TALA I VAIFANUA

Pago Pago - AMERIKA SAMOA

MOLIA SE ALII 23 TAUSAGA I LE FAATUPU VEVESI INA UA OVA LE FA’ASUA’AVA

O le vaveao o Novema 9, 2024, na agai atu ai leoleo e tali se valaau mo se fesoasoani, ona o ni alii se to’alua o lo’o fufusu ma faatupu vevesi.

E tusa ai ma faamaumauga a le malo, ina ua taunu’u leoleo, sa faasino ifo e nit agata se to’alua ia le mea o iai le susuga ia Joe To’imalo, lea ua molia i lenei faalavelave.

Ma e o’o atu iai leoleo, o lo’o taumafai nisi e fa’ato’ato’a le alii, ae e foliga mai i lona fa’asuaava, ua na o le ‘e’e ma laulauvavale.  Na va’aia foi e leoleo le tafe mai o le toto i le isu ma le gutu, o le ua molia.

Na taumafai leoleo e tu’u To’imalo i totonu o le taavale, ae peitai, sa manaomia e leoleo se fesoasoani mai ia i latou na iai i lea taimi, e tu’uina ai To’imalo i totonu o le taavale.

Sa fesiligia e leoleo i latou na iai i le nofoaga na tupu ai le faalavelave, pe na iai se isi na lavea, ae sau le tali, e leai nisi na fufusu.

Na ta’ua e le uso laititi a To’imalo, atonu ua mafua ona toto le isu ma le gutu o le ua omlia, ona ua ova le ‘ona ma pa’u ai ma tau lona ulu i lalo.

TO’A 57 TAGATA SAMOA I LUGA O LE LISI O TAGATA TIPOTI MAI AMERIKA

E tusa ai ma se ripoti a le Samoa Observer, ua fa’alauiloa mai ai le iai o se fuafuaga a le vaega fa’amalosi tulafono a le Ofisa o Femalagaiga ma Tiute a le Iunaite Setete, le toe fa’afo’iina mai o ni tagata Samoa se to’a 57, a’o feagai ai le Faigamalo fou a Amerika ma le faataunu’uina o la latou folafolaga, mo le toe fa’afo’iina o tagata mai atunu’u i fafo o lo’o nonofo i totonu o Amerika e aunoa ma ni pepa nofo mau.

O ia tagata Samoa e to’a 57 o lo’o i luga o le lisi, o lo’o iai ma nisi o tagata Pasefika mai i Ausetalia, Niu Sila ma Fiti.

Ina ua fesiligia le susuga i le Minisita o Leoleo ma Falepuipui, ia Faualo Harry Schuster, e tusa ai ma lenei mataupu, sa ia fa’aalia e na o le toe talia mai lava o i latou, o le a faafo’i mai.

E  le na’o Samoa o lo’o a’afia i lenei suiga i tulafono  a le malo tele.

AMATA FAAMALOSIA LE LE TOE FA’AAOGAINA O IPU PEPA

E silia ma le 200 kamupani na aofia ai ma fale’aiga sa faapea ona asia e le aufaigaluega mo le Puipuiga o le Siosiomaga, i le aso 21 ma le 22 o Ianuari, 2025 ma e 28 sala sa faapea ona tufatufaina ai, ona o le solia o le tulafono e fa’asa ai ona toe fa’atauina po o le fa’aaogaina o ipu pepa, se’ia vagana ua iai se fa’atagana.

O Fepuari lea ua faatulagaina ai faamasinoga mo i kamupani ma pisinisi ua faasalaina, ma e amata atu ia sala i le $300.

O le nofoaiga lona 38 a le Fono Faitaulafono sa pasia ai le Tulafono Lautele #38-12, ma sainia e le afioga i le Kovana Lemanu P.S. Mauga ia Fepuari 6, 2024 e avea ma tulafono, ua faasa ai le toe aumaia i totonu o le teritori, o ipu pepa (polystyrene foam containers). 

O le masina o Me 2024 na amata ona fa’amalosia ai lenei tulafono.