TALA I VAIFANUA

Pago Pago - AMERIKA SAMOA

FILIFILIA LEONARD SEUMANUTAFA E AVEA MA ‘CHIEF OF STAFF’ FOU

O le vaiaso ua tuanai sa faapea ona fa’amavae ai le Afioga ia Taito Ali’itasi Afuola-Mauga mai i le tofiga o le ‘Chief of Staff’, i totonu o le ofisa a le kovana, e pei ona sa ta’ua i se fa’aaliga fa’alaua’itele mai i le Afioga i le Kovana Pulaali’i Nikolao Pula.

Na aofia ai i lea fa’aaliga fa’alauaitele, le agaga fa’afetai a le afioga i le kovana faapea le sui kovana, le afioga ia Pulumataala Ae Ae Jr., i galuega uma sa faia e Taito a’o ia nofoia le tofiga.

E leai se mafua’aga mautu na fa’ailoa mai e le kovana i lana fa’aaliga ia Me 1, 2025, ua fa’amavae ai Taito mai i le tofiga.

Ma o le aso na soso’o ai, Me 2, 2025 sa fa’alauiloa mai ai e le alii kovana, tauala mai i seisi fa’aaliga fa’alauaitele, ia le filifilia o le susuga ia Leonard Seumanutafa, e sui tulaga ia Taito.

Na ta’ua e le afioga Pula ia le atoa o le 30 tausaga o galue Seumanutafa i totonu o le malo, aemaise lava i tofiga fa’aletaitai i totonu o le CJPA (Criminal Justice Planning Agency) lea o lo’o mata’ituina ia vaegatupe mo le tele o polokalama i totonu o le teritori.

Na fa’aalia e le afioga i le kovana lona fa’atuatuaina o le agava’a o Seumanutafa e tauaveina ona tiute fou.

FA’AMAMALUINA VAIASO TAUSIMA’I IA ME 4-10

Na fa’aleoina e le afioga Kovana ia Pulaalii Nikolao Pula lona agaga fiafia i le toe fa’atuina mai o le Asosi Tausima’i a Amerika Samoa (ASNA), i le mae’a ai o sa latou fonotaga ma sui o le asosi, mo le talanoaina o le toe fa’aolaina mai ma le fa’aauauina o la latou auaunaga i le tausiga o le soifua maloloina, i totonu o le teritori.

I se fa’aaliga fa’alauaitele mai i le ofisa a le kovana, sa fa’apea ona aloaia ai e le afioga i le Kovana ia le tele o lu’itele o lo’o feagai ma le asosi, ae o lo’o iai sona talitonuga maumaututu, o le a fesoasoani lenei fonotaga i le tatalaina o le ala e mafai ona fofoina ai nei faafitauli.  

Ua faapea foi ona u’una’ia e le alii kovana ia le Asosi a Tausima’i ina ia fuafua lelei a latou vaegatupe ma polokalama, e fa’amautu ai a latou auaunaga e le gata i a latou totino ae faapea foi le mamalu lautele.

Na faapea foi ona aofia i lenei fonotaga ia le fa’amamaluina o le Vaiaso mo Tausima’i, ia Me 4-10, 2025, ma o le manulauti o lea vaiaso, o le Malosi po o le Mana o Tausima’I, e aloa’ia mai le malosiaga ma le tu’uto e le fa’amaluelueina a tausima’i.

O le aoauli ananafi, sa tatala aloaia ai lenei vaiaso taua mo Tausimai, i se sauniga lotu sa faia i le malumalu a le EFKAS i Faga’alu.

O i latou na aofia i le fonotaga ma le kovana, o le peresetene o le ASNA o Toaga Seumalo, o lona failautusi o Elaine Porotesano, faapea ma le Taitaifono o le Asosi, o Josie Lam Yuen.  Faapea ai ma nisi totino o le Asosi, na aofia ai Simamao Tuato’o, Margaret Sesepasara ma Arizona Ve’ave’a.

TAU SAILI JONATHAN TEDDY VEISA

Na leiloa mai i lona aiga i Fogagogo/Vaitogi, ia Aperila 26, 2025 ia le susuga ia Johnathan Teddy Veisa ma o lo’o fa’aauau ona talosagaina e le Ofisa a Leoleo ia le fesoasoani mai i le mamalu lautele, pe afai o silafia e se tasi se mea o iai lenei alii.

O Veisa e 43 tausaga o lona soifua ma na mulimuli va’aia o ia i Iliili.  Afai e te silafia se mea o iai Veisa po o se faamatalaga foi e mafai ona fesoasoani i le mauaina o ia, ia vala’au ifo Ofisa a Leoleo po o le 911.