Tala I Vaifanua

IOSEFA MAUGA - SUIA AMERIKA SAMOA I LE OCEANIA JR OLYMPICS

Ua mae'a taumafaiga na malaga ai le atali'i talavou o Amerika Samoa, Iosefa Mauga, e 17 ona tausaga, mai le Nuuuli VocTech High, e tauva i le Oceania Junior Olympic Athletic Games i Vanuatu.

E na o Iosefa ma lana faiaoga sa malaga i lea i lea fa'agatama, tu'uga tamoe.

O lana tu'uga sa tauva ai le 200 mita ma le 100 mita le mamao. O le aso Tofi i Vanuatu na fa'ato'a tutu'u ai, tusa lea o le aso Lulu ia i tatou iinei. Ae o le aso Lulu na alu ai le savaliga tele e tatala ai lea fa'amoemoe o au ta'a'alo uma sa auai mo le Oceania Youth Athletic Games. E na'o Iosefa lava lana solo fa'atasi ma le tatou agiagia sa ia taulimaina.

"E lagona le fa'atauva'a, ae o le lagona na o'o mai ia te a'u e mamafa, po'o le a se taumafaiga e mafai ona ou faia e fa'aea ai lo'u malo ma ona tagata, na taumafai lava le mea sili ina ua tauva. Peita'i e le'i faigofie, e matua saoasaoa lava fo'i tupulaga sa matou tauva,” o se tala lea a Iosefa i luga o le Facebook e tali ai le fa'afesili i se lagona i lea taimi a'o aga'i mai o ia e to'atasi lava mai Amerika Samoa ma fa'alealea mai le tagavai a Amerika Samoa.

Na fa'ailoa mai e Valusia Talataina, le faia'oga o ta'aloga tamo'e sa malaga ma Iosefa i lenei fa'amoemoe, "E tulaga lima Iosefa i lana tamo'ega, ae le tasi fo'i se tamoega na faia mo tuuga ta'itasi. E ta'i fa ma le ta'i tolu tu'uga sa faia mo le 100mita ma le 200 mita. Ina ua aotelega mai taimi a i latou na tamomo'e i nei tu'uga fa'atauva ua tulaga 11 a Iosefa i le aotelega. O lona uiga ua le maua sona avanoa e umia ai se tatou pine i lenei taumafaiga."

Peita'i sa fa'ailoa mai e Talataina, "e matua lelei lava ma solosolo aga'i i luma le taumafai a Iosefa. O lana taimi mo tu'uga nei na tutu'u ai nei, ua sili atu ai lona saoasaoa nai lo taimi uma sa fa'amauina mai le amataga o ana taumafaiga iina i le tatou Malo. O lona uiga e to'aga pea lava o ia e koleni, ma una'ia fo'i o ia e tauva fa'avaomalo."

"Ou te avatu le fa'amalo i lea alo o le atunu'u i lana taumafaiga, ua lagona fo'i e ia lona naunau e fia faia se sao maoa'e mo lona atunu'u ma ona tagata, ae mo lenei lava taimi, ua mae'a le taumafaiga, ma sa tu'u fo'i i ai lana taumafaiga e gata ai lona malosi ma le iloa. Fa'afetai tapua'i mai le mamalu o matua ma aiga, le a'oga ae maise le tatou Malo atoa. e toe oso fo'i le La, e le muta fo'i le sailiga o manuia."

Ua fa'amoemoe Talataina, o le a toe fa'aulu fo'i Iosefa i le tu'uga tamoe lea e faia i Apia a le YOG ia Setema o lenei tausaga i tu'uga fa'avaomalo.

Ua fa'ailoa mai le agaga fa'afetai o i la'ua na malaga i le Asosi a le Ta'aloga Tu'uga Tamaoe, le ASA Track & Field Sports ona o le lagolagoina fo'i o taumafaiga a Iosefa mo tauvaga e agava'a ai mo sona sao i le Youth Olympics i le tausaga fou.

FA'AAUAU GALUEGA FOAI A NANA'S COMPANIES

O le isi fo'i sao o le Kamupani a Nana's Construction ua mae'a i le vaiaso na te'a nei, o le fa'afouga o le Faleuia i le Fa'asao Marist High ma ua faailoa le agaga fiafia ma le fa'afetai o le pulega a lea a'oga, aua o lo'o taumafai ina ia pasia le latou agava'a e avea ma a'oga maualuga i le Komisi o Kolisi ma A'oga Maualuluga a Amerika.

"O se tasi lenei o foa'i matou fa'afetaia tele, aua e le o faigofie i lenei vaitau le taugata o mea uma e fa'aleleia ai faleta'ele ma faleuia e fanau a'oga. Ua matua felesi ma matagofie mea uma, e pei lava ona va'aia lea tulaga i galuega uma fa'apea e fa'atino e lenei tausiali'i ma le Kamupani o lo'o ia fa'atautaia. Fa'afetai tele manatu i le fanau a'goa ae a taeao o le atunuu, ma so tatou leleiga tau'ave,” o se tala lea a Moseniolo Viane Etuale.

Ua fa'afoua uma lava le faleta'ele o tama ma le itu fo'i o tama'ita'i. Peita'i i le vaitau fo'i o le Sisigafu'a 2018, sa latou galueaina fo'i faleuia i le Malae Ta'alo tele a le Veterans Memorial Stadium i Tafuna.

E le gata i lea sa latou fa'ameafale uma lava le Potu VIP i maefale uma o lo'o aofia ai, ina ia mautu lelei nofoaga e malolo ane i ai malo fa'aaloalogia fa'atasi ai ma latou faleta'ele i lena itu. Ona soso'o mai lea ma le meaalofa sa taulimaina mo le Special Olypics ma fanau uma o Amerika Samoa o lo'o soifua ma afaina tumau i le tino po'o le mafaufau. E $5,000 lea maeaalofa na taua'aoina i le afiafi a tamali'i ina ua mae'a le fa'afiafiaga sa faia i le Gov. Lee Auditorium i Utulei.

E moni o lo'o totogia galuega o lo'o tauofo ma ua manumalo ai i latou e fa'atino, ae o lea se isi mea ua soso'o ai le fau ma le fau e le pulega a lea Kamupani, ua latou foa'i fo'i mo le mamalu o le atunu'u.

MASINA O ME - FA'ASA AI LE ULAULA TAPA'A - ME 2018

O lenei le masina ua fa'atulaga e le Malo tele ma i tatou fo'i o le a fa'ataua ai le fa'asa ona toe ulaula tapa'a so'o se tasi i nofoaga faitele, e aofia ai faleoloa, maketi ma lotoa a a'oga.

Ua fa'atulagaina fo'i le Masina o Me e avea ma "Sa'oloto mai le Ulaula - Amerika Samoa".

O le vaitau o Me 22 ina ia fa'atulaga ai fa'asalalauga i luga o le Leitio, televise ma le Nusipepa i le tatou nei malo. Ia utagia mai, taofi le ulaula tapa'a.

O le vaiaso o Me 29 e faia ai se fonotaga fa'alaua'itele e aofia ai le tele o matagaluega a le malo ma le 'au fa'asalalau ina ia fa'ailoa taofi ma tima'ia i latou i ala e mafai ai ona taofia lou ulaula tapa'a, pe faailoa atu fo'i i le lautele le tulafono ma lau aia tatau e taofia ai le ulaula tapa’a.

O le aso 30 Me, ua fa'atulaga ai se fonotaga i le Faletalimalo o le Tradewinds mai le itula e 9:00 - 2:00 i le aoauli, e timaia ai leoleo o le EOB Maota o le Malo, Leoleo Uafu ma Malae Va'alele, Leoleo falema'i tele i Faga'alu ma isi Falema'i fa'aitumalo e tolu, ae maise o leoleo i a'oga uma lava ma maota tetele i le atunu'u, ia galulue e fa'amalosia tulafono tau i le ulaula tapa’a.

Ae o le aso 31 Me, e patino lea mo le fa'asa ona toe ulaula tapa'a, e ao ina la'eia ai e so'o se tasi le lanu mumu, e faia fo'i le toe a'oa'oga fa'apitoa i le Tradewinds ma le talotaloga i le Malae o Suigaula a le Atuvasa i Utulei e amata i le 6:30am.