TALA I VAIFANUA

Pago Pago - AMERIKA SAMOA

FA'ASALA SE FAATOAGA I FUTIGA I LE FA'AAOGAINA O VAILAAU FAASAINA

O se asiasiga masani a le Ofisa mo le Puipuiga o le Siosiomaga (AS EPA) sa faia ia Tesema 2024, i se fa'ato'aga i Futiga, na maua atu ai le fa'aaogaina e faifa'ato'aga ia ni vailaau faasaina, i a latou fualaau 'aina lea o lo'o fa'atauina i le mamalu lautele, e aofia ai kukama, pi ma isalaelu.

O vailaau e lua ia sa fa'aaogaina e le fa'ato'aga lea, o le 'Complete Insect Killer' ma le 'Traizicide Insect Killer'.  

O le vailaau muamua, e na'o le vao ma autafa o faavae o fale, e mafai ona fa'aaoga ai.  Ae o le vailaau lona lua, e matua'i faasaina lava ona fa'aaoga i fuala'au 'aina e pei o kukama ma pi.

Ina ua mauaina nei vailaau i luga o le fa'ato'aga, sa vave loa ona fautuaina ia le pule o le fa'ato'aga e tusa ai ma le fa'aaoga sese o nei vailaau ma toe faamanatu iai nofoaga tonu e mafai ona fa'aaoga ai.

Sa faapea loa ona fa'asalaina ia le pule o le fa'ato'aga, e tusa ai ma aiaiga o le tulafono.  Faatasi ai ma le lagolagosua ale Ofisa o le Soifua Maloloina, ma lala uma a le AS EPA e gafa ma nei ituaiga mataupu, sa faapea loa ona ave'esea ia vailaau faapea ma fuala'au 'aina uma o le fa'ato'aga ma tia'iina, ina ia le mafai ona toe fa'atauina atu i faleoloa ma le mamalu lautele.  Na faatonuina e le Ofisa o le Soifua Malolona ia le tase'i ina uma i luga o la'au 'aina ua ta'ua e le AS EPA ua a'afia i nei vailaau faasaina sa maua.

Ma ua avea lenei faalavelave na tulaga ua toe faamanatu ma fa'amamafa mai ai e le sui Faatonusili a le AS EPA, ia William Sili, ia faifa'atoaga ma le mamalu lautele, ia le taua o le tausisi i tulafono ma auala e fa'aaoga ai vailaau, aua le saogalemu o le soifua maloloina faapea le siosiomaga.

Na fa'ailoa mai foi e Sili le fa'aauau pea ona galulue faatasi ia le AS EPA ma le DOH ina ia faamautuina le usitaia e faifaatoaga faapea le mamalu lautele, e le gata i tulafono lotoifale ae faapea foi tulafono feterale, i le fa'aaogaina o vailaau.  Ma o so'o se taimi e faamaonia ai le solia o nei tulafono, o le a faapea faasala i latou e fa'aaogaina sese ia vailaau, ina ia faamautuina le saogalemu o le soifua maloloina o tagata lautele faapea le siosiomaga.

Ua fautuaina so'o se tasi e valaau atu i le numera telefoni 633-2304 a le AS EPA mo nisi faamatalaga e uiga i lenei mataupu.

LEAI SE ASO MALOLO IANUARI 9

I se fa'aaliga mai i le Ofisa o Feso'ota'iga a le Kovana, i le aso ananafi, na fa'alauiloa mai ai le fa'aauau pea ona tatalaina ofisa a le malo nei, Ianuari 9, 2024, e ui ina o lo'o malolo uma ofisa feterale a le malo tele.

O lenei aso malolo e pei ona ta'ua i se fa'aaliga faalauaitele mai i le Ofisa a le Peresetene o Amerika, Joe Biden, ua faia e fa'aalia ai le agaga fa'aaloalo ma faamaisega a le atunu'u, i le tu'umalo o se tasi sa avea ma Peresetene o le malo o Amerika, le susuga ia Jimmy Carter.

E ui ina e leai se aso malolo nei, ae peitai, ua fa'alauiloa mai le sisi faavaeloto o tagavai o le malo o Amerika Samoa e fa'aalia ai le fa'aaloalo ma faamaisega i le maliu o le alii Peresetene malolo.

Ua fautuaina ai tagata faigaluega uma o le malo o Amerika Samoa ina ia ripoti uma atu i galuega e pei ona masani ai.

FILIFILIA E LE FAIGAMALO FOU IA FAIIVAE E AVEA MA FAILAUTUSI O MATAUPU TAU SAMOA

I se fa'aaliga faalauaitele mai i le afioga i le Kovana, Pulaalii Nikolao Pula, i le aso ananafi, ua fa'alauiloa mai ai le filifilia o le afioga Faiivae Alexander Godinet, e avea ma Failautusi o le Ofisa o Mataupu tau Samoa.

Ma e tusa ai ma tulafono lotoifale, o le a avea le afioga Faiivae ma ulu o le Ofisa o le Malo Lotoifale.  Faatasi ai ma le lagolago a Kovana Faaleitumalo, o le a ia mataituina le faatautaiga o mataupu i totonu o itumalo ma afioaga taitasi, e tusa ai ma ala o le tulafono.  E le gata i lea, o le a o latou galulue faatasi i le mataituina o so'o se fa'atasiga faaleaganu'u e tusa ai ma tulaga o le tulafono.

O le taimi nei, o lo'o avea le afioga Faiivae ma Kovana Faaleitumalo o le itumalo i Sisifo ma na fa'aalia e le afioga i le Kovana le iai o lona faatuatuaga i le faatinoina e faiivae o tiute ma matafaioi e tatau ai ma lona tofiga faaletaitai.

NISI O TAITAI FOU I OFISA A LE MALO

O nisi o taitai ua faapea ona fa'alauiloa mai e le afioga i le Kovana, Pulaalii Nikolao Pula, ia lona filifilia e mataituina ofisa a le malo, a'o fa'agasolo ona faatalanoaina ma pasiaina mai e le Maota Fono, ia ni taitai tumau, e aofia ai le susuga ia Joseph Faaita, e avea ma sui Faatonusili o le Ofisa o Sailiga ma Lavea'i, ina ua faamavae mai ai ia Saunoa Poto lea sa avea ma Faatonusili.

O le tamaitai ia Arriannna Princess Auva'a, ua faapea ona filifilia e na te ta'ita'ia le tumau ia le Ofisa o Fitafita Tuai (Veterans Affairs), i le tula'i ese o le susuga i le Faatonusili ia Paleafei Harry Pulou. Ma le filifilia o le alii loia ia Tala Uiagalelei e na te mataituina le ofisa a le Loia Sili, ona o lo'o faimalaga atu i atunu'u i fafo ia le sui Faatonusili ia Roy J.D. Hall.

I le Ofisa o le Public Health, ua filifilia ai le faletua ia Elisapeta Ponausuia e avea ma sui Faatonusili e faatalitali ai le toe taliu mai i fanua o Faraitoafa M. Utu lea o lo'o avea ma sui Faatonusili.