TALA I VAIFANUA

Pago Pago - AMERIKA SAMOA

FA’AAUAU ONA MAUA LAFOGA A LE ATUNU’U

A’o sauni atu le atunu’u mo le fa’amanatuina o le Eseta i le aso Sa a sau nei, ua fa’alauiloa mai e le Ofisa o Tupe ia le fa’amanuiaina o nisi o le atunu’u na failaina a latou lafoga i le va o Fepuari 4 ma Fepuari 6, 2025, i le mauaina o a latou siaki nei.

E ui ina fa’aauau pea ona leai se tala o toe maua mai, i tulaga o lafoga a le atunu’u sa failaina i le tausaga ua mavae.

E tusa ai ma le fa’aaliga mai i le Ofisa o Tupe, o lafoga o le a faapea ona maua e ala i siaki o le a tufatufaina i le ofisa i le EOB, po o totonu o pusa meli, po o le tu’u sa’o i totonu o teugatupe mo i latou na talosagaina lea tulaga.

A’o iai pea le Faigamalo a Lemanu, sa fa’aalia e le Tausitupe o le malo na iai, i se iloiloga a le Senate, lona tufatufaina o lafoga a tagata pe a o latou talosagaina mo fa’alavelave ma isi tulaga faapena, ona o lona alofa i tagata o le atunuu.

O le taimi lea o lo’o fa’aauau pea ona fa’aleoina e tagata o le atunu’u lo latou le fiafia ona o le le’i maua lava o a latou lafoga mo le tausaga 2023.

FA’AFETAIA E PISINISI LAITI IA LE OFISA PAKA MA MALAETA’ALO MO LE TOE AMATAINA O ‘ASO FARAILE MUAMUA O MASINA’

Na fa’aalia e pule o pisinisi laiti lo latou agaga fa’afetai i le Ofisa o Paka ma Malaeta’alo a le malo, mo le toe amataina o le polokalama fa’alemasina, lea o lo’o tatalaina ai avanoa i a latou pisinisi e fa’alauiloa atu ai a latou oloa i tagata o le atunu’u.

O lenei polokalama o lo’o fa’ataunu’uina i ulua’i aso Faraile o masina ta’itasi (First Friday International Street Food Day), ma e auai ai le tele o pisinisi a aiga o lo’o fa’afoeina e ui i le limiti o alagamanuia.  Ma ua avea lenei polokalama ma auala ua mafai ona fa’alauaitele atu ai auaunaga a nei pisinisi, aua le nofo malamalama o tagata o le atunu’u.

Sa toe tatalaina lenei fuafuaga i le masina ua mavae, i le Paka Liona ma sa iai foi ni ta’aloga mo le fanau.  Ae o le fuafuaga lea sa faia i le aso Faraile o le vaiaso ua mavae, e le’i iai ni ta’aloga mo fanau, ae peitai, sa iai se faamoemoega tele i faipisinisi na auai atu iai, o le a fa’aauau ai lenei fuafuaga ma o le mafai ona maua ai e a latou pisinisi, ia se lagolago malosi, e le gata mai i le malo ae faapea foi ia pisinisi tetele a le atunu’u.

O le aso Faraile o le vaiaso ua mavae, na molimauina ai le tele o fale’aiga ‘ese’ese sa faapea ona auai atu ai.  E le gata i taumafa Samoa, ae faapea foi taumafa a isi atunu’u, e pei o Mexico ma Filipaina.  E le gata i lea, sa tele foi nisi taumafa suamalie mo le fofoga taumafa a le atunu’u na faapea ona mauaina i lea afiafi.

O leisi fuafuaga lea ua faamoemoe e faataunu’u ia Me 2, 2025 i le Paka Liona ma o lo’o iai se faamoemoega, o le a le gata i taumafa ae o le a faapea ona iai ma ni fa’afiafiaga.

AVEGA MAMAFA MO FAIFA’ATOAGA ‘AVA TALU ONA FAAMALOSIA LAFOGA 32% A AMERIKA

O lafoga e 32% lea ua fa’amalosia nei e le Iunaite Setete mo oloa mai i Fiti, o le a fa’apea ona a’afia ai tagata faatau ma faifa’atoaga i Amerika, e pei ona ta’ua e se tasi o alii faifa’atoaga o lo’o la’uina ana ‘ava i Amerika.

Sa ta’ua e le faatonusili o le kamupani a le Wakanavu Kava, o Saimon Lomaloma, i sana fa’atalanoaga ma le sui a le RNZ Pasefika, ua tele se popolega ua tula’i mai i lafoga ia ua amata ona fa’amalosia e le faigamalo a Donald Trump, ma o le a tele ina afaina ai faifa’ato’aga.

O le tele o ‘ava ia o lo’o aveina atu i fafo e Fiti, o lo’o aga’i atu i Amerika ma sa masani ona leai se popolega i lafoga e latou te totogi, ae peitai, i le siitia o lafoga mai i le 10% ia Aperila 5, i le 32% ia Aperila 9, ua faapea ona avea ma atugaluga i faifa’atoaga ona o lea o le a pa’u i luga o a latou tagata faatau i Amerika, ia le avega ona o siitaga i tau o le ‘ava.

Na saunoa Lomaloma, i le i’uga o nei suiga fou, o tagata Amerika o le a faapea ona gafa ma le totogia o nei tau fa’aopoopo.  Ae o le a faapea ona lagonaina e faifa’ato’aga i totonu o le latou atunu’u ia nei tulaga faigata.

Ua iai se talitonuga ia Lomaloma o le a liliu ia faifa’atoaga i Fiti o lo’o la’uina atu i fafo ia le ‘ava, i isi motu e la’u mai ai a latou ‘ava, e pei o Vanuatu, Solomona ma Tonga, ona o le a taugofie atu nai lo le ‘ava Fiti.