TALA I VAIFANUA

Pago Pago - AMERIKA SAMOA

O SE FESILI E FIA MALAMALAMA?

Na fa’alauiloa mai e le fa’alapotopotoga a Tama ma Teine Tuai o le aoga maualuga a Faga’itua, i le Samoa News, le fia malamalama po o le a le mea na tupu i le fa’ailo po o le saini (marquee) lea sa o latou fa’atuina mo le latou aoga tuai, ona e le’i o’o atu se fa’amatalaga i le latou fa’alapotopotoga e uiga i le suiga fou lea ua faia nei.

Na ta’ua e le fa’alapotopotoga a Tama ma Teine Tuai a le aoga e faapea, sa o’o atu ia i latou se fa’amatalaga e faapea, o le fa’ailo fou lea ua sui tulaga ai nei le fa’ailo sa o latou fa’atuina i tausaga ua mavae, na totogia i tupe mai i le ARPA, o se vaegatupe mai i le malo feterale.

Ma o le auga lea o le fesili a lenei fa’alapotopotoga, pe aisea ua fa’ama’imau ai tupe feterale e totogi ai se fa’ailo fou, ae o la sa lelei le fa’ailo na iai lea na foa’i e le faalapotopotoga a alii ma tamaitai tuai o le aoga, mo le aoga?

O seisi itu sa fa’aalia ai le agaga fa’anoanoa a lenei fa’alapotopotoga, ona o le le’i fa’ailoa atu e le Puleaoga ma lana ‘au ofisa, a le a’oga maualuga a Fagaitua, po o le Ofisa autu o A’oga a Amerika Samoa, i la latou fa’alapotopotoga, le faia o lenei suiga, ua ma’imau ai o la latou foa’i.

Ae le gata i lea, ua fesiligia e le fa’alapotopotoga a alii ma tamaitai tuai a Faga’itua, le fa’ama’imauina o tupe o lafoga sa totogi e tagata, faapea foi ma foa’i mai i le mamalu o le atunu’u?

TALI:

Sa mafai ona fa’afeso’ota’i atu e se sui o le Samoa News ia le aoga maualuga a Fagaitua ma talatalanoa ma se tasi na faia se maliliega, e le lomia lona suafa.  Ma sa fa’aalia mai e lea sui, o lenei poloketi fou sa pasia ma tu’ufa’atasia e le susuga ia Suaese “Pooch” Ta’ase, a’o avea o ia ma puleaoga i totonu o Fagaitua.

Ma sa ta’ua foi e lea sui, sa fa’atuina le fa’ailo fou, ina ua mae’a le fa’au’uga a le a’oga ia Iuni 2024 ma o se meaalofa mai i le vasega fa’au’u 2024.

O le taimi nei, e pei ona fa’ailoa mai i le Samoa News, o lo’o ua galue le susuga ia “Pooch” i le Ofisa o Ta’aloga i totonu o le Ofisa o A’oga a le malo.

FAIA SU’ESU’EGA I LE FA’ALAVELAVE NA TUPU I LE VA’ALELE A LE TALOFA AIRWAYS

O lo’o ua fa’agasolo nei se su’esu’ega a le ofisa o lo’o mata’ituina femalagaiga a va’alele, i le fa’alavelave na tula’i mai i le aso Gafua lea na gau ese ai le pa’u pito i luma o le va’alele a le Talofa Airways, i lana faigamalaga mai i Apia mo Pago Pago.

E to’avalu le pasese na iai i luga o le vaalele i le taimi o le fa’alavelave.

I se fa’aaliga a le tamaitai o Mataua Aasa-Matai i luga o Api o Foliga, o ia o se tasi o le pasese e to’avalu, sa ia ta’ua ai le sipa o le pa’u o le va’alele, ona gau ese lea ina ua tulau’ele’ele le va’alele.

Sa ia fa’aalia lona agaga fa’afetai i le pailate sa fa’afoeina le latou faigamalaga, ona o le lototele ma le to’a, na mafai ai ona taunu’u manuia le latou faigamalaga.

E le o fa’amaonia mai pe ua logoina le vaega a le FAA ma po o faia se su’esu’ega a Amerika Samoa e tusa ai ma lenei fa’alavelave, ona o lea sa tupu i le malae va’alele i Pago Pago.

Ae i se fa’aaliga mai i le ofisa a le Pago Pago International Airport, i le Samoa News, ua fa’alauiloa mai ai le fa’aauau pea o faigamalaga a va’alele a le Talofa Airways, mo Pago Pago, e a latou vaalele e lua o iai nei.

FESOASOANI LE MALO I TAUMAFAIGA E FA’ASAO LE VAOMATUA I OTTOVILLE – NAUMATI

I se taumafaiga ina ia fa’asaoina le vaomatua i totonu o Ottoville – Naumati, ua faapea ona tu’ufa’atasia ai e le Faigamalo ia se fuafuaga, o se vaega o le Tausaga Tupe 2024 ma se fa’amoemoe e mafai ai ona puipuia lenei vaomatua aua alo ma fanau o le atunu’u i le lumana’i.

I se fa’aaliga fa’alauaitele mai i le afioga i le Lutena Kovana, le tofa ia La’apui Talauega E.V. Ale, sa ia ta’ua ai le tatau ona fa’atulagaina se nofoaga mo tatou alo ma fanau, ma se nofoaga malu e mafai ona tupu ma olaola ai o tatou siosiomaga fa’alenatura, e atia’e ai o tatou tu ma aganu’u.  Sa ta’ua e La’apui le avea o le Naumati ma se tasi o nofoaga paia.

Sa fa’amamafaina mai foi e le Faatonusili o le Matagaluega o le Marine & Wildlife, le susuga ia Taotasi Archie Soliai, le taua o lenei taumafaiga mo le fa’asaoina o lenei vaomatua, aua soifuaga o tagata o Amerika Samoa.

O le aso Lua na se’i mavae atu nei, Iulai 23, 2024 sa fa’ataunu’uina ai se talotaloga i Tafuna aua le fa’aalia o le lagolago mo le fa’asaoina o le vaomatua – Naumati.