TALA I VAIFANUA

Pago Pago - AMERIKA SAMOA

FAAPAIAINA FANUA E FAUSIA AI SE NOFOAGA FOU MO FANAU TALAVOU UA A’AFIA I SOLIGATULAFONO

O le aso Faraile, Setema 20, 2024, na fa’apa’iaina ai se laufanua i Tafuna, mo fanau talavou ua a’afia i solitulafono. 

I le saunoaga amata a le afioga i le Epikopo o le Ekalesia Katoliko Samoa-Pago Pago, ia Kolio Tumanuvao, sa ia fa’amanatu mai i le mamalu na aofia potopoto i lea taeao, le tatau ona galulue faatasi aua le lelei o le fanau.

Sa faaleoina e le afioga i le Epikopo, le agaga fa’afetai i le malo ona o le tele o poloketi o lo’o fa’agasolo nei ma poloketi ua mae’a.   Sa ia ta’ua le tele o galuega lelei ua faia e le malo mo le atunu’u, atoa ai ma lona fiafia tele i lenei poloketi, aua e mo le fanau talavou.

Na ta’ua foi e Rev. Kolio, o fanau talavou, o lo tatou lumana’i lea, ma o lenei fale fou o le a fausia, e le mo na’o se nofoaga e lokaina ai I latou, ae o se nofoaga e mafai ona o tatou lagolagoina ai fanau talavou ma fesoasoani ia i latou, ina ia toe fo’i mai i le ala tonu ma le sa’o.

Sa faamatalaina e le afioga i le Epikopo le ‘ese’ese o lanu e latou te la’eiina mo sauniga ese’ese.  Ae ua ia filifili le le la’eiina o ia lanu i lena taeao, ina ia fa’aalia le galulue faatasi aua alo ma fanau.

I le fa’amalamalamaga o lenei galuega, na saunoa ai le Faatonusili o le Matagaluega o Galuega Lautele ia Faleosina Voigt, o lenei fale fou e fogafale lua ma o le a fausia ina ia le gata ina iai fale iai fanau talavou o le a fa’anofo ‘esea ona o soligatulafono, ae ia avea foi ma se siomaga malupuipuia mo i latou o le a gafa ma le leoleoina o le lotoa, o faiaoga ma faufautua.

O le fogafale muamua, e pei ona sa fa’amanino mai e le tamaitai Faatonusili, o le iai potu a’oga, o se umukuka ma se potu taumafa, o nofoaga mo ta’aloga, o fale le ta’ua faapea ofisa mo le au faigaluega.

O le fogafale lona lua, o le a iai sela o le a fa’anofo ‘esea ai fanau talavou, o faleta’ele, ma potu teu oloa. 

O le tau atoa o lenei galuega, e $6.8 miliona ma ua faamoemoe e fa’amae’aina i le 18 masina.

O le kamupani sa tusia le ata o lenei fale fou, o le kamupani a le Lively Architects ae faatupeina e le Ofisa o Aoga.  O le kamupani o le a faatinoina le galuega mo le fausiaina o le fale, o le Allied Enterprises, po o le RM construction, faatasi ai ma le lagolago faaletupe mai i le Ofisa o le Initeria.

I le saunoaga a Voigt sa ia ta’ua ai le a’e o se manatu i le afioga i le Kovana Lemanu P.S. Mauga ina ia fausia se fale e saogalemu mo le fanau talavou ina ia mafai ona a’oa’oina ai ma tuputupu ai.  Ma o lo’o iai se talitonuga maumaututu i le alii kovana i le agava’a o fanau talavou, e avea ma ni tagata sili atu i le lumanai.  Ma o lenei fale, o le a avea ma se vaega taua o lo latou atina’e.  E le gata i lea, o le faatuina o lenei fale i tafatafa o le TAOA, o le a mafai ona maua ai e fanau talavou le avanoa e a’oa’o mai ai mai i tama ma tina matutua.

I lana saunoaga e avea ma sui o le kovana, sa saunoa ai le afioga i le Lutena Kovana, le tofa ia La’apui E.V. Ale le avea o lenei fale ma se amataga fou mo fanau talavou ua a’afia i solitulafono.  O le a avea ma se nofoaga e mafai ona o latou maua ai ni a’oa’oga ma fautuaga, e mafai ai ona o latou tautuaina aiga, nu’u ma Amerika Samoa.

Sa fa’aleoina foi e La’apui le agaga fa’afetai i le malo feterale faapea ofisa lotoifale a le malo, sa mafai ona lagolagoina lenei poloketi.

Ma na ia u’una’ia le mamalu na aofia potopoto i lea taeao faapea le mamalu lautele, ina ia taga’i i neif ale, o ni alagamanuia o lo’o manaomia e fesoasoani ai i fanau talavou ua solia le tulafono.  Sa ia ta’ua foi, e ui i le taua o neif ale, ae sili atu le taua o le galulue faatasi o le atunu’u.

TALA’AGA

O le tausaga ua mavae, sa talepeina ai le falepuipui lea sa patino mo le fanau talavou, ina ua fa’ailoa mai e le Ofisa o le Soifua Maloloina, le le toe aoga pe malu puipuia.

O le falepuipui lea sa i tua tonu lava o le to’ese i Tafuna – lea o lo’o loka ai tagata matutua, ma sa faafoeina e le Ofisa o Falepuipui.

E le o manino mai i le taimi nei le tiute ma’oti a le Ofisa o Aoga, aua o lea ua ta’ua lenei fale fou, o seisi lea a’oga mo fanau talavou.

SALA NI PISINISI LOTOIFALE I LE SOLIA O TULAFONO A LE OFISA E PUIPUIA LE SIOSIOMAGA

Ua fa’alauiloa mai e le Pule Sili o le Ofisa mo le Puipuiga o le Siosiomaga a le malo tele, o Martha Guzman, le tatau i kamupani lotoifale ona tausisi i tulafono mo le puipuiga o le siosiomaga, lea e puipuia vaitafe ma le gataifale mai i le lafoia iai o lapisi.

O le saunoaga a Guzman sa faia a’o ia faaleoina ia se maliliega ua faia ma le Paramount Builders Inc faapea le Continental Transport Corporation (CTC), lea na fa’asalaina i le solia o tulafono mo le tausia mama o le suavai, i totonu o le teritori.

E $76,000 lea ua fa’asalaina ai le Paramount ma le CTC ona o le lafoia o lapisi i totonu o ogasami o Nu’uuli ma Tula faapea ai ma le vaitafe i Amaile.

I le tausaga e 2022 na fa’a ta ai e le Paramount ia se auala galue i Tula ina ia faamautuina ai le auala mai i le fa’aleagaina e le sami.  Sa fa’aaoga ai e le Paramount ia masini e tu’u ai ma’a, palapala ma u’amea i totonu o se ogasami o Tula, ma o latou solia ai le tulafono o le “Clean Water Act”.

I le 2023, sa faamae’aina ai e le Paramount se galuega i le vaitafe i Amaile ina ia taofia ai lologa.  Ma na fa’aaogaina ai e le Paramount ia masini tetele e sua ai ma la’u ese ai ma’a ma isi tulaga, mai totonu o le vaitafe, ae ua puipui le vaitafe i sima.  Ma o latou toe solia ai foi le tulafono o le “Clean Water Act”.  O le vaitafe lea a Amaile e tafe mai i le sami o Nu’uuli.

E $50,000 le sala o le a totogia e Paramount ona o le solia o tulafono feterale mo le puipuiga o le siosiomaga.

Ae o le faaiuga o le tausaga e 2022 sa galulue ai le CTC i gatai i le poloketi i matafaga o Nu’uuli mo le faamautuina o auala i le si’isi’i o peau o le sami ma o’o mai i gauta i le auala.  Ma na fa’aaoga ai e le CTC ia masini e tu’u ai ma’a, pefu po o le palapala ma u’amea i gatai o Nu’uuli lea na o latou solia ai le tulafono o le “Clean Water Act”.

E $26,000 le sala a le CTC.

O nei kamupani uma e lua sa galulue mo le malo o Amerika Samoa, le Matagaluega mo le Galuega Lautele (DPW) ma na pa’u ia i latou ona faia ni pemita (Clean Water Act permits) e mafai ai ona faatino nei galuega.