TALA I VAIFANUA

Pago Pago - AMERIKA SAMOA

FA’AMANATUINA O LE SISIGA FU’A A AMERIKA – ASO 4 O IULAI

I se fa’amanuiaga mai i le afioga i le sui Faipule a Amerika Samoa i le Laumua i Uasigitone, ia Uifa’atali Amata, sa ia fa’aalia ai le avea o le aso 4 o Iulai ma aso na fa’amautuina e le Setete o Amerika ma lo latou aso Tutoatasi, ma avea ai ma malo fou.

Ma i totonu o Amerika Samoa, ua avea lea aso malolo ma aso e mafai ona tomanatunatu ai i a tatou fanau ma aiga sa tu’uina atu o latou ola mo le saolotoga, faapea Toa o Samoa o lo’o fa’aauau pea la latou taulaga ola.

I se fa’aaliga fa’alauaitele mai i le Ofisa a le Kovana, ua fa’alauiloa mai ai foi le tapunia o ofisa a le malo, aua le fa’amamaluina o lenei aso malolo.  Ma o le a malolo uma ai tagata faigaluega a le malo, seia vagana i latou o lo’o mana’omia ona galulue i aso malolo (essential services).

Na ta’ua foi e le afioga i le kovana Lemanu P. S. Mauga, i lea fa’aaliga, o le aso 4 o Iulai, o se aso malolo taua, e tatou te fa’amamaluina ai le fanauina o se malo tele ma ona fa’avae.  Ma ua ia u’una’ia tagata o le atunuu ina ia avea lea taimi ma taimi e tomanatunatu ai i le lototele ma taulaga a tatou tua’a sa tau mo le saolotoga ua o tatou maua. 

TAPUNIA FAITOTO’A A LE FALE FAAMAMA TOTO A LE ‘HOPE DIALYSIS’

O le aso Faraile o le vaiaso ua mavae na fa’alauiloa mai ai e le fa’auluuluga o le falema’i autu a le atunu’u i Faga’alu (LBJTMC), le tapunia o faitoto’a o le fale faamama toto a le ‘Hope Dialysis’, i le aso Gafua na se’i mavae atu nei ma o le a toe aga’i uma atu gasegase fa’amama toto i le falema’i i Faga’alu mo a  latou talavai.

Sa ta’ua e le pulesili a le LBJTMC, le susuga i le alii fomai ia Dr. Akapusi Ledua i le fa’aaliga i le aso Faraile ua mavae, le taua o le agai uma atu o gasegase faamama toto i le LBJ i le faaiuga o le vaiaso na se’i mavae atu, aua le faia o su’esu’ega o toto e mana’omia, aua le amataina o a latou talavai i Faga’alu.

Sa fautuaina ai foi le aufaigaluega a le ‘Hopy Dialysis’, i lea lava fa’aliga mai i taitai o le falemai, ina ia aga’i atu i le ofisa a le ‘Human Resources’ i le aso Gafua na e’i mavae atu, ina ia mafai ona amata fa’agasolo e liliuina mai o a latou pepa faigaluega, i le LBJ.

ASIASI ATU LE ALII TALAVOU NA MANUMAL I LE TAUVAGA ATA TUSIA (MALOFIE) A LE KONEKERESI, I LE LAUMUA I UASIGITONE

O le amataga o le vaiaso nei, na fa’afeiloai aloaia ai e le afioga i le sui Faipule a Amerika Samoa i le laumua i Uasigitone, Uifa’atali Amata, ia le alii talavou o Talanoa Lagafuaina, lea sa manumalo i le tauvaga ata tusia a le Konekeresi (Malofie Congressional Art Competition).

O le lona lua nei o tausaga, o faamanuiaina ai taumafaiga a lenei alo mai i le aoga maualuga a Tafuna.  Ma ua ia toe mauaina ai le avanoa e auai fa’atasi atu ma isi sa manumalo a latou ata tusia mai i itumalo uma sa auai, i le laumua i Uasigitone, ina ia fa’aalia ai a latou galuega taulima ma auai i aiga tele.

O nisi o alo ma fanau sa faapea ona aloaia a latou galuega taulima, na aofia ai le susuga ia Tavale Aumua lea na tulaga lua lana ata tusia.  O Tavale e mai le aoga maualuga a Leone.

O le tamaitai ia Anarosa Tolai mai i le aoga maualuga a Leone, sa mauaina le tulaga tolu.