TALA I VAIFANUA

Pago Pago - AMERIKA SAMOA

TOATELE NA AUAI ATU I LE TATALAINA ALOAIA O LE FALE FOU MO FAAMASINOGA

O le taeao o le aso Lulu o le vaiaso ua mavae, Aukuso 7, 2024 sa aofia potopoto ai faauluuluga o le Tafatolu o le Malo o Amerika Samoa, faapea le maave eseese o le atunu’u, e molimauina le tatalaina aloaia o le fale fou mo Faamasinoga Maualuga a le teritori.

Sa auai ai le afioga i le Kovana, Lemanu P. S. Mauga, o le afioga i le Peresetene o le Senate Tuaolo Manaia Fruean, le afioga i le Fofoga Fetalai ia Savali Talavou Ale, faapea afioga i Senatoa ma Faipule.

E le gata i lea, sa auai foi le afioga i le Faamasino ia Mamea Sala ma le mamalu o le aiga faamasino, loia ma le aufaigaluega o le faamasinoga.

Na auai ai foi le afioga i le sui Faipule o Amerika Samoa i le Konekeresi ia Uifa’atali Aumua Amata Radewagen ma sui mau tofi o le malo.

I lana saunoaga faapitoa, sa ta’ua ai e le afioga i le Kovana, “…masalo o moomooga ia o nofoaiga uma o le tatou Faigamalo.  O moomooga out e lagona, o tapenaga fuafua ia, a kovana ma a latou nofoaiga.”

“Ae fa’afetai i le Atua, i lenei aso, ua taunu’u lenei faamoemoe,” o le saunoaga lea a le afioga Lemanu.

Sa ia ta’ua foi, “O le maota lea o faamasinoga, na tusia e Lolo le ata, oute le’i suia lava se mea o le ata, leaga e iai le agaga i tua o i latou sa tapenaina lenei faamoemoe.”

Na ia faaleoina foi lona agaga fa’afetai i le kamupani a le Nana’s Inc. mo le latou galuega mae’ae’a ma ua fa’amautu mai ai, le le manaomia ona tau saili i fafo ni tagata faigaluega.  Sa fa’aalia e le afioga i le kovana lona agaga fiafia e tusa ai ma le galuega faatino e lenei aufaigaluega.

O le Faatonusili a le Matagaluega o Galuega Lautele (DPW) ia Faleosina Voigt sa faaleoina le tala’aga o le galuega, lea na amata mai ia Ianuari 3, 2022.  O lenei fale fou, e sui tulaga ai le fale faamasino lea sa iai, ua silia ma le 50 tausaga.

MALIU RICHARD ALEXANDER YOUNG JR.

O le aso 3 o Aukuso, 2024 na maliu ai i se maota gasegase i le setete o Ohio, i le 77 tausaga o lona soifua, ia le susuga ia Richard Alexander Young Jr., o se tasi o faipisinisi ma alo o Amerika Samoa.

O le susuga ia Young, sa soifua mai i Pago Pago i ona matua, lea foi ua fai’ilagi o la soifua, o Richard Young Sr. ma Pauline Bartley Young, mai i le afioaga o Nu’uuli.

O Young ua silia ma le 30 tausaga o ia pulea kamupani e latou te aumaia le kesi (propane gas) i totonu o Amerika Samoa.  Ma o se tagata sa lauiloa i le suafa o ‘Dickie’ i totonu o le teritori.

FA’AAUAU TAUMAFAIGA A ALEFOSIO I LANA TAGI FA’ASAGA I LE MALO

Ua i luma nei o le Faamasinoga Faaleitumalo a le malo tele i Honolulu, ia le tagi lona tolu a le susuga ia Leauma Ben Alefosio, e faasaga i le malo o Amerika Samoa.

Ae o le tagi, lea ua fa’aopoopo iai ma le Komisi a le H-EEOC (Hawai’i Equal Employment Opportunity Commission).

O le tagi a le susuga ia Alefosio na mafua ona  ua ia talitonu, sa le tonu ma sa’o le fa’ate’aina o ia mai i lana galuega i le Ofisa o Loia mo le mamalu lautele (Public Defender’s Office), i le tausaga e 2021.

O ulua’i tagi e lua, sa te’ena e le Faamasinoga Faaleitumalo i Honolulu.