Tala I Vaifanua

FONOTAGA PACIFIC ISLANDS HEALTH OFFICERS ASSOCIATION

O lo’o talimalo Amerika Samoa i lenei vaiaso i le fonotaga a le Pacific Islands Health Officers Association (PIHOA). O sui totino o le PIHOA na faimalaga mai fafo, mai isi teritori ma setete of Amerika, o lo’o aofia ai i latou e faia folasaga.

O se tasi o ia Asosi, ASTHOA - American States & Territories Health Officers Association mai le Setete o Washington - o i latou lea ua malosi le u'una'i ina va'ai toto'a mo tagatanu'u o atumotu fa'ateritori o lo'o alaala i o latou eleele ma lo latou togafitiga i so'o se falema'i i totonu o Washington State.

"Ua pasia ia Mati 22, 2018 ma ua fa'atulafonoina i le Setete o Washington se tasi o pili ua matua aoga lava mo tagatanu'u uma o atumotu o lo'o alaala i lo matou setete. Ua tatau ona va'ai toto'a le PIHOA i le fa'aupuga o le pili, ina ia mafai ona fa'aaogaina ma ia fa'autagia e tagata uma o lo'o alaala ai i Washington lea ua silia nei ma le 6,500 o i latou, lona fa'aaogaina a'ia'i aua o lea ua fa'atulafonoina,” o se tala lea a le ali'i Peresetene o le Komiti Fa'afoe o le ASTHOA, Dr. John Wiesman, o ia fo'i o le Failautusi o le Matagaluega o le Soifua Maloloina i le Setete o Washington.

O nisi o mataupu sa fa'aalia e le PIHOA, mai le Komiti Fa'afoe i Hawaii, o ala o fa'atupega o tautua eseese o lo'o nafa ma le Matagaluega o le Soifua Maloloina a le Malo tele, ma ua mafai ona talosagaina ai e atumotu mo fesoasoani.

O lo'o ua fa'ailoa mai ni fa'atupega mo galuega fa'alauiloa ma le tau puipuia o le so'ona to'atele o fanau, ina ia lava fo'i le malosi o tina o le atunu'u, atoa ai ma lelei ma gafatia ona tausia lelei o fanau, ma lava fo'i avanoa mo a'oa'oga.

Ua fa'ailoa fo'i fa'atupega mo le tausiga o i latou ua i ai mana'oga fa'apitoa, polokalama eseese e fa'atutu i le latou soifua laulelei. Ua tele fo'i se vaega o nei folasaga sa fa'amautu atili ai le tulaga o mea taumafa ma lo latou gaosiga fa'apitoa mai i atunu'u i fafo ma o lo'o fa'aulufale mai o ni oloa fa'atau atu.

I'UGA FAAALIGA FA'ASAEANISI A A'OGA I AMERIKA SAMOA

O le fa'aiuga o galuega fa'atino fa'asaeanisi a fanau a'oga mai a'oga tulaga lua ma a'oga maualuluga i le teritori, ua matauina ai le tele o galuega fa'atino mai fanau a'oga i A'oga Tumaoti i le atunu'u ua mautulaga i lenei tausaga.

I le aotelega o galuega faatino mai a'oga tulaga muamua e tusa ma le 179 o galuega na fa'amasinoina, ae sefulu ma le fa vaega sa fa'atulaga i ai le fa'amasinoga e tusa o ituaiga suesuega fa'asaeanitisi sa fa'atino e le fanau.

I le vaega a A'oga Maualuluga, sa fa'aulu e le fanau a'oga le aotelega o galuega fa'atino fa'asaeanisi e 177, ma ua lautogia ai galuega ma ua togisilia le galuega fa'asaeanisi a le a'oga Pacific Horizons. E to'atolu galuega fa'atino sa tapena e tamaiti a'oga mai lea a'oga ua lautogia fa'atasi i le to'alima maualuluga togi, lea e malaga uma mo le tauvaga i Pittsburgh, ia Iuni 2018.

O le a'oga ua tulaga lua o le South Pacific Academy ma le tulaga tolu o Fa'asao Marist High. I lenei tausaga i le va'aiga lautele e tusa o le fa'aaliga lenei, ua matua leai lava ni sui mai a'oga maualuluga a le Malo na ausia le tulaga 1 - 3 i vaega e 14 na tauva ai. Ua matele ina na'o Tafuna High sa iloga mai a latou taumafaiga, ma le tasi lava le avanoa na maua e le a'oga mai le Manu'atele.

Mai a'oga tulaga muamua ua feololo lava taumafaiga a le fanau a'oga i a'oga ale Malo. E na'o le tolu vaega mai le 14 vaega na maua uma e le fanau a'oga mai a'oga a le Malo, ae o isi vaega uma o le tauvaga lea, ua aofia ai le fanau mai a'oga tumaoti ua aofia ai i fa'ailoga lautogia.

Ina ua fesiligia, nisi o pule a'oga, ae ua fa'ailoa mai, "O le to'atele o fanau, ua lutia loa le fa'asologa lelei o a'oga i le ‘afa, ua avea ma mea ua ese o latou mafaufau i le tulaga o le fa'aauau ona mafuli i meaaoga. Lea ua iloga mai nisi o fua o lea tulaga. Peita'i, ua le fua tasi fo'i i le fanau a'oga lea tulaga, e ao fo'i ona toe taga'i lelei faia'oga uma, po'o fai o latou vaega, ia fesoasoani i le fanau e fa'amae'a latou poloketi ma ia malamalama lelei ai."

O le fa'aiuga o ia galuega faatino fa'asaeanisi i aoga maualuluga ua fa'alauiloa mai ina ua mae'a ona faia atoa le tauvaga i vaega uma e 14 na fa'atulaga ai galeuga fa'atino fa'asaeanisi, ona aumaia lea o i latou na lautogia galuega mai le tulaga muamua, ae toe fa'auia i le tu'ufa'atasiga po'o ai e togi silia mai leval ta'itasi sa tauva ai:

Mai le Level K5 - Level 2 - ua togisilia ai Elianna Tapua'i mai le Iakina Academy. Tulaga lua o Alana Joserose mai Manumalo Baptist Academy, tulaga tolu Lawerence Afu mai le St. Theresa Leone.

Mai poloketi a le Level 3-Level 5 ua togisilia John Marcial Mirasol mai le Manumalo Baptist Academy; Tulaga lua Julynn Aitui mai Alataua Lua Elementary ma le tulaga tolu na avea e Lisa Pedro mai le Pacific Horizons.

Mai vasega Level 6- Level 8 i a latou galuega fa'atino ma le toe tauvaga o le togisilia, sa maua ai e Geogina Alofa mai le Manumalo Academy le fa'ailoga muamua, tulaga lua o le poloketi a Kirsten De Lara mai le Manumalo Baptist Academy, ma le tulaga tolu o Sydney Clemens mai le South Pacific Academy.

Mai le tauvaga o poloketi fa'asaeanisi a A'oga Maualuluga na maua ai le togisilia e le tama'ita'i o Gloria Park mai le Pacific Horizons, ae tutusa le to'alua i le fa'ailoga lona lua, lea na tutula'i mai ai Seamus Cleary mai le Pacific Horizons ma le Da In Myung mai le South Pacific Academy, tulaga tolu o le atali'i o Carl Balauro mai le Fa'asao Marist High. Tulaga fa na maua lea e Meida Lin mai le Pacific Horizons ma le tulaga lima na avea lea e Marian S. Rajamohan.