TALA I VAIFANUA

Pago Pago - AMERIKA SAMOA

FAIA LE SA A LE AFIOAGA O VAITOGI E MANATUAINA AI I LATOU NA MALILIU I SE MU TELE

O le aso ananafi na toe faamamaluina ai e le afioaga o Vaitogi le latou sa lea e amata mai i 6 i le afiafi o le aso 15 o Setema, ae toe tatalaina i le 6 i le afiafi o le aso 16 o Setema, i tausaga taitasi, e faamanatuina ai le mu tele lea na a’afia ai le nu’u i le silia ma le 200 tausaga ua tuanai

O lea sa e fa’asaina ai seisi ona toe ulufale pe toe tu’ua le nu’u i le va o le 6 i le afiafi o le aso 15 ma le 6 i le afiafi o le aso 16.  Ma e faapea foi ona fa’amalosia lenei sa, e ala i le polokaina e le aumaga o le alatele, e ulufale atu i totonu o le nu’u.

I le vaiaso ua tuanai sa faapea ona fa’ao’oina atu ai e le Ofisa a le Loia Sili ia se faamanatu i le Ofisa o Leoleo, e tusa ai ma le Sa a le afioaga a Vaitogi lea e fai i tausaga uma.  Ma talosaagina ai se fesoasoani a le Ofisa a Leoleo.  Ma sa ta’ua e le ofisa a le Loia Sili, e na o le pau lava le fa’atagana o le ulufale o seisi i totonu o le nu’u i le taimi o le Sa, e pe a faapea e iai se faalavelave fa’afuase’i e ono tula’i mai.

E tusa ai ma tala faamaumau a le afioaga, o lo’o ta’ua ai le matautia tele o lenei afi sa faatama’ia ai le tele o fanua o le nu’u, ma na faafaigata ona tineia.  Ae ina ua faapotopoto e matai o le nu’u ia o latou tagata, ma o latou tatalo faatasi, sa faapea loa ona matala ao o le lagi ma to mai uaga na tineia ai lenei afi matautia.

Ma o tausaga uma, e fa’ataunu’u ai lenei Sa a le nu’u ma potopoto ai le nu’u ma avea ai lea aso ma taimi o talosaga molia faapea o se fiafia tele.

UA TOE TAUNU’U MAI LE "MAGIC CIRCUS OF SAMOA" I AMERIKA SAMOA 

Ua toe taunu’u mai nei i laufanua o Amerika Samoa, talu mai le valu tausaga talu ai, ia le susuga ia Tupa’i Bruno Royale ma lana aufa’afiafia, o le ‘Magic Circus of Samoa’.  O le aso Tofi o le vaiaso nei lea ua faamoemoe e tatalaina ai a latou fa’afiafiaga.

O le malaga mai a Tupa’i ma lana aufa’afiafia, o le latou ulua’i vaega lea o le latou fa’atamiloga i le lalolagi.  Ma o le taimi mulimuli lenei o le a faapea ona toe ta’ita’ia ai e Tupa’i lenei ‘aufa’afiafia mataina.

Ina ua maua se avanoa e fa’atalatalanoa ai ma le sui o le Samoa News, sa fa’ailoa mai e Tupa’i, o lenei fa’afiafiaga ua ia aumaia, o ni fa’afiafiaga fou uma lava.  Ma o le a aofia ai ni sui fa’afiafia mai Samoa lea o le latou fa’afiafia faatasi ma nisi mai i Brazil, Argentina, Mexico ma Colombia.

E tolu i le fa vaiaso lea e faamoemoe e faia ai fa’afiafiaga a Tupa’i ma lana ‘aumalaga, ae e le’i fa’agasolo atu ina ritaea o ia.

SETEMA O LE MASINA E FA’ATAUA AI TAPENAGA MO FAALAVELAVE FA’AFUASE’I 

I se fa’aaliga fa’alauaitele mai i le Ofisa o le Kovana, ua poloa’ia ai le mamalu o le atunu’u e le afioga i le Kovana ia Lemapu P.S. Mauga, ina ia “faifai pea ma fafau lelei ni taiala e sauniuni ai mo fa’alavelave tupu-fa’afuase’i, ma ia galulue fa’atasi ina ia avea tatou ma nofoaga mautu.”

Ua mafua lenei fa’aaliga a le kovana, ona o lenei masina o Setema, ua poloa’iina e avea ma masina e “Faatauaina ai Tapenaga mo Fa’alavelave Tupu-Fa’afuase’i i Amerika Samoa”.

Ua ta’ua e Lemanu, “taluai o le “Masina ua Fa’atauaina ai Tapenaga mo Fa’alavelave Tupu-Fa’afuase’i’ ua maua ai aavnoa i tagata uma o Amerika Samoa e tapenapena ai Aiga, Pisinisi, A’oga ma Nu’u, mo so’o se faalavelave fa’anatura po o fa’alavelave tupu-fa’afuase’i e fa’atupu e tagata, e faapea ai foi ma le soliina o le tulafono e tagata fa’atupu vevesi.”

Ma talu ai, “ina ia maua pea le agaga fesoasoani i o tatou Tagata, Aiga, Pisinisi, ma nu’u e fa’aitiitia ai tagata maliliu faapea le pagatia o le tamaoaiga o tagata”.

Ua fa’ailoa mai ai ai le avea “o le matagaluega o le Feterale o lo’o gafa ma fa’alavelave fa’afuase’i, po o le FEMA ma le latou polokalame o le fa’asauni atu ai, isi ofisa o le feterale, sitete, malo lotoifale, nu’u ma teritori, ma sosaiete e ofo fua atu lo latou tatu aua galulue fa’atasi ina ia iloa ai gaoiga, sauniuniga uma o fa’alavelave fa’afuase’i, ma a’oa’o atu tagata uma ina ia silafia ma iloa le gaioiga e tatau ona fai”.

Ua ta’ua foi e le Kovana e faapea, “O sauniuniga i fa’alavelave fa’afuase’i, o le matafaioi lea a tagata uma o Amerika Samoa, e fautuaina ai ina ia fa’amuamua pea tapenaga ma ia galulue faatasi tagata uma, aiga ma nu’u, ina ia faamautinoa ai pea sauniuniga e tali atu ai i so’o se faalavelave ma mafatiaga e tutupu mai”.

Ma ua fa’alauiloa mai le “tatau ona matua fa’amalosia tagata o Amerika Samoa e auai i sauniuniga faatasi I mea e fai, ma ia asiasi i sauniuniga fa’atosina i le initeneti, Ready-gov. ma isi a’oa’oga ina ia fa’amautu ai sauniuniga a tagata.