Tala I Vaifanua

SUIGATOFI KALAPU A LE LIONA & FAATAUTO SUI TOTINO FOU

I le fa'atasiga a le Kalapu a le Liona i le fale aiga a le DDW i le afiafi o le aso Faraile na te'a nei, na suia ai tofiga o le Laulauatofi, e tutula'i mai ma galulue e fa'afoe latou poloketi masani e ao ina fa'aauau, ae maise o nisi fo'i o poloketi o le a manatu le Peresetene fou o le a amatalia lana nofoaiga e fa'atula'ia.

O le peresetene fou ua toe tofia ai nei le Liona o Chris King ma ua fa'afa ai lea ona tutula'i o ia i lenei tofi, peita'i, sa ia fa'aalia, "O le tausaga fo'i lenei e tauaofia ai le fonotaga a Kalapu a le Liona mai atunu'u uma o le lalolagi. O lea ua fa'ailoa mai e tauaofia i Milan, Italia. O se lagona e fa'agae'etia ai, ona ua talia le tautua ma auauna i lenei fo'i tausaga, ae i ai nai ona fa'amanuiaga le mafaitaulia fa'apea e avea ma se fiafiaga e o'o atu ai i na atunu'u.

O lana laulauatofi ua mae'a tofia nei e aofia ai Sui Peresetene e to'atolu: Tafaimamao Tupuola; Ty Matyjakowski ma Andrew Burquist. O le failautusi ua tula'i mai ai Ponita Laussen ma le teutupe o Careen Cotton. Taitai o totino uma e tula'i mai ai Mike Sala ma le Lions Tail Twister o Tamatoa Tony Langkilde, o le Fa'alata Liona o Willie Teleso ma ali'i fa'atonutonu e to'afa: Larry Sanitoa, Burg Salanoa, Joey Cummings ma Christa Satele. O lo'o aofia ai lava ma le sao o le tama'ita'i ua fa'ato'a tu'ua le tofiga Peresetene Lisa Tuato'o i lea lava fo'i laulau fou.

O le tama'ita'i sa tau'avea maia le tofiga Peresetene o le Kalapu a le Liona i le 2017-2018 Lisa Tuatoo, na faia fo'i lana saunoaga fa'ai'u o lana nofoaiga ma tufatufaina ai fa'ailoga fa'apitoa sa ia manatu e taua'aoina mo i latou sa tele so latou sao i galuega fa'atautaia a le Liona, atoa ma ana poloketi sa fa'ataunu'uina.

O poloketi sa fa'atauaia e aofia ai le Poloketi o Va'aiga sa va'ava'alua ai i latou ma Foma'i e to'a 20 AMEN mai fafo ma totogia ai va'aiga e latalata i le 1000 mo tagata o Amerika Samoa nei. Sa faia latou fa'ailoga fa'apitoa mo tagata matutua i le TAOA ma le vaiaso fa'apitoa, lea sa latou tapena ai le fa'ailoga ma le tinoitupe mo le Tagata Matua o Amerika Samoa ua iloga lana tautua i le atunu'u, lea sa latou filifilia ai Fofo I.F. Sunia, o se tama matua ua tele ana tusi ua mae'a tusia ma fa'atau atu i le atunu'u ae o nisi fo'i o lo'o fai ma punaoa e fa'avae ai le Gagana Samoa i a'oga i le atunu’u.

O le galuega fa'amama e va'ava'alua ai pea ma le ASEPA, ae maise fo'i o le toe feso'ota'i ma le Koluse Mumu o Amerika Samoa i galuega fesoasoani i le tautuaina o le mamalu lautele o le atunu'u na pagatia i le ‘afa o Gita. O le poloketi mulimuli lava o le latou auai lea e toe fafagu le sao o le Kalapu a le Liona i Polokalama Faitau Tusi, lea ua galulue feso'otai ai ma le Aoelua Fanene Sisters i Nuuuli mo le fa'alautele o lea polokalama i Afonotele ma Alofau. O lo'o so'otau'au ma le Matagaluega o Aoga a le malo i lea lava fa'amoemoe ma ua fa'ao'o ai fo'i lea polokalama taua i a'oga e tele e aofia ai Fagaitua ma Matatula i le falelima i sasa'e.

FA'AILOGA FA'APITOA FANAU FA'AU'U MAI LEONE HIGH

I lenei tausaga ua mae'a fa'alauiloa ai Sikolasipi a le Malo ua taua'aoina i le to'atasi lava o le fanau fa'au'u mai le Laumua o le Liona i Leone. O ia lea o le tama'ita'i o Stephanie Lynn Sagapolutele Floor ma ua fa'atulaga e ulufale atu o ia i le ASCC i le tausaga a'oga o lo'o lumana'i.

O le fa'ailoga fa'apitoa sa tutula'i le sui o le Vasega Fa'au'u Leone High i le tausaga e 1988 ina ia fa'aleoina ma taua'ao, sa saunia ai fa'ailoga mo sui e to'alua i totonu o le Laumua. O i la'ua nei ua toetoe atoa le 30 tausaga o le auaunaga i Leone High i tulaga tau Faia'oga po'o le Pulega fo'i. O le tama'ita'i Pule A'oga Mrs Mata'u A'asa Matai o lo'o avea nei ma Pule A'oga, ma le tama'ita'i  Sui Pule A'oga, Mrs Fuamoa Ta'ai. O la'ua fa'ailoga sa i ai le Plaque ma le meaalofa tupe.

O le fa'ailoga o le Togisilia i le vasega ua mauaina lea e Stephanie Floor, peita'i o le tulaga lua ua maua lea e le to'alua o sui fa'au'u i lenei tausaga: Al Joe Aumua ma Elizabeth Liua Tavaseu Kepaoa.  Fa'ailoga togisilia i le Suega SAT ua maua fo'i e Stephanie Floor.

Fanau sa tautua i le a'oga ma le vasega fa'aiuaso i tofiga sa tutula'i mai ai i le tausaga a'oga 2017-2018: Student Body Officers mo le a'oga na tula'i ai Al Joe Aumua e avea ma Peresetene, a'o le Peresetene o le Vasega Fa'aiuaso na tulai ai le tama'ita'i o Tusisalalau Auva'a lea o lo'o malaga e fa'atauva lana folasaga i le HOSA i Texas i le aso tonu o lona fa'au'uga. O le Miss Taumafai sa tau'avea lea e Tulia Fa'amausili, a'o le Mr Taumafa o lo'o pale ai Tuisauta Pese. O le tausala lalelei a le vasega fa'ai'uaso o le tama'ita'i o Mele Noga ma le Manaia a le vasega fa'au'u 2018 o Malofou Fa'afo'i. I le NHS o lo'o peresetene ai le susuga Tamasipani Fa'afo'i a'o le JROTC o lo'o avea ai le tama'ita'i o Elizabeth Kepaoa ma Ta'itai.