TALA I VAIFANUA

Pago Pago - AMERIKA SAMOA 

PESEPESEGA A LE MALO MO ASO FIAFIA O LE KERISIMASI

Ua o’o mai foi i vaitaimi o aso fiafia ma ua nofo tapenapena foi ia le aufaigaluega a le Malo o Amerika Samoa, aua a latou fa’afiafiaga ma pesepesega masani o le Kerisimasi, e pei ona sa faataunu’uina i tauaga ua tuanai.

E pei ona sa fa’alauiloa mai e le taitai o le aufaigaluega a le malo, o le a auai uma ofisa ma matagaluega i le Fa’aaliga Musika lona 47 a le Humanities, lea o le a amataina atu ia Tesema 11 se’ia mae’a ia Tesema 14.

TOE FA’AI’U SE MISA A SE ULUGALII I LE LOKAINA O LE TAMA O LE AIGA

O le aso 15 o Setema, 2024 na tula’i mai ai se faalavelave i le va o se ulugalii, i lo latou fale ma sa ripotia mai ai le laulauvavale solo o le tama o le aiga, agai i lona to’alua po o le tina o le aiga.

Sa faamatalaina e le tina i leoleo, sa le gata i le palauvale solo o le ua molia, ae sa ia faaleagaina nisi o mea totino i totonu o le fale, ma tatu’i ia pa puipui (walls) o le fale.  Ma sa faamata’uina foi o ia e le tama o le aiga, i le oti.  Atoa ai ma lona togiina o le tina o le aiga, i se ipu vai.

E taunu’u atu leoleo, ua sola ese le tama o le aiga mai i le fale.  Ae peitai, na toe maua mulimuli o ia e leoleo ma avefaapagotaina ai loa o ia.

LE TATALAINA VAEGA LONA 4 O TAUAOFIAGA LONA 38 A LE FONO I TOTONU O LE FALE FONO FOU

Ina ua malolo le Fono Faitulafono i le aso Gafua, Setema 30, i le faamae’aina ai o aso e 40 o tauaofiaga lona 38, ae totoe ai na o aso e lima, sa faamalamalama mai e le afioga i le Peresetene o le Senate ia Tuaolo Manaia Fruean, o le mafuaaga o lea malologa, ina ia mafai ai ona nofoia e sui uma o le Fono Faitulafono ia le fale fono fou, ae e le’i tu’ua e nisi o Faipule (i latou ia e le’i faamanuiaina i le palota na se’i mavae atu) ia le Fono Faitulafono.

Sa lagolagoina le saunoaga a le afioga Tuaolo, i se I’ugafono ‘Aufaatasi a le Senate, lea sa pasia e aunoa ma se fa’atu’i’ese.

Ae peitai, e ui ina o le a toe tatalaina tauaofiaga a le Maota Fono i ona aso mulimuli e lima, ia Tesema 3-6, 2024, ua fa’alauiloa mai le le tatalaina i totonu o le fale Fono fou.

Ua mae’a ona fa’alauiloa atu i totino o le Maota Fono, e le’i taitai mae’a ona fausiaina le fale fono fou.

Ma o lea ripoti, sa fa’amaonia e taitai o le Fono, faatasi ai ma le tusiata ia Mark Lively, i sa latou asiasiga i le fale fono fou i le aso Faraile, Novema 15, 2024.

I le malamalama’aga a le Samoa News, ua mafua ona tuai lenei galuega, ona o le tuai mai o va’a la’u oloa ma sapalai e faatino ai le galuega, faatasi ai ma nai faafitauli i le totogiina o pili o le galuega.

E tusa ai ma konakarate o le maliliega i le va o le malo ma Paramount Builders lea o lo’o gafa ma le galuega, o lenei galuega e tatau ona faamae’aina i le aso 30 o Novema, 2024.

Ma o le mafuaaga lea na fuafuaina ai le umusaga o le fale fono fou i le amataga o Tesema.  Ma i le iloiloga mulimuli a le Maota o le Senate, lea na auai atu ai le pule a le Paramount, ia Papalii Laulii Alofa ma le Faatonusili o le DPW, ia Faleosina Voight, sa faamanino atu iai e Tuaolo ia i la’ua, e tusa lava pe le mae’a le fale fono ia Novema, e tatau lava ona tatalaina le fale.

Sa saunoa ai Tuaolo i lea iloiloga, o lenei tauaofiaga lona 38 a le Fono Faitulafono, sa tatau ona tapunia i le aso 4 o Oketopa, ae o lea o le a fai se malologa a le fono i le masina atoa, ina ia mafai ai ona tu’uina atu le avanoa e faamae’aina ai le galuega, ina ia mafai ona fa’ataunu’uina aso o totoe e 5 a le fono faitulafono, i totonu o le fale fou.

Ma na fautuaina ai e Tuaolo ia Papalii, le tatau ona fa’ataunu’uina o le umusaga o le fale fono pe a toe fo’i mai sui faitulafono mai i le latou malologa.

Na talosagaina e Papalii ia seisi iloiloga mo leisi lua vaiaso o soso’o ina ia mafai ona fai mai ai se ripoti i le tulaga o le galuega.

Ae peitai, sa faailoa atu e Tuaolo i sui o le Maota Maualuga, o le a le toe faia seisi iloiloga, ae o le a asiasi atu le komiti i le fale fono fou, ma toe ripoti mai pe ua alagatatau ona tatala le fale ia Novema.

Sa filifilia se komiti a maota e lua, e latou te mataituina le faagasologa o lenei galuega ma toe ripoti mai i taitai o le Fono.

Ma i le masina o Oketopa, sa ripotia mai ai e le komiti le agai i luma o le galuega ma o lo’o latou feso’ota’i pea ma le Paramount i le faagasologa o le galuega.

Ae e le o manino mai i le timi nei, ona o le aso e tatau ona faamaeaina ai le galuega, e pei ona ta’ua i le konakarate, o Novema 30, pe o le a faasala ia le Paramount faapea ma le Lively Architects, ona ua le ausia e i latou le aso faatulafonoina, e tatau ona faamaeaina ai le galuega.