TALA I VAIFANUA

Pago Pago - AMERIKA SAMOA

FA’AFETAIA E LE ‘AU ‘SOFTBALL’ A AMERIKA SAMOA I LATOU NA LAGOLAGOINA LE LATOU TAUMAFAIGA

E fitu ni ‘au maualuluga i le fa’agatama o le ‘Softball’ a tamaitai, sa faapea ona tauva ma le ‘au ‘softball’ a tamaitai o Amerika Samoa, i le liki a le WBSC (World Baseball Softball Confederation), i le vaega i lalo o le 15 tausaga, na aofia ai ma ‘au e 10 pito i maualuga i le lalolagi atoa.

Ae peitai, sa le’i fa’avaivai ai le ‘au a Amerika Samoa, lea na i le tulaga 64.  O lenei ta’amilosaga sa mafai ona si’itia ai le tulaga o le ta’a’alo a tamaitai mai i Amerika Samoa ma faamautuina ai se fa’avae e mafai ona atili ai ona fa’aleleia atili la latou ta’a’alo, aua nisi ta’amilosaga i le lumanai.

I lalo o le taitaiga a le latou taitai, le susuga ia Leaupepetele Viliafi Fa’apouli, sa ia faaleoina i sana faatalatalanoaga ma le Samoa News, le molimauina o se suiga tele i tamaitai ta’a’alo, aemaise ai o le siitia o le latou tulaga i totonu o lenei fa’agatama, o se tulaga fa’agae’etia lea i lona tagata.

Sa faaleoina e Leaupepetele, lona agaga fa’afetai i le Malo o Amerika Samoa faapea kamupani ma i latou sa lagolagoina la latou taumafaiga, ina ia mafai ona auai le latou ‘au i le taamilosaga i Italia.

Aemaise le kamupani a le ASTCA ma lana Komiti Faafoe, o le Faipule o le Tualauta ia Ben Sauvao, o le kamupani a le McDonald’s Amerika Samoa, o le faletupe a le TBAS, le ofisa a le ASNOC, o le ofisa a le ASVB (American Samoa Visitors Bureau), le faleoloa o le GIAs ma le kamupani a le Tutuila Printing Shop.

ULUA’I ASIASIGA A LE FUAVA’A A FALANI I AMERIKA SAMOA

O le aso 28 o masina na se’i mavae atu, sa fa’afeiloa’ia aloaia ai e le malo o Amerika Samoa ia le va’a o le Teriieroo a Teriierooiterai, mai i le Fuava’a a Falani, i lana faigamalaga faatausala, i le teritori.  Ma sa faapea ona tu’ufa’atasia ai e le alii kapeteni ia Phillippe Dumee ia se faatasiga mo lana auva’a faapea le afioga i le Kovana o Amerika Samoa, Pulaali’i N. Pula ma le faletua, faapea ma le Tausala a Amerika Samoa, o le vaega a le Coast Guard a le Iunaite Setete ma le aufaigaluega a le ofisa o le sui Faipule a Amerika Samoa i le Konekeresi, ia Uifa’atasi Amata.

I lana saunoaga fa’afeiloa’i, sa ta’ua ai e le alii kapeteni, le avea o lenei va’a, i le va o Farani ma le Pasefika ma fa’ailoga o le tu’uto o le latou atunu’u i le Pasefika.

Ma na ia fa’aleoina foi lona agaga fa’afetai i le talia leleia o i latou, i totonu o le teritori.

O lenei va’a, ua fa’aigoaina i se to’oto’o mai Tahiti, o Teriieroo a Teriierooiterai, lea sa ta’ita’ia ia taumafaiga mo le fa’asa’olotoina o Farani ma fesoasoani i isi tagata Tahiti, ina ia tu’usa’olotoina i latou.

Ua toe agai atu nei le va’a i lona nofoaga tumau, i Papeete, Tahiti.

ALOA’IA E AMATA IA LE TOE MATU’U MAI O VAEGATUPE MO POLOKETI A LE OFISA O AOGA

Ua fa’aalia e le sui Faipule o Amerika Samoa ia Uifa’atali Amata le agaga fiafia ma le agaga fa’afetai, ona o se faaiuga lata mai, mai i le Failautusi o A’oa’oga a le Iunaite Setete, o Linda McMahon, e toe fa’amatu’u mai ai ia vaegatupe sa taofia, aua le fa’aauauina o poloketi taua e 14 a  le teritori, lea sa lei mautonu o latou taunu’uga.

E pei ona sa ta’ua e Amata, sa mafai ona aoga sa la’ua feso’ota’iga ma le tamaitai Failautusi, e talosagaina ai le faatinoina o lenei tulaga, faatasi ai ma le lagolagoina o taumafaiga ale Kovana, ae le gata i lea, e momoli atu ai le agaga faafetai i le tamaitai Failautusi, mo le toe fa’amatu’uina mai o vaegatupe a le ARPA.

Ma na ta’ua e Amata lona agaga faafetai i lenei tala fiafia mai i le tamaitai Failautusi ma lona talileleia o le fa’atala’u’ula atu, faapea lona agaga ina ia fa’amuamua ia alo ma fanau a Amerika Samoa.

Sa faapea foi ona tu’uina atu le agaga fa’amalo i le Ofisa o A’oga, faapea le agaga faafetai i le tamaitai Faatonusili ia Maefua Dr. Mary Lauagaia Taufete’e faapea ma faiaoga uma.  Ma sa faapea ona aloa’ia e Amata ia galuega fita a Tish Peau ma Lisa Tuatoo.

O poloketi e 14 ia sa taofia, na aofia ai fale teu oloa a le School Lunch Program, lea o lo’o fausia i tua o le falepuipui i Tafuna, faapea le tele o fale ta’alo mo aoga tulaga muamua, atoa ai ma le toe faaleleia o le fale ta’alo a le aoga maualuga a Tafuna.  Ae le gata i lea, o fale a’oga mo polokalama JROTC i le laumua a THS.