Su'a-Kalio; Alfred Sagaga; Leitufia Ili; Rietchel Atualevao; Isaiah Rea; Elama Fa'atonu maFa'atonu Seafa. O i latou nei ua malaga fa'alua nisi ae fa'atolu foi isi.

I koleniga uma e faia iinei ina ia fa'amasani nei ali'i i le vaomatua ma ona afaina a'o e taumafai e tineia afi o lo'o sasao ai, na fa'atautaia uma lea e le susuga Mino Fialua, o se tasi lava fo'i e faigaluega tumau i le tatou Laufanua Fa'asao i Amerika Samoa nei.

6 TAUSAGA UA AGAVA'A AI FAGAITUA  & TAFUNA HIGH MAI LE WASC:

I le taimi o le 'aiga matagofie na fa'amanatu ai le 50 tausaga o le A'oga Maualuga a Fagaitua, na tula'i ai le susuga le Pule A'oga Ta'ase, ma fa'alauiloa mai nisi o mea na mafai ona ia molimauina o se Pule A'oga i Fagaitua High, ma le taimi fo'i na avea ai o ia ma Faia'oga, ae maise o le Fa'atonu o le Au Football a le Vikings!

I se vaega o lana tautalaga, sa ia fa'afetaia ai matua ma aiga, ae maise le vasega o Faia'oga, le Pulega ma le Aufaigaluega ae maise lava le Sosaiete a Tama ma teine Tuai a Fagaitua i lenei tausaga, ona o le tele o le galuega na tapena ai le Laumua ina ia maua le agava'a mai le WASC e talia ai tusipasi e taua'aoina i le fanau i kolisi ma Iunivesite i fafo atu o le tatou nei malo.

"Ou te fa'afetaia lava lo outou tau'au na tu'uina mai mo le tapenaga, ua iloga ai lo outou alolofa i le Laumua sa tatou utuvai atu ai. O a lava mea ua tatou mafaia ona fa'aleleia, ua tatou faia, ae o lo ua tatou fa'atalitalia nei se iuga mai le WASC, e tusa o la tatou taumafaiga." O sana tala lea.

Peita'i na va'aia le tu o le ali'i pule a'oga ma faitauina se tusi na taua'aoina atu i se tasi o le fanau a'oga i le taimi lava lea a'o faia lana tautalaga. Na ea a'e ia i luga ma ua ia fa'ailoa mai i le potopotoga, "O le taimi lenei, ou te fiafia tele e fa'alauiloa atu, "Ua pasia nei e Fagaitua High le isi 6 tausaga o lona agava'a o se a'oga maualuga i le Iunaite Setete o Amerika."

O le Laumua lenei, ua mae'a suaina fo'i le eleele e pei ona fa'alauiloa e le Kovana Sili Lolo Moliga i lana saunoaga fa'apitoa i le sauniga o le Fa'au'uga 2018 i Fagaitua lava, sa ia fa'ailoa mai ai, "E suaina fo'i le eleele mo le falea'oga fou i le Lotoa lenei, ina ia tautuaina alo ma tatou fanau e gasolo mai i Fagaitua High e saili le atamai lautele i a'oa'oga maualuluga."

O le taeao o le aso Faraile sa fa'atautaia ai lea sauniga mamalu, ma ua mae'a ai fo'i ona fa'ataunu'u lea fuafuaga a le Matagaluega o A'oga ma le Malo mo le a'oga maualuga a Fagaitua.

Ua fa'ailoa mai fo'i ua pasia lelei nei fo'i e Tafuna High le latou agava'a ma ua fa'ailoa mai i se tusi i le tama'ita'i pule a'oga, Mrs Tutuila Tagilau. "E avatu fo'i le fa'afetai tele i le vasega o matua, faia'oga, le aufaigaluega atoa a Tafuna fa'apea le mamalu o sui na fesoasoani tele o matou pa'aga sa galulue malosi ina ia taumafai e toe maua lenei tulaga e le tatou a'oga maualuga. Sili fo'i le fa'afetai i le nofo tatalo a matua ma le vasega o aiga ae maise le fanau a'oga. Fa'amalo atu i lo tatou galulue fa'atasi i mea uma. O le taimi nei ua agava'a ai fo'i i tatou mo le isi 6 tausaga ma o lo ua o'o i tatou i le 2024."

Ua mataituina fo'i nisi o mea e le Komiti fa'afoe lenei a le WASC ina ia mautinoa lava le fa'aauau ai pea ona lelei o le agava'a o Tafuna. O lo'o ua fa'ailoa mai e tatau ona mataituina lea latou fuafuaga fa'ataoto mo a'oa'oga a le fanau a'oga i Tafuna fa'apea fo'i ma togi o le fanau a'oga. Ia galue malosi aga'i i lea fuafuaga fa'ataoto, ona le sasi lava lea o se mea i le toe mautinoa fo'i ona soso'o le fau ma le fau i le taumafaiga a'o le'i o'o mai fo'i le 2024.

Ua totoe nei o Leone High, Fa'asao Malisi High e tatalia le latou fa'ai'uga mai le WASC ae sa asia uma lava nei a'oga ia Me, 2018.