Tala I Vaifanua

MATAGI MALOLOSI LUTIA LE ATUNU'U: PULETINI A LE TEMCO

O lo ua fa'aauau pea lapata'iga o matagi malolosi ua lutia ai le atunu'u talu mai le faaiuga o le vaiaso.

O nei matagi malolosi e o'o lava i le aso Lua Iuni 3, 2018. Ua fa'ailoa mai o le alamatagi ua agi mai i le itu i saute i sasa'e ma o lona malosi e afua mai le 35 i le 40maila i le itula, ma e i ai taimi e to fa'ata'uta'u ai.

Ua lapata'ia le atunu'u, ina ia mautinoa saogalemu o tagata, ae maise  meatotino e afua mai falenofo se'ia o'o lava i ta'avale aua o nei matagi e ono to'ulu ai fo'i ni la'au mai atumauga i luga o alatele, sologa o ma'a tetele ma palapala mai atumauga i auvae mauga lea e uia e alatele mo feoaiga i ta'avale ma pasi. O nisi o nei fa'aletonu, e ono fa'aleagaina ai uaea o eletise.

Ua taofia fo'i feoa'iga o va'a laiti i oga sami o Amerika Samoa, ona o matagi malolosi. O lo'o ua fa'aauau pea ona matau e le TEMCO ma le tatou Ofisa Va'ai Tau le tulaga o i ai nei le tau i le atunu’u.

Pe afai e tutupu ni sologa, lologa ma nisi fa'alavelave le ma'alofia i feoa'iga ma lotoifale o se aiga, fa'afeso'ota'i lea Ofisa i le 699-3800 TEMCO & EOC po'o le vasega o Leoleo i le 633-1111.

TELE OLOA UA SIOKI I FALEOLOA - FAALETONU VA'A LA'U OLOA

Ua toeititi atoa le masina o sioti nisi o oloa e aofia ai aniani, fuala'au 'aina mata, apu, moli, grapes ma kapisi, latisi, susu ma fuamoa lea e auina mai fafo, ma ua fa'ailoa mai e se tasi o ali'i faipisinisi faioloa i le teritori, "O le mafuaga o va'a, ua fa'aletonu le Cap Taputapu i le vasa, ma ua toe afea ai e le va'a lea San Francisco e siaki ai, ma avea ma mea ua le o'o mai ai sapalai o nei oloa mo le mamalu lautele."

O le Cap Taputapu e fa'atautaia e le Hamburg Sud, ma o se tala e fa’apea e le pu'upu'u le taimi e toe fa'aalu e fa'aleleia ma pasia ai le toe malaga mai a lea va’a ma lana uta ua mae'a fa'ae'e i luga, o lea sa toe taliu ai ma lana uta i Oakland Kalefonia, ina ia toe fa'ae'e i le isi va'a e aumaia. O le va'a lea o le "Polynesia" malaga 497. O lea fa'ato'a to'ai taunu'u mai i Amerika Samoa ia Iuni 29, 2018.

E ui la ina ua fa'auia mai le uta o pusa oloa tetele a le Cap Taputapu ma le Polynesia Malaga 497, ae ua toe fa'ailoa mai i le taimi nei, ua mae'a suia le totoga na faaleagaina o le afi o le va'a lea, ma ua mae'a pasia fo'i e toe faimalaga ma fela'ua'i uta i le vasa, ua fa'aauau foi lana tautua.

O lo ua fa'auia mai fo'i le fa'aaliga fa'alaua'itele a le Hamburg Sud ma fa'amalulu mai i le mamalu lautele o le atunu'u fa'apea fo'i le aufaipisinisi ua a'afia a latou fefa'ataua'iga ona o le fa'aletonu tau lea Va'a Oloa.

FA'AMUTA POLOKALAMA BOYS SCOUTS A LE LDS TESEMA 2019

Ua fa'ailoa mai e le susuga Larry Sanitoa, ua amata nei ona sailiilia e i latou nisi fa'alapotopotoga e latou te fa'auia maia le polokalama a le Boy Scouts of America, aua o lea ua taoto i o latou luma le fa'ai'uga a le Ekalesia A Iesu Keriso o le Au Pa'ia o Aso e Gata Ai,[LDS] e le toe fa'atautaia e i latou lea polokalama i le fa'ai'uga o Tesema 2019.

I le faitau aofai o le fanau e masani ona tau'avea lenei ituaiga kosi e tusa ma le 90% o i latou e a'oa'o mai i le Polokalama Sikauti a le LDS.

O le Polokalama a le Sikauti o lo ua a'oa'oina ai tomai eseese i le fanau talavou, ina ia iloa ona soifua i le vaomaoa, iloa ona tula'i o se talavou agava'a ma a'oa'oina lelei i le va ma isi, ae maise o le avea ma talavou tausa'afia ma ola fa'aaloalo.

E i ai fo'i fa'ailoga e maua i lea la'asaga ma lea la'asaga a'o fa'agasolo lau polokalama sikauti, ma ua mafai ona ausia e le fanau a'otau atoatoa i le Sikauti lona fa'ailoga tumati'e o le Aeto, lea e te fa'atautaia ai se galuega fa'atino e aoga mo le mamalu lautele.

Ina ua fesiligia pe aisea ua faia ai se tofa a ta'ita'i o le LDS e taofia le  kosi fa'asikauti, ae fa'ailoa mai e ta'ita'i o lea ekalesia, "O lo'o ua i ai nisi ituaiga polokalama faasolo a le Ekalesia o lea ua mae'a fa'atulaga mo le tupulaga talavou e suia ai lenei taimi sa fa'aalu mo kosi a le sikauti e fa'atautaia tonu i le 2020."

Ua i le tatou malo nei le ta'ita'i o le Boys Scout, Bill Rayl, Fa'atonu o le Field Services a le Aloha Council, ma o lo ua talanoa ma Sanitoa, Taitaifono o le Boys Scouts Council of American Samoa, ma o le a toe fa'ailoa mai se fa'aiuga o le a laua talanoaina ma lea sui mamalu mai Hawaii.

SOFIAS - TAUMAFAIGA E FAIA TUI FA'AILO O LE HIV/AIDS

Tulai mai o le SOFIAS i le vaiaso na te'a nei, ina ia sapaia le taumafaiga a le Matagaluega a le Soifua Maloloina, ia faia tui fa'ailo o le gasegase HIV/AIDS o tagata uma i le teritori.

Na mua'i faia le latou talotaloga i le aso Lua o le vaiaso ua te'a, ma sa mafuli sui totino uma o le Miss Sofias, e auai ina ia fa'ailoa i le mamalu o le atunu'u, o le aso na soso'o ai e faia ai tui fa'ailo o lea gasegase tuga tele, pe a o'o ina maua ai se tasi.

Ua le gata ina latou matua fa'alauiloa atu lea fe'au taua, ina ia tapenapena ai le matagaluega e fa'amaumau a latou fa'amaumauga tonu, ae maise o le taumafaiga fo'i ina ia mautinoa o lo'o faia lo latou tiute tau'ave mo le atunu'u, ia soifua ma le mautinoa tagata uma, o lo'o e soifua maloloina mai lea gasegase.

A le o lena afai o le a maua ane ua afaina oe, ia faia loa togafitiga ina ia fa'aumiumi pea le mafutaga ma lou aiga o e pele ia te oe.

Na latou faia le tele o folasaga matagofie, e fa'aosofia ai le naunau o tagata uma ina ia faia nei Tui mo Su'esu'ega fa'apitoa po'o e gasegase ai i lea ma'i.

O latou folasaga ma lenei galuega fa'ailo, ua latou so'otau'au atu ai i le National HIV/AIDS Testing Day, ma o se tasi lea o fa'anaunauga na saunoa i ai le tama'ita'i o lo'o avea ma Tausala a le SOFIAS 2018-2019 Valentina Faumuina, "Ia faia se suiga tele i le SOFIAS i lenei tausaga ua tula'i mai ai!"