TALA I VAIFANUA

Pago Pago - AMERIKA SAMOA

FA’AMANATUINA LE 10 TAUSAGA O LE AUAUNAGA A LE OFISA LOIA -ASLA

O le aso ananafi, Me 1, na atoa ai le 10 tausaga, talu ona tatalaina faitoto’a o le ofisa loia (ASLA-American Samoa Legal Aid), i totonu o Amerika Samoa ma o le aso foi lea o lo’o fa’amanatuina ai le Aso Tulafono Faavaomalo, e aloaia ai le ‘rule of law’.

O le ASLA o se faalapotopotoga e le saili polofiti (nonprofit), o lo’o fesoasoani i le mamalu o le atunu’u e patino i aiga lima vaivai, i mataupu faaletulafono.  Ma i le 10 o tausaga talu ona amataina lenei auaunaga, ua atoa le to’a 9,636 tagata o le atunu’u ua faapea ona o’o iai le fesoasoani a le ASLA.

O le susuga ia Fainu’ulelei Falefatu Ala’ilima-Utu lea o lo’o fa’aauau ona avea ma Faatonusili o le ASLA.  Sa umia e Fainu’ulelei lea tofiga mai i le tausaga e 2015 se’ia o’o mai i le 2020, ae e le’i filifilia o ia e avea ma Loia Sili a le malo o Amerika Samoa, mai i le 2021 se’ia o’o mai i le 2024.  Ae i le masina o Ianuari 2025 sa faapea ona toe avea ai o ia ma Faatonusili a le ASLA.

O le aufaigaluega a lenei ofisa, e aofia ai se loia e to’atasi o lo’o galue ‘part-time’, faatasi ai ma nisi o le aufaigaluega lagolago e to’afa.  O lo’o tau saili e le ASLA ia le fa’afaigaluegaina o nisi loia e faaopoopo i le latou aufaigaluega.  Ae peitai, ona o suiga fou ua faia i fesoasoani feterale, i tulaga o vaegatupe, ua faapea ona fa’afaigata ai ona ausia lea tulaga.

O le ASLA o lo’o fa’afoeina e se Komiti Faafoe, o lo’o galulue e aunoa ma ni totogi, e aofia ai le faletua ia Marian McGuire Ale lea o lo’o avea ma Taitaifono, faatasi ai ma nisi o loia; Kristi Thaxtn ma Nathaniel Savali.  Faapea ma Tafaimamao Tua-Tupuola ma le afioga i le Faipule ia Larry Sanitoa.  

O lo’o lagolago malosi mai ai le alii faufautua ia Chuck Greenfield ma o se tasi o totino sa amataina lenei faapotopotoga.

I le faamanatuina o lenei 10 tausaga, ua faapea ona aloaia ai e le ASLA ia se tasi o a latou totino ua faapea na fa’ilagi lana folauga, o Terrie Harman Bullinger.  

Na fa’aleoina e Fainu’ulelei le agaga fa’afetai ia i latou uma sa mafai ona fesoasoani ma lagolagoina le tuputupu a’e o le ASLA.  Sa ia saunoa e faapea, “Viia le Atua. Fa'afetai mo le tapuaiga Amerika Samoa. O upu a le atunu'u, e le sili le ta'i i lo le tapua'i.”

TATALAINA ULUA’I OFISA A LE FUAVA’A A AMERIKA (U.S. NAVY) I AMERIKA SAMOA

O le vaiaso ua mavae sa faapea ona fa’apotopoto faatasi ai Seila, taitai fa’aleaganu’u, veterni ma aiga o Amerika Samoa, mo le tatalaina aloaia ai le ulua’i ofisa a le vaega’au o le Fuava’a (Navy) a le Iunaite Setete i totonu o le teritori.

O le polokalama o le aso, sa faapea na aofia ai se saunoaga mai i se tasi o taitai o le vaega’au o le Fuava’a, taitai o le malo lotoifale faapea ma se fa’amanuiaga faapitoa mai i se Faafeagaiga.

O le alii ta’ita’i ‘au, Rear Adm. Richard W. Meyer sa pule fa’amalumalu i le sauniga lea sa aofia ai ma le fa’atautoina o ni Seila fou se to’alua.  Sa fa’amanatuina atu e le alii ta’ita’i ‘au i seila fou, le taua o le auauna atu ma ia tu’uina atu foi ni upu fa’ala’ei’au mo i la’ua, ma se fa’amalo i lo la lumana’i fou i totonu o le Navy.

Ua mae’a ona filifilia se tasi o alo Samoa (Navy recruiter) e na te fa’afoeina lenei ofisa fou ma o le a ia galulue faatasi ma a’oga lotoifale, o aiga, faapotopotoga ‘ese’ese, aua le u’una’ia o alo ma fanau, ina ia ulufale atu i totonu o le Navy.

Sa fa’aalia e le susuga ia Faanofoilefagaoalii Alesana (Navy Counselor 1st Class), ia lona agaga fiafia ona ua filifilia o ia e avea ma ulua’i ‘recruiter’ i totonu o Amerika Samoa faapea ai ma le tatalaina o le ulua’i ofisa ‘recruit’ i totonu o le teritori.  Ma na ia ‘viia le Alii’ ona o se avanoa ua mafai ona ia toe fo’i mai, e auauna i ona lava tagatanu’u.