Tala I Vaifanua

FA'ATAOTO FUAFUAGA FALE FOU US ARMY RESERVE

O le aso Gafua o le vaiaso a sau, o le a maua ai le avanoa e fa'atalatalanoa ai ma maimoa le mamalu o i latou e fia fesiligia le toe fa'atuina o le isi fale fou o le US Army Reserve i Tafuna e  ao ina fa'aaoga mo le a'otauina o i latou e tautua i le Army Reserve i o  tomai tau Fanafana.

"O le a va'aia ni pusa oloa tetele o le a la'uina atu i totonu o le lotoa a le US Army Reseve i se taimi e le o toe mamao, ma e ao fo'i ona mua'i fa'ailoa atu, ina ne'i matau e nisi ma tu'ufesili nei pusa oloa tetele. Peita'i o totoga ia o le tapenaga mo lea fale fou o le a fausia” o se tala lea a le ali'i Pule Sili o le USAR i Tafuna, MAJ Ulisses Taymes.

I le fa'alauiloga o lea galuega tele, ua fa'ailoa mai ai e mafai ona o'o atu so'o se tasi o lo'o fia malamalama i lea galuega ma lona aoga fo'i i le fa'atasiga ua fuafua e faia ia Tesema 18, 2017 i le lotoa a le Reserve i Tafuna i le itula e 2:00 - 5:00pm. O iina e mafai ona talia uma ai fa'afesili e fia fa'atoai aga'i i le galuega, lona umi e faia ai, ma le aoga fo'i o lea fale i le koleniga fa'apitoa o fitafita Samoa uma o lo'o fia autova'a i le vaega au.

E le gata i lea, ae o le a maua fo'i se avanoa e fa'asoa atu ai lagona ma manatu i se nofoaga lelei e fa'atuina ai lea fale fou, pe afai ua silafia e nisi e le tatau ona fa'atuina i totonu o le lotoa i Tafuna.

FITAFITA AMERIKA SAMOA "US NAVY SAILA O LE 2017!"

O se tasi o alo o Amerika Samoa o lo'o tautua o se Fitafita i le Vaega a le Fuava'a a le US Navy, ua avea ma "Saila o le Tausaga 2017."

O ia o Petty Officer Ist Class Andrew Sagapolutele, o se ali'i o avea ma saila ma e latou te galulue toe fa'aleleia va'a o lo'o folau ai.

Na a'oga ma fa'au'u o ia Marist Fa'asao High ma i Iliili. O ia o se alo e fa'asino ia Abraham ma Tiana Sagapolutele.

O lo'o i ai o ia i luga o le va'a USS San Diego, lea fo'i na taua'aoina ai lona lea fa'ailoga, ma o lo'o malaga i galuega leoleo ma puipuiga fa'amiliteri i le Ogasami US 6th Fleet Operations i le Vasa Metiterani.

SAUNI ASPA FA’AFOU AFI ELETISE I TAFUNA

Ona o le fa'anaunauta'iga o le auaunaga a le ASPA mo le atunu'u e ao ina mautinoa i so'o se taimi e tusa po'o le a lava uiga louloua o le tau, o lea ua tapena ai fo'i le pulega ma le aufaigaluega ina ia fa'atuina ma toe fausia lelei le nofoaga o lo'o fa'atutuina ai afi moli tetele i le latou lotoa i Tafuna.

O le tele o le galuega o le toe fausia lelei atoatoa o lea nofoaga ina ia le toe lagona le malomaloa o afi eletise e aiga tuaoi, ae maise fo'i o le asu uliuli e masani ona vaaia o lo'o sau i fafo mai ona alaasu o afi nei o le a le toe i ai fo'i.

O le fale ma le nofoaga o afi o i ai nei, na fausia mai i le tausaga e 1972. Ua fa'ailoa mai fo'i o le vaega tupe e fausia ai lenei galuega e $1.75 miliona ma o le 90% e faatupe e le FEMA ae o le isi 10% e faatupe e le ASPA.

O le galuega fo'i sa fa'asalalau fa'alaua'itele ina ia tauofo i ai Kamupani falefale mo le 45 aso. Ma ua malo ai le Paramount Builders i lea fo'i galuega. O i latou fo'i ia sa tele se taimi na galulue fa'atasi ai ma Inisinia mai fafo mo le fausaga o le fale ma le lotoa o afi eletise a le ASPA i Satala.

O lo ua fa'amoemoe e amatalia lea galuega i le masina nei lava, Tesema, ma ua fa'atulaga e ao ina fa'atautaia mo le na'o le 6-8 masina ona mae'a lea.

FOA'I ASTCA MO AIGA TELE MANA'OMIA VAITAU KERISIMASI

E tolu ni aiga ua filifili le tatou Pulega o Feso'ota'iga Tau Telefoni [ASTCA] a le tatou Malo e faimeaalofa i ai, ona o le tulaga tau le mana'omia o i ai.

O nei aiga, sa tofu le vaega o le ASTCA ma sao, ina ia saili mai e i latou ni aiga e ao ina faimeaalofa i ai le ASTCA i lenei tausaga.

O lenei foa'i ua fa'aaogaina o se ala e toe faaleleia atili ai le so'otaga a le ASTCA ma le mamalu lautele, ina ia fa'afiafiaina tagata lautele i le latou tautua ma latou fa'aaogaina ai i ala o latou telefoni ma le tautua tau Initeneti.

O aiga na sailia e le ASTCA e agavaa ai mo nei meaalofa, o aiga e ta'ito'atasi tagata faigaluega ae to'atele lona aiga tausi, ma i latou fo'i ua iloga e matua le lava le tamaoaiga e fa'aagaaga mo ni faatauga o meaalofa mo le fanau i le Kerisimasi.

O i latou fo'i ua filifilia e ao ia i latou ona fa'amatala e ala i se tusitusiga, le mafuaga ua piki mai ai le latou aiga mo nei meaalofa taua.

O le igoa o lea polokalama "Operaion Secret Santa po'o le OSS."

O nisi o meaalofa ua aofia i le "SIPILI O LE KERISIMASI" e aofia ai le La'au Kerisimasi ua i ai ma ona teuteuga, ua i ai fo'i ma meaalofa mo tamaiti o mea ta'alo ma pepe ma nai mea'ai suamalie e fa'amatagofie ai. O lo'o ua tapena mai fo'i le Ham, moa ma mea'ai tu'u apa mo le aiga atoa, mo le 'aiga o le Kerisimasi.

LAISENE MSC - TAUTAI-O-SAMOA FISHING ASSOCIATION:

O le fa'aiuga o le masina o Novema 2017 na maua ai le Laisene o le Tautai-o-Samoa Longline & Fishing Association e mafai ai ona fagota e fa'aaogaina ai auala o fagotaga ua fa'atulaga mai ina ia le afaina le tele o le i'a i tatou ogasami i le lumana'i. O nei aiaiga uma ua pasia lelei e i latou ma sa siakia toto'a lea e le Marine Stewardship Council.

Ua fa'ailoa fa'afetai a sui uma o le Tautai-o-Samoa i le StarKist Samoa ona o le latou lagolagosua ina ia maua'a le maketi e fa'atau ane i ai le latou i'a, ma avea ma latou fa'amaumauga taua o le latou fo'i pitola'au i nei tausaga e lua sa saili ai lea laisene.

O lo'o sapaia pea e le StarKist ala o lo'o fagota mai ai le i'a e aoga mo le tu'uapa ma ua fa'amautu atili ai fo'i lo latou agava'a mo le latou laisene ua tamau nei. E le gata i lea, ae ua fa'afetaia fo'i e le Asosi o Au Faifaiva nei le ali'i o Gary Gann i le StarKist lea sa ia suesuea auiliili lo latou agava'a mo le laisene lea ma ua ia pasia leleia fo'i.

"Mai le galulue vavalalata a Gary Gann ma le Star Kist ua mafai ai ona maua lenei avanoa lelei e le matou Asosi o Tautai Faifaiva, ma ua a'oa'oina lelei fo'i i matou i ala uma ma vala o tulafono o fagotaga e ao ina mataituina i taimi uma i le galuega." O se tala lea na fa'ao'o mai a le asosi faifaiva.

"Fa'amalo fo'i i le Western Pacific Council Executive Director Kitty Simmons  ma le aufaigaluega mo latou fa'amalosi mai e taumafai ona pasia lenei laisene ma usitaia uma ala o tulafono tau faigafaiva ina ia manuia fo'i le auaunaga fa'atino. Ua latou fa'auia mai fo'i fa'amaumauga e mafai ona una'ia ai lea taumafaiga, o se isi lea fesoasoani sili ua matou maua ai lenei laisene,” o se latou toe tala fiafia lea.