Tala i Vaifanua

Pago Pago - AMERIKA SAMOA

FILIFILIA PULE FOU O LE FALETUSI A LE TERITORI

I se fa’aaliga fa’alauaitele a le afioga i le Kovana Sili ia Lemanu Peleti Mauga i le aso 15 o Aukuso, na fa’alauiloa mai ai le filifilia o le susuga ia Tuimalo Elvis Zodiacal e avea ma ‘Librarian’ fou a le teritori, e mataituina le faletusi a le malo – Feleti Barstow Public Library.

Sa fa’aalia mai foi e le afioga i le Kovana, o le filifiliga o Tuimalo i lenei tofiga, sa faia lea i lalo o se fautuaga mai i le Komiti Faafoe a le Faletusi.

O lo’o umia e Tuimalo ia se fa’ailoga o le ‘Master’s i ‘Library Science and Educational Leadership’ ma sa avea foi o ia ma Librarian i le Kolisi Tu’ufaatasi a Amerika Samoa (ASCC) i le tele o tausaga.

I le filifiliga o Tuimalo, ua faapea ona ia sui tulaga ai ia Emma Solaita Malele lea sa filifilia e avea ma Librarian a le teritori, ia Tesema 2021.

LATA I LE $95,000 TUPE FETERALE MO LE OFISA O LE SOIFUA MALOLOINA

Na fa’aalia e le afioga i le sui Faipule a Amerika Samoa i le Konekeresi a Amerika, ia Aumua Uifa’atali Amata Radewagen, ia lona agaga fa’afetai ina ua fa’amatu’u mai e le CDC (Centers for Disease Control and Prevention) a Amerika, ia se vaegatupe feterale, e pe a ma le $95,000 mo le Ofisa o le Soifua Maloloina a Amerika Samoa.

E le gata i lea, sa fa’aalia foi e le sui Faipule lona agaga fa’afetai i le faletua ia Jasmay Willis lea sa galue malosi ina ia tu’ufa’atasia le talosaga mo lenei fesoasoani tau tupe (grant).  Ma sa fa’aalia e Aumua lona agaga faamalo i le Faatonusili o le Ofisa o le Soifua Maloloina, le susuga ia Motusa Nua ma i latou uma sa galulue malosi mo lenei ‘grant’.

MALAGA MAI LE MASIOFO O TONGA I SAMOA

O le amataga o lenei vaiaso, na taunu’u mai ai i laufanua i Samoa ia le Masiofo o le malo o Tonga, ia Nanasipau’u Tuku’aho, e ta’ita’ia se aumalaga mai Tonga mo se Semina a Eria o le Pasefika (South Pacific Area Seminar).

O lona asia o Samoa o se tulaga maoa’e mo lenei fonotaga, a’o ia auai ma feutaga’ ma tagata o lona malo, lea o lo’o nonofo ma fa’amautu i totonu o Samoa.

I lona to’ai taunu’u i laufanua o Samoa sa faafeiloaia o ia e taitai o le malo ma nu’u, na aofia ai le Peresetene o le Faalapotopotoga a Tina o le ekalesia Metotisi a Samoa, le Minisita o Pisinisi Lautele faapea faauluuluga o le Minisita o Fefaatauaiga ma Mataupu Faavaomalo.

Ma na faamautuina ai i lenei feiloaiga le taua o le asiasi mai a le Masiofo faapea le maumaututu o le so’otaga i le va o Tonga ma Samoa.

O lenei Semina, na tatala aloa’ia i le afiafi o le aso Lulu (i Samoa) ma o lo’o faatautaia e le Ekalesia Metotisi a Samoa.  O lenei fonotaga, e fa’amae’aina i le aso Sa o le a sau nei, Setema 8, 2024 ma o lo’o auai atu ai tamaitai ma tina mai motu ma atunu’u ‘ese’ese o le lalolagi.

Sa mafai ona auai atu le afioga i le Palemia ia Fiame Naomi Mata’afa ma nisi o Minisita o le Kapeneta, i le tatalaga aloaia o lenei Fonotele lea sa faataunuuina i le malumalu a le Ekalesia Metotisi i Faleula.

FA’AMAE’AINA A’OA’OGA SU’ESU’E A SATINI SAMUEL LILI’U

Ua toe taliu mai nei i fanua, le susuga i le sui malu o le malo, Satini Samuel Lili’u, ina ua faamae’aina se a’oa’oga faapitoa na auai atu ai (Basic Crème Scene Investigations) lea sa faataunu’u i Fiti mo le masina atoa.

O lenei polokalama o lo’o mataituina e le Ofisa a Leoleo Feterale a Ausetalia ma e aofia ai a’oa’oga eseese, i lalo o le taitaiga a nisi o tagata ua iai le tomai faapitoa (renowned forensic experts) mai i motu ‘ese’ese o le Pasefika.

E to’atele nisi o leoleo mai i malo eseese o le Pasefika, sa mafai ona auai atu i lenei polokalama, na aofia ai ma leoleo mai i le motu tuaoi o Samoa.