TALA I VAIFANUA

Pago Pago - AMERIKA SAMOA

TUSI FA’ASINO UPU FA’ASAMOA MO LE FA’ASAOINA O LE GAGANA SAMOA

O le aso Tofi, Iulai 11, 2024 na tufatufaina ai le ulua’i tusi fa’asino upu (Dictionary) i le gagana Samoa i se sauniga sa fa’ataunu’uina i le Kolisi Tu’ufa’atasi a Amerika Samoa (ASCC) lea na auai ai le afioga i le kovana o Amerika Samoa, ia Lemanu P.S. Lemanu faapea le afioga i le Palemia o Samoa, ia Fiame Naomi Mataafa.

I se fa’aaliga fa’alauaitele mai i le Ofisa o le Kovana, o lo’o ua fa’aalia ai le avea o lenei tusi se la’asaga taua i le fa’asaoina o le gagana Samoa.  E 800 itulau o lenei tusi, o lo’o lomia ai uiga o upu Samoa e 27,000.

O le tofa i le To’oto’o ia To’oto’o Malemo na avea ma fofoga o le aso i le fa’afeiloa’ia ma le aloa’iaina o le auai o malo fa’aaloalogia mai Samoa faapea taitai o le Faigamalo a Amerika Samoa.

Ae o le afioga i le Epikopo i le Puleaga Samoa-Pago Pago, Katoliko, ia Kolio Tumanuvao sa faaleoina le talosaga amata.  Sa ia saunoa i le fa’atauaina o le gagana a le tagata, e ala i le fa’asaoina ma le manino o lona faaliliuina.

O le lauga autu o le aso, sa alo atu iai le afioga ia Fiame ma na ia fa’aleoina lona agaga fa’afetai i le afioga i le Epikopo mo le faamanuiaga o lea aso taua, ma ia u’unaia le afioga i le taitai fa’aleagaga, ina ia fa’aauauina pea le galuega a le Alii  ma le fa’asalalauina o le feau fa’aleagaga.

Na saunoa Fiame, “O taua o uso tu ofe, e le o se uso tau feagai.  Atonu e avea lenei galuega ia fa’amausali atili ai o ta so’otaga.”

Sa faamamafaina i le saunoaga a le afioga i le Palemia ia le taua o lenei galuega mo le fa’asaoina o le gagana Samoa, i totonu o se tusi, o le a mafai ona fa’aaogaina e tagata Samoa uma.  Sa ia fa’aleoina sona faamoemoega, ina ia avea lenei tusi ma se meafaigaluega a’oa’o i le lumana’i faapea alo ma fanau o le lumanai, i Samoa ma Amerika Samoa.

GALULUE SO’OTAU’AU AMERIKA SAMOA MA PA’AGA FETERALE E FAAMALOSIA LE TAOFIA O LE PULE I LE OLA

O le aso Lulu, Iulai 10, 2024 sa faataunuuina ai i le Ofisa o Fitafita Tuai (Veterans Affairs-VA) ia se fonotaga i le va o sui mai i le malo feterale mai i le SAMHSA (Substance Abuse and Mental Health Services Administration) ma sui mai Ofisa a le VA a le malo tele, ina ua mae’a sa latou asiasiga i le ofisa a le kovana i Utulei.

O lenei fonotaga, e pei ona ta’ua mai i se fa’aaliga faalauaitele mai i le Ofisa a le Kovana, sa soalaupuleina ai ni mataupu ma auala e mafai ona taofia ai ma puipuia ai tagata o le teritori, mai i le pule i le ola (Suicide Prevention).

Ma o se vaega lenei o se lu’itai mai i le Fa’aao o le malo o Amerika Samoa mo le taofia o le pule i le ola, mo sui o vaega’au a le malo tele, o fitafita tuai ma o latou aiga, talu mai le 2022.

UMUSAINA LE AUALA FOU I LE AFIO’AGA O TA’U

O le taeao o le aso Gafua na se’i mavae atu nei, sa fa’ataunuuina ai se sauniga fa’apitoa i Ta’u, Manu’a, mo le umusaina o le auala fou faapea ma le fa’apaiaina o se fanua lea ua faamoemoe e fausia ai se falemai tua fou (DOH), aua le tautuaina o le mamalu o le atunu’u i motu o Manu’a.

O le susuga i le Faifeau Toeaina ia Iosefa Autele mai i le EFKAS Ta’u, Malamalama o le Lalolagi sa ia fofogaina talosaga mo lenei sauniga taua.

I lana saunoaga faapitoa, na fa’aleoina ai e le afioga i le Kovana Sili, Lemanu P.S. Mauga, ia le agaga fa’afetai i le Matagaluega mo Galuega Lautele (DPW) faapea le kamupani a le Silva Group, mo le faamae’aina o le galuega mo le aualatele ae le gata i lea, o le amataina o le falema’i fou i Ta’u.