TALA I VAIFANUA

Pago Pago - AMERIKA SAMOA

LE MANUIA TAUMAFAIGA A AMERIKA SAMOA E TALIMALO I ‘PACIFIC MINI GAMES’ 2029

I se ripoti mai i vaega fa’asalalau a le atu Kuki i le faaiuga o le vaiaso, ua fa’alauiloa mai ai le manumalo o le atu Kuki i tausinioga a motu o le Pasefika, mo le taligamalo i ‘Pacific Mini Games’ o le 2029.

Ae i le ripoti a le RNZ, ua ta’ua mai le faamanuiaina o le taumafaiga a le malo o Tonga, e talimalo i Taaloga o le Pasefika i le tausaga e 2031.

O le vaiaso ua mavae, na malaga atu ai le aumalaga a Amerika Samoa, na aofia ai afioga i Senatoa, sui o le malo faapea ta’itai o le ASNOC, i Palau, e fa’aalia le agaga ‘autasi o le teritori a Amerika Samoa, e talimalo i le “Pacific Mini Games 2029”, lea sa tauva ai Amerika Samoa ma le atu Kuki.

Ma o le aso Faraile o le vaiaso na se’i mavae atu, na lauina ai le faaiuga a le Komiti o Ta’aloga a le Pasefika.

O le masina ua tuanai, sa pasia ai e le Senate ia se I’ugafono Aufa’atasi a le Senate, e fa’aalia ai le lagolagoina e le Maota Fono o taumafaiga a le Komiti a Amerika Samoa mo le Olimipeka (ASNOC) faapea ma le Faigamalo, mo le talimalo i le ‘Pacific Mini Games’ i le tausaga e 2029.

I se iloiloga sa soalaupuleina ai lenei pili taufa’aofi, sa saunoa ai le afioga Loa Tauapai mai i le Ofisa o le Kovana e faapea, i le tausaga e 2018, na fa’aulu ai foi se tauofoga a Amerika Samoa, e talimalo i le ‘Pacific Mini Games’ o le 2025, ae peitai, sa le’i fa’amanuiaina lea tumafaiga.

O le motu o Palau lea o le a talimalo i ‘Pacific Mini Games’ i le tausaga fou.

E tusa ai ma se faamatalaga mai i le Faatonusili o le Komiti o Fa’agatama a le Pasefika (PGC), ia Andrew Minogue, ina ua iloiloina e le latou komiti ia tauofoga a Amerika Samoa ma Niue, sa ‘aufa’atasi le komiti, e le i mafai ona ausia e malo e lua ia tulaga o lo’o mana’omia.

Ma o se vaega autu lava sa misi mai i tauofoga a Amerika Samoa ma Niue, o se faamaoniga mai i le malo, e lagolagoina ai tulaga tau tupe mo le taligamalo.  Sa saunoa Minogue, e le mafai ona fa’atinoina le faamoemoe, e aunoa ma se lagolago tau tupe mai i le malo.

I sana folasaga i luma o le Senate i le masina ua tuanai, sa saunoa ai le afioga Loa, e lo’o tauva Amerika Samoa ma le atu Kuki mo le avanoa e talimalo ai i le “Pacific Mini Games’ i le tausaga e 2029.

Sa saunoa Loa, e tasi lava le iota o lo’o pa’u ai Amerika Samoa ma o lo’o manatu ai le PGC e filifili ia le atu Kuki, ona o le faigamalo a le atu Kuki, e iai son aitu Agai, e faapaleni ai le faigamalo.

Ae ona o Amerika Samoa, e ese foi le fa’atulagaga o lona malo, e leai sona itu Agai.

E ui i lea, sa galulue so’otau’au ia le afioga i le Lutena Kovana, le tofa ia La’apui Talauega E.V. Ale ma le ASNOC e saunia se tauofoga maumaututu, ma sa talitonu foi le afioga i le kovana, Lemanu P.S. Mauga, o se lagolagosua tusitusia mai i le Maota Fono, o le a mafai ona fa’amalosia ai le taumafaiga a Amerika Samoa.

FA’AO’OINA ATU I LE FAAMASINOGA IA RIPOTI O LE SOIFUA MALOLOINA A FIGIEL

O le masina o Iuni sa faatonuina ai e le Faamasinoga Maualuga ia le faia o se su’esu’ega i le tulaga o le soifua maloloina, o le tamaitai tusitala Samoa, ia Sia Figiel, lea o lo’o molia i le fasioti tagata, ma o le aso Gafua o le vaiaso ua tuanai, sa faapea ona taua’aoina atu lea ripoti i le faamasinoga.

O se tasi nei o vaega lata mai o le fa’asologa o le mataupu e faasaga ia Figiel, lea o lo’o fesoasoani ai le tamaitai loia ia Unasa Iuni Sapolu.  O Figiel, o lo’o molia i le maliu fasia o le tamaitai polofesa ia Caroline Sinavaiana Gabbard.

O Josephine Fuimaono Sapolu sa avea ma sui o Unasa i luma o le alii faamasino ia Leiataualesa Daryl Clarke.

E tusa ai ma le ripoti a le Samoa Observer, sa te’ena e le loia a le malo, ia Fraser Lawrence ia le auai o le loia a Figiel, talu ai se talosaga na fa’aulu e Figiel, e taofia ai le auaunaga a lana loia.

Ma na ta’ua foi e Lawrence, se vaega o le ripoti mai i le fomai o le mafaufau e tusa ai ma a latou su’esu’ega ia Figiel, o lo’o ta’ua ai le le a’afia o le ua moalia i gasegase faalemafaufau.

Ae peitai, sa ta’ua e Sapolu ia ni ripoti mai i fomai i Hawaii mo Figiel, ma lona a’afiaga i lenei mataupu.  O lea na toe tolopoina ai e le alii faamasino ia lenei mataupu, mo le toe fa’aauauina i le taeao nei.

Ua mae’a ona toe faaulu e le loia a le ua molia ia se talosaga mo se vaegatupe fa’atulagaina e tatalaina ai le ua molia mai i le falepuipui, e faatalitali ai lona faamasinoga, ina ua mae’a ona toe fa’aulu lona tali tete’e i ona moliaga uma, e aofia ai ma le moliaga o le fasioti tagata.

Na ulua’i tete’e le malo i le talosaga mo le tatalaina i tua o le ua molia, ma o lo’o lokaina pea o ia talu mai ona ave fa’apagotaina ia Me.

Sa iai se manatu i le ua molia ma lana loia ina ia toe tu’u’ese ia le talosaga mo le tatalaina o ia i tua ma sa fa’amatalaina o le a suia lana tali i ona moliaga, lea sa ta’ua e le faamasinoga, o le a iloiloina nei.

E tusa ai ma le ripoti a le Observer, o lo’o mana’o le ua molia ina ia faia se maliliega ma le malo, ina ia ave’esea le moliaga o le fasioti tagata, ae o le a toe sui le tali a le ua molia, mo le moliaga, o le fasioti tagata le fuafuaina.

O le masina o Mati i le tausaga fou, lea ua faamoemoe, o le a amataina ai le faamasinoga a le ua molia.

Na mua’i molia Figiel i le fasioti tagata le fuafuaina, ae peitai, ua toe suia lea moliaga, i le fasioti tagata, ina ua mae’a ulua’i su’esu’ega a leoleo.

FAIA SE MALOLOGA PU’UPU’U A LE FONO FAITULAFONO

O le aso Gafua, Setema 30, na amataina ai le malologa pu’upu’u a le Fono Faitulafono, ina ua mae’a tauaofiaga lona fa mo aso e 40 a le Nofoaiga lona 38, a le Maota Fono.

I le amataga o le masina o Setema, na fa’amalamalama mai ai e le Peresetene o le Senate, le afioga i le Senatoa ia Tuaolo Manaia Fruean, le faataunu’uina o lenei malologa, ina ia mafai ai maua se avanoa e fa’amae’a lelei ai le Fale Fono fou, ina ia mafai ona fa’ataunu’uina toe aso e 5 o le Nofoaiga lona 38 i totonu o le fale fou, ma tapunia aloaia ai lenei Nofoaiga.

Sa fapea ona lagolagoina lenei manatu e ala i se i’ugafono Taufa’aofi Aufa’atasi, lea na pasia e le korama atoa i le aso Gafua, e malolo ai le Fono Faitulafono e aunoa ma se aso fa’atulagaina e toe tatalaina ai.

O lo’o ta’ua i le I’ugafono le toe tatalaina o maota e lua, i se aso o le a malilie iai sui faitulafono, ae o le a le faasili atu i lo le aso e tatau ona tapunia ai le nofoaiga o lo’o fa’agasolo nei.

I se maliliega i le va o le malo ma le kamupani a le Paramount Builders, lea o lo’o gafa ma le fausiaina o le Maota Fono fou, o le aso 30 o Novema, 2024, lea sa atofaina e fa’amae’aina ai le galuega.

O le mea lea ua fuafuaina ai le tatalaina aloaia o le Maota Fono fou ma le tapunia o le Nofoaiga lona 38 o le Fono Faitulafono, i le amataga o le masina o Tesema.

I se iloiloga mulimuli a le Senate e tusa ai ma le mataupu i le Maota Fono fou, lea na faataunu’uina ia Setema 17, lea na molimau ai le pule o le Paramount Builders ia Papalii Laulii Alofa ma le Faatonusili o le Matagaluega o Galuega Lautele (DPW) ia Faleosina Voight, sa faamanino ai e Tuaolo i le pule o le Paramount Builders, e tusa lava pe le mae’a le Maota Fono ia Novema, o le a tatalaina lava.

Na saunoa foi Tuaolo, o le Nofoaiga lona 38 lenei o le Fono Faitulafono a Amerika Samoa, i lona vaega mulimuli lea e tatau ona fa’amae’aina i lona aso 45, lea e pa’u i luga o Oketopa 4, 2024.  Ae peitai, ua manatu le Maota Fono, ina ia malolo mo le masina atoa, pe a mae’a le aso lona 40, ona fa’amae’aina lea o aso e lima lea e totoe, faapea ma le tapunia aloaia o le Nofoaiga lona 38 a le Maota Fono, i totonu o lona fale fou.

Ma na fautuaina ai e Tuaolo ia Papalii le fa’ataunu’uina o le umusaga o le Maota Fono ia Novema, e tusa lava pe le mae’a.  Sa saunoa foi Tuaolo, o lo’o iai sona manaoga ina ia nofoia e afioga i sui faitulafono a latou nofoa i totonu o le fale fou, i le taimi e fa’apa’iaina ai, aua o nisi o i latou, o le a le toe fo’i mai pe a toe tauaofia le fono faitulafono.

E ui ina sa talosaga Papalii mo se lua vaiaso e mafai ai ona toe fo’i mai e toe faia se ripoti i le galuega, ae peitai, na saunoa Tuaolo i le aso Gafua, o le a le toe o’o mai Papalii i luma o le Senate, ae o le a asia e le komiti ia le galuega ma toe fa’ailoa mai i le Senate, pe ono taunu’u lo latou faamoemoe ia Novema.

Ma o lenei komiti, o lo’o aofia ai sui mai i Maota e lua; e aofia ai le afioga i le Taitaifono o le Komiti mai i le Maota o Sui, ia Vailoata Amituanai faapea afioga i Faipule ia Ape Mike Asifoa, Manumaua Wayne Wilson, Manavaalofa Manase, Avagafono Maiava, ma Fiu Johnny Saelua.

Mai i le Senate, e aofia ai le Taitaifono i le Komiti, le afioga i le Senatoa ia Satele Lilio Satele, faapea afioga i Senatoa ia Malaepule Saite Moliga, Utu Sila Poasa, Ponemafua Tapeni, ma Ma’o Faauma Gogo.