TALA I VAIFANUA

AMERIKA SAMOA ma SAMOA

MOLIMAU TAMAITAI FATU SOLO MOLIA I LE FASIOTI TAGATA, O LE AGAGA LEAGA NA MAFUA AI

I lona tula’i ai i luma o le faamasinoga i le aso Gafua, Iuni 17, e tali ona moliaga o le fasioti tagata, na molimau ai le tamaitai fatu solo lea ua tu’ua’ia i le maliu ai o se uso-a-fatu-solo, o le agaga leaga na u’una’ia o ia e faia lenei solitulafono.

E lima moliaga o lo’o feagai ma Sia Figiel, e 57 tausaga o lona soifua, ona o le fa’alavelave sa tula’i mai i le faaiuga o le masina ua mavae, lea na maliu ai Dr. Caroline Sinavaiana Gabbard.

Na ta’ua foi e le Talamua Online, le fa’ailoa foi e Figiel i luma o le faamasinoga, lona le mana’o i se loia ma o le a ia finau mo ia lava, i luma o le faamasinoga.

I se taimi ua tuanai, sa talosagaina ai e le tamaitai na avea ma loia a Figiel, ia se fa’atonuga faafaamasinoga e taofia ai vaega fa’asalalau mai i le fa’asalalauina o mataupu o lenei faamasinoga faapea ai le suafa o Figiel.

Ae peitai, sa ese se manatu o Figiel, e pei ona sa ia fa’aalia i luma o le faamasinoga i le aso Gafua.  Ua talitonu Figiel, ona o ia o se tagata tusitala, e leai se mafuaaga e le tatau ai ona fa’asalalauina pe lomia foi, lona suafa..

Sa talosagaina foi e le loia muamua a Figiel ia le faia o se su’esu’ega o le mafaufau, ia Figiel, ae na te le ‘i tali i ona moliaga.  Ae peitai, sa fa’aleaogaina e Figiel lea talosaga ma ia faapea atu i le faamasinoga, o le agaga leaga sa u’una’ia o ia e faia lenei solitulafono.

Ma sa ia talosagaina le faamasinoga ina ia lauina lona faasalaga i lea lava aso, ina ia mafai ona saoloto le agaga o le ua maliu.

LOKA SE TAMA E 68 TAUSAGA I LONA FA’AO’OLIMA

O le aso 27 o Aperila, 2024, na valaau ai se tamaloa i le Ofisa a Leoleo i Tafuna ma lipotia le fasia o ia e se tama e 68 tausaga le matua.

(Ua le lomia e le Samoa News ia le suafa o i latou o lo’o a’afia i lenei mataupu, aua le puipuiga o fanau o lo’o a’afia ai.)

E tusa ai ma fa’amaumauga a leoleo, sa fa’amatalaina e le ua a’afia le u’uina e le tama e 68 tausaga, ia lona ua, a’o aga’i atu i se fale le ta’ua, i tua o le latou fale.

Ina ua taunu’u leoleo, sa o latou feiloai ma le na a’afia i lenei fa’alavelave ma sa ia faamatalaina i leoleo le fa’ate’ia o ia, a’o aga’i atu ai i le fale ta’ele i tua o le latou fale, ae mau le ua molia i lona ua ma titina o ia, ma taumafai e ta o ia i se paipa.

O lo’o ta’ua ai foi le molimauina o lenei faalavelave e se tamaitai talavou e 17 tausaga.

Ina ua mae’a ona talanoa leoleo ma le na a’afia, sa aga’i atu loa mo le sailiga o le ua molia, i lona maota, pe a ma le 20 iata le mamao mai i le fale o le na a’afia.

E taunu’u atu leoleo, o lo’o saofa’i mai le tama matua i tafatafa o lona fale, ae ina ua fesiligia o ia e leoleo e tusa ai ma le mea na tupu, sa le tali lenei tama.

Sa fa’ailoa atu loa iai e leoleo, o lea o le a aveina o ia i le ofisa a leoleo i Tafuna, e fa’aauau ai le latou suesuega.

Sa mafai foi ona su’esu’eina e leoleo ia le tamaitai 17 tausaga ma o lana fa’amatalaga sa fa’amautuina ai le fa’amatalaga a le na a’afia.

O lo’o ta’ua foi i fa’amaumauga a leoleo le lagonaina e leoleo o le malosi o le manogi pia o le ua molia, a’o taumafai e tu’u o ia i totonu o le ta’avale a leoleo.  Ina ua o latou taunu’u i le ofisa a leoleo, sa ioe ai loa le ua molia, e fai sana faamatalaga ma tali fesili a leoleo.

Ma e tusa ai ma sana faamatalaga, sa ia ta’ua ai le iai o se fe’ese’esea’iga tumau i le va o ia ma le na a’afia, ona o lona le fesoasoani e totogi ia le pili uila, ma o le mafua’aga lea ua fa’asa ona ia toe fa’aaogaina ai le fale ta’ele.

Sa ta’ua foi e lenei tama matua lona to’atama’i tele i le le mafaufau o le fa’amatalaga a lea alii na fai atu ia te ia, e ala i lona fesili atu po o fea la se fale ta’ele e alu e fa’aaoga, po o lona gutu.  O le mafuaaga lea sa ia le fiafia, ae peitai, e na te le i pa’i i le na a’afia.

Na molia loa le tama matua i le faitauga e tasi o le Fa’ao’olima i lona vaega e tolu – o se solitulafono vaega ‘A’ i solitulafono mama, lea e mafai ona nofosala ai se tasi i le falepuipui i le tausaga e tasi, po o se sala tupe e $1,000; po o fa’asalaga uma e lua.

E $1,000 le vaegatupe sa faatulagaina e tatalaina ai le ua molia mai i le falepuipui, e faatali ai lona faamasinoga.