Tala I Vaifanua

FIRST SGT DIAMON OTT - MALO LANA POLOKALAMA FA'AMALOSITINO US ARMY

Ua fa'ailoa e le Vaega a le US Army e talu mai le faigamalo a Peresetene Carter o Amerika, na fa'atulaga ai le fa'amalositino e sailia ai le agava'a o tagata ulufale i le USArmy i le faia lea o push ups ma sit ups mo le lua minute fa'atasi ai ma le tamao'e i le 2 maila ma e tatau ona mae'a lea tamoega a sui ta'itasi i le 15 minute.

Peita'i o lea ua fa'ailoa mai e le ali'i fa'atonu o suesuega auiliili i le malosi, tulaga mata'alia i fa'alagona fa'aletagata soifua ae maise o le tulaga tau fitafita tau ma tapena mo tomai ma le tino malosi atoatoa e fa'atino ai lana puipuigamalu o lona tagata tau, Michael McGuick, "Ua le toe gafatia e lea ituaiga o koleniga le auai i le vaega au i le taimi nei!"

O lea sa toe sailia se polokalama fa'atulaga aga'i i ai koleniga ma ua iloga fo'i e gafatia ona fa'atino ai tiute fa'afitafita.

E to'atele sui na tauva ma fa'ao'o ane a latou fa'atinoga ma aiaiga o koleniga atoa ai ma vaega o le tino e auau i ai ia fa'amalositino po'o le koleniga ua fa'aulu. Ma ua manumalo nei le polokalama na fa'atulaga e le alo o Amerika Samoa, 1st Sgt Diamon Ott.

"Ua matua fa'agae'etia lava le agaga ina ua o'o i le taimi ua fa'atulaga mai ai koleniga fou a le matou Platoon ua a'otauina e tapena ai mo le isi la'asaga o le tautua i le US Army, ae oso mai le igoa o le tama Amerika Samoa e ona le polokalama fou ua fa'amalosi aga'i i ai tino uma o fitafita o le Army, oka na matua fa'amalosia atili ai fo'i ma a'u, ina ia pasia lea ituaiga koleniga e fa'aaoga ai fale fa'amalositino ma fafo fo'i i koleniga i le malae,” o se tala lea a le tama'ita'i o Lehualani Faaati Gillis o lo'o auai i Fort Benning Georgia.

E le o tu'ua lava le koleniga sa sau a'i, ae ua fa'aopoopo nei ma le si'i lea ona ia malolosi atili tauau ma lima ae maise fo'i o vae e fa'aaogaina ai fale si'isi'i po'o Gymnasiums fa'atasi ai ma le isi koleniga e i le a'e maea i fafo i le malae.

E fa'afetaia fo'i e lea alo tama'ita'i o le atunu'u o lo'o malaga i le US Army, le fa'amalosi'au mai a le atunu'u e malaga atu ai le na ia fa'atulagaina lea polokalama fa'amalositino, aua ua tetele ina fai ai tama a satini o kolenia i latou, "O le Polokalama lenei na fau mai e le tama Samoa, e tatau fo'i la ona agava'a uma alo o Samoa i le Vaega Au i ituaiga koleniga nei."

Ua Diamond Ott ua atoa le 37 tausaga o lona soifua. Na mua'i ta'alo o ia i le Soka ma sa iloga ona lelei lana kiki mamao i le tatou 'au soka fa'avaomalo sa avea ai o ia ma se o ali'i ta'alo talavou, a'o le'i ulufale i le US Army.

Ua nonofo nei o ia ma tiute i Fort Killeen, Texas o iina fo'i o lo'o ia fa'atautaia ai lana Fale Fa'amalositino lea sa avea ma avanoa lelei e fa'aulufale mai ai lana polokalama fa'amalositino i totonu o le Militeri.

O ona matua o Mr & Mrs John Ott mai Tafuna, Pago Pago ma Nuuuli. Peita'i ua ia fa'ailoa, "O lo'u igoa, e afua ona fa'aigoa a'u ia ‘Diamond’ ona e fiafia tele si o'u tina i pese e usuina e le ali'i pese lauiloa o Neil Diamond.”

Sa ia fa'ailoa, "O le taimi na ou ulufale ai i le vaega au, sa matele lava koleniga i le push ups, sit ups ma le tamo'ega, peita'i o le polokalama ua fa'auluina ma pasia na ou tapenaina mo i matou uma i lenei tautua, e gafatia ai le tele o isi tiute fa'atino a'o avea ai ma fitafita o taua o so'o se vaega a le vaega au a Amerika."

Talu mai ona tautua ua ia fa'ailoa ai, na auai i vaega au masi'i e tautua mai tafa taua i Afakanisitana i le 2012 ma o iina sa iloa mai ai e ia, e tatau ona taumafai atili i le fa'amalositino ina ia gafatia ai tiute fa'afitafita. Na ia fa'aaogaina loa ona taimi avanoa mai tiute e si'isi'i ai ma ua mafai e ia ona si'i le mamafa e 350 pauna i luga o le nofoa si'isi'i.

Peita'i, e toe taliu mai i lana base sa suia lona mamafa mai le 155pauna i le 180 pauna, ae ua si'itia le mamafa o le si'i i le 520pauna i le deadlift, ae 420 pauna le mamafa o le si'i i le nofoa si'isi'i. I le tamo'e ua le toe atoa se 15 minute i le lua maila, ae ua na'o le 10 minute pe 9 i le tele o taimi.

O lana fa'amalosi i ona uso a fitafita mai Samoa, ua ia fa'ailoa mai ai, "Afai na fa'atulaga e lou uso mai Samoa le polokalama lenei, ua e iloa lelei, e gafatia e le Samoa ona fai! O ai na te faia lea suiga ia te oe, O Oe lava!"

E to'a 135 ali'i ma tama'ita'i fitafita i lana kamupani o ta'ita'ia nei, sa ia fa'ailoa mai, "O i latou uma lava ia, ou te galue malosi lava ina ia avea a'u ma se fa'ata'ita'i lelei mo i latou. Ua fa'asoa uma i ai lo'u iloa e fa'aleleia ai latou tino ma ia agava'a ai i tiute e tapena ta'ito'atasi ai i matou i faiva i tafa o taua po'o taimi uma ia mata'alia.”

Pe afai fia feso'ota'i ia Diamond Ott i le emeli: @diamondcut_fitness.

'FUTIGA LANDFILL' - LAFOA'I AI LAPISI I FUTIGA

Ua i se folasaga a le Sui Ta'ita'i o le ASPA Paul Michael Young, i le fonotaga ma le vasega o Faipisinisi, Chamber of Commerce, "O le agava'a o le Nofoaga e lafoa'i ai Otaota i Futiga i le taimi nei e tusa ma le toe lua tausaga, peita'i, ona o lo'o mua'i fa'amomi lava lapisi i le itiiti e mafai ai ona tanumia fa'ato'a lafoa'i ai, lea ua toe mafai ai ona maua lena umi o fa'aaoga pea lea nofoaga”.

"O se fa'afitauli fita lea o lo'o feagai fo'i ma le ASPA, ina ia mafai ona maua se eleele tele ma le fa'afaigofie ona elia ina ia lafoa'i i ai lapisi, peita'i, e leai se aiga e manatu ina ia lafoa'i atu ni lapisi i se eleele e nonofo ai fo'i i latou. E le faigofie la lea faiva i so'o se taimi e alia'i ai lenei mataupu i talanoaga a ta'ita'i o le ASPA,” o se saunoaga lea a Young.

Na folasia fo'i i lana folasaga le ala o lo'o fa'aitiitia pe fa'amomi ai le tele o le lapisi i le Landfill, ma sa maimoaina e le au faipisinisi, ma sa fa'aalia fo'i i nisi o a latou folasaga e fa'atatau i le Si'omaga ma tapenaga e ao ina va'ai toto'a i ai mo le lumana'i le ASPA.

Mo le tautua, i le Suavai Taumafa, e tusa ma le 50% o Tutuila ua mae'a fa'alauiloa i ai fa'asalalauga fa'alaua'itele ina ia fa'apuna muamua le suavai taumafa ona fa'ato'a inumia ai lea, talu mai le tausaga 2003.

O le mafuaga o le maua o le siama leaga i le suavai taumafa e matele ina afua mai i le suavai o lo'o ta'ia mai i tane mo nu'u e le o fa'atupeina e le ASPA, ae o nisi o le tele o suava o lo'o papa paipa ma ua fa'auia mai ai siama mai le eleele i totonu o le suavai mai paipa a le ASPA. E afua ona liki le suavai lea i fafo mai paipa a le ASPA, ona ua leva tausaga o ta'atitia paipa nei, ua silia ma le 10-15 tausaga talu ona fa'aaogaina i lalo o le eleele, ma le isi, e le'i o'o i ai le suiga o ituaiga paipa PVC, peita'i o nisi afaina ona o le so'oga o Paipa fou ua toe liki mai ai le sauvai i fafo i le palapala.

E $8.9miliona mai le USEPA lea ua fa'atulaga e fa'aaogaina mo le toe soso'oga o galuega e ta'i ai le suavai taumafa i afio'aga uma o le atunu'u e le'i suia o latou paipa u'amea tuai o lo'o fa'aaogaina pea, fa'atasi ai ma le fa'aaogaina mo le toe fausia o nisi fa'atanoa vai tetele, ae maise o le fa'ata'atitia fo'i o pamu vai e mafai ona miti'ia maia le suavai mai le palapala e fa'aaogaina. Ua iloga o Malaeimi le isi nofoaga o le a faia ai se isi o nei galuega tau le suavai taumafa.

E lima nisi o vaieli o le a elia mo le sapalai o le suavai manino taumafa, ae maise ai o le fa'ataoto o se isi tane suavai taumafa mo le atunu'u aua ua fa'ateleina lava fale ma le faitau aofai o le atunu'u.

O lea galuega e ao ina mafai ai ona ave'esea nisi o nei fa'asalalauga e le fa'aaogaina sa'o ai le suavai taumafai, lea o lo'o popole fo'i i ai le mamalu lautele, aua e foliga mai ua tele fa'ama'i e maua ai tagata ona o lea e le mama a'ia'i le suavai taumafa.