Tala I Vaifanua

MOLIA NI TAMA’ITA’I SE TO’ALUA I LE FA’ATUPU VEVESI

E to’alua ni tama’ita’i na taofia mai e Leoleo mai Pava’ia’i i le vaiaso na te’a nei, ona o tu’uaiga i lo la faaia o ni gaioiga e save’u ai le nonofo filemu o tagata lautele.

O Leinara Fruean, 23 tausaga le matua mai Mapusaga, ma Taeaolelei Talatau, 25 tausaga le matua mai Pava’ia’i, na tutula’i i luma o le fa’amasinoga fa’aitumalo i le vaiaso na te’a nei, ma la teena ai moliaga o le fa’atupu vevesi i nofoaga faitele e pei ona tu’uaia ai i laua e le malo.

O loo tuuaia Fruean i le faatupu vevesi i nofoaga faitele ae o Talatau o loo tuuaia i le gaoi ma le faatupu vevesi i nofoaga faitele.

I le teena ai e i laua ua molia o tu’uaiga a le malo, na faia ai loa le faaiuga a le afioga i le tama’ita’i fa’amasino ia Gwen Tauiliili-Langkilde ina ia tatala i laua i tua e aunoa ma se tupe e totogi, i lalo o tuutuuga e ao ona la usitaia.

O ni isi o ia tuutuuga e aofai ai le fa’asa lea ona la toe taumafai e fa’afeso’ota’i le na a’afia i soo se auala, aua ne’i o la toe solia se tulafono, a ia avea i laua ma tagatanu’u lelei e tausisi i tulafono a le malo.

O le mataupu lenei na tofu atu i le Ofisa o Leoleo i Tafuna, ina ua talosagaina e le Tina na a’afia se fesoasoani mo ia, ina ua taunu’u atu i lona fale ma ia vaaia ai le tele o meatotino ua fa’aleagaina, e aofia ai le talepe e se tagata o le faitoto’a ae tauai solo i fafo o le fale le tele o ana meatotino.

Na taunu’u Leoleo ma maua ai loa le avanoa e talanoa ai ma le Tina na a’afia. A o faia le talanoaga a Leoleo ma le Tina, sa fa’alogoina se tagata o ia lafo ane ni upu palauvale i le Tina na a’afia. Sa tuuaia e le tagata sa valaau ane le Tina na a’afia, fai mai o ia o se fafine pepelo toe ta’a.

Na iloa mulimuli ane e Leoleo, o le tagata sa valaau ane, o ia lea o Fruean, ma e uo ma Talatau. Sa i ai Fruean i le fale a Talatau i le aso na tula’i mai ai le fa’alavelave. O le Tama o Talatau, o ia lea e ana le fale lea o loo mautotogi ai le Tina e ana meatotino sa fa’aleagaina.

Na fa’atonu e Leoleo ia Fruean e tu’u lana gaioiga o loo fai o le laulau vavale ma taumafai e fa’atupu le vevesi, peita’i sa fa’aauau pea ona faia e Fruean ia gaioiga, ma faia ai loa ma le fa’aiuga e taofia fa’apagota o ia ma molia i le fa’atupu vevesi i nofoaga faitele.

Sa fa’aauau pea suesuega a Leoleo, ma maua ai loa le avanoa fesiligia ai Talatau e uiga i lenei mataupu. Na taua e Talatau i Leoleo, o ia sa faia le galuega atoa, e ala i lona kiki o le faitoto’a o le potu o loo mautotogi ai le Tina na a’afia ae faaleaga ana meatotino ma tauai solo i fafo.

Na taua e Talatau i Leoleo lona le fiafia i le Tina na a’afia, i le nonofo fua i le fale a lona Tina ua maliu. Sa ia taua lona le toe mana’o e nonofo lea Tina ma lona aiga i le latou fale. O le mafua’aga lea o lona faia o ia gaioiga i ana meatotino.

Na taua e le Tina na a’afia i Leoleo, ua tusa ma le 2 tausaga talu ona nofo i lea fale, ma ua tele mea lelei ua faia talu ona nofo i le fale, e aofia ai lona totogiina o le pili o le vai ina ua tipi e le ASPA. E oo mai lava i le taimi nei e pei ona taua e le Tina i Leoleo, o lo o fa’aauau pea ona ia totogiina le pili vai faatasi ai ma le totogi o le fale.

ALOFAGIA SEUPULE

O le vaiaso nei lea ua fa’amoemoe le malo e tatau ona latou failaina ai moliaga fa’aopoopo fa’asaga i le ali’i o Alofagia Seupule, e mafua mai i le fa’alavelave lea na tula’i mai i le vaiaso i ona tua atu, lea o loo tu’uaia ai o ia i lona fa’aaoga o se a’upega ma’ai e fa’aoo ai manu’a i se tasi o taule’ale’a.

O le vaiaso i ona tua atu na pu’e fa’apagota ai e Leoleo ia Seupule ma tu’uaia i le moliaga mama o le fa’atupu vevesi i nofoaga faitele, ma le faamoemoe e i ai moliaga faaopoopo faasaga ia te ia, pe afai ae mae’a suesuega a Leoleo o loo fa’agasolo i le taimi nei.

O lenei mataupu na tofu atu i le Ofisa o Leoleo i Fagatogo, ina ua logo e se molimau mai Aua ia Leoleo mo se fesoasoani, fa’asaga i se ali’i na manu’a i se a’upega ma’ai, e mafua mai i se fusuaga sa faia.

Na taunu’u Leoleo ma amata loa le latou suesuega e tusa ai o le fa’alavelave sa tula’i mai. Na taua e le na a’afia i Leoleo e fa’apea, o se feeseeseaiga i lo la va ma le ali’i o Seupule, na mafua ai ona tula’i mai le pisa ma faai’u ai loa i se fusuaga. A o la fusu ma Seupule, na fa’afuase’i ona ia fa’alogoina lona itu taumatau o lona papatua ua maini.

Na te lei masalosalo lava i se mea ua tupu, ae o le mae’a ai o le la fusuaga ma Seupule, ma ua alu fo’i i le atoa Seupule, na fa’ailoa atu ai e nisi o ana uo sa i ai i le taimi o le misa, o ia o loo lavea. Mulimuli ane fa’amaonia le tulaga o lona manu’a, ma mafua ai loa ona vili Leoleo mo se fesoasoani.

Na teena e Seupule ina ua fesiligia o ia e Leoleo, sa ia fa’aaogaina se mea ma’ai e tui ai le na a’afia.

FA’AO’OLIMA SE ALI’I I LONA TO’ALUA

E $400 le tupe lea ua fa’atonu e le Fa’amasinoga Fa’aitumalo se ali’i e 46 tausaga le matua na te totogi, ona fa’atoa mafai lea ona tatala o ia i tua e fa’atali ai lana mataupu lea ua fa’agasolo i le taimi nei, e mafua mai i tu’uaiga o lona fa’aoolima lea i lona to’alua.

O le vevesi na ripotia e le Tama o le fafine i Leoleo, ina ua sulu atu le fafine ma lana fanau e to’atolu i le fale a ona matua mo se fesoasoani, i le mae’a ai lea ona fa’aoolima o lona to’alua ia te ia i le po o le aso Lua o le vaiaso na te’a nei.

Na taua e le fafine i Leoleo, na avea le ita o lona to’alua i le ave fua o tupe e fa’atau ai ula lole mo le fa’auuga o le fanau a lona uso, ae le tu’u le tupe e fa’atau ai mea’ai a lana fanau ma itu na ita ai loa ma fasi o ia.

E le gata na ta tu’i e le ua molia foliga o lona to’alua, ae sa ia kiki fo’i i lona papatua ina ua pau le fafine i lalo. Na sola ese le ua molia mai le fale ina ua ia iloa e vili nei e aiga tuaoi Leoleo.

O ni isi o tuutuuga ua tuuina atu i le ua molia pe afai ae mafai ona tatala o ia i tua, o le fa’asa lea ona ia toe taumafai e fa’afeso’ota’i lona to’alua ma lana fanau, ma ia saili fo’i se isi nofoaga e nofo ai a o fa’agasolo ai lana mataupu.