TALA I VAIFANUA

Pago Pago - AMERIKA SAMOA

FA’AILOGA FAASIKOLASIPI MA FA’AILOGA FOU TAU’A’AOINA E LE AOGA MAUALUGA A FAGAITUA

Ia Iuni 06, 2024 i le sauniga mamalu o le taua’aoina o fa’ailoga fa’asikolasipi fa’apitoa mo le fanau fa’ai’uaso mai le Laumua o le Vikings i Faga’itua, na faalauiloa mai ai nisi o fa’ailoga fa’asikolasipi na fa’aauau mai tausaga ua te’a, ae ua i ai fo’i ma isi fa’ailoga fa’apitoa ua fa’ato’a amatalia ona taua’aoina i lenei tausaga aoga. 

O lea fa’atasiga sa fa’ataunuuina lava i le Fale Laumei poo le Gov. Rex Lee Auditorium i Utulei. I le mae’a ai fo’i o lea sauniga fa’apitoa e taua’ao ai fa’ailoga fa’apitoa mo le vasega fa’ai’uaso, ona alofaiva loa lea o le vasega fa’au’u i le latou siva tele (Senior Ball) e faaiu ai le latou tausaga o a’oa’oga.

I lenei tausaga ua mataina le tele o fa’ailoga ua faatulaga mo le fanau ua agavaa i ai ma o le tele o nei fa’ailoga ua foa’ia mai e sui Faipule o le Falelima i sasa’e, ae maise o nisi fo’i o Tama o le atunuu, o lo’o ua tautua i le atunu’u o e ua mu o latou loto ina ia fesoasoani e fa’atino le alofa foa’i mo taumafaiga a le fanau ina ia fa’aauau latou aoa’oga mo fa’ailoga maualuluga, ma toe taliu mai e avea ma ni ta’ita’i agava’a e tautuaina le Malo o Amerika Samoa i le lumana’i.

O i latou na foa’i fa’ailoga eseese na taua’aoina e aofia ai sui mamalu o le Fono Faitulafono o Amerika Samoa Faipule o Vaifanua #3 Rep. Shawn Onosa’i Va’a. O le fa’ailoga fo’i na faliu i ai Faipule Itumalo #4 Saole Rep. Kitara Vaeau. O le Fa’ailoga fo’i sa tapena e le Faipule Itumalo #5 Sua #1 Lua’itaua Gene Pan, mai Lauli’i. O le isi fa’ailoga na tapena lea e le susuga le Faipule Itumalo 11, Ma’oputasi #5 Rep. Faimealelei Anthony Allen, ma le fa’ailoga mulimuli fo’i ua mae’a tapena e le lana afioga le Peresetene o le Senate a le Fono Faitulafono Senatoa Tuaolo E. Manaia Fruean mai Pago Pago.

Na fa’aauau fo’i le fa’ailoga na tapena talu mai le tausaga 2008, O le fa’ailoga lea a le Vasega o tama ma teine sa aoaoina i  Fagaitua ma e ta’ita’ifono ai le faletua o Elisapeta Tuupo Alaimaleata, e $500 le tinoitupe fa’atasi ai ma Ipu fa’apitoa, ae ua agava’a ai le to’a 12 o fanau faai’uaso i lenei vasega fa’au’u 2024.

O fa’ailoga foi na tapena mai e nisi o sui o tama ma teine tuai o Fagaitua High sa mataina fo’i le fa’ailoga mai sui o le vasega faai’uaso 1988, lea sa tula’i ai le susuga le Foma’i Vaiula Tuatoo e taua’aoina latou fa’ailoga na 

The Fagaitua HS Alumni comprises the Class of 1988 Fa’ailoga faasikolapisi na tapena e le Dr. Vaiula Tuato’o Scholarship Foundation,  Seaula Scholarship, Sosoli Aoelua Scholarship, Marston Porter Scholarship, ma le Fetuao Scholarship. 

Ua aofia ai fo’i ma se fa’ailoga fa’asikolasipi ua fa’aauau ona taua’aoina e fa’amanatu ai le tautua a se tasi o tina Faia’oga i tausaga e tele i Amerika Samoa, Le tina o Tammy Malae mai le afio’aga o Aua ma sa taua’aoina fa’apitoa lea e se tasi o alo, Mrs Bethany Malae - Toelupe, ua aofia i lea fa’ailoga o le Meaalofa Tupe $200. ma le Fa’ailoga fa’apitoa.

Ua fa’aopoopo i lenei tausaga nisi o fa’ailoga fou e lua ma o ni fa’ailoga fo’i ua mae’a taua’aoina mai e tama ma teine tuai o le Laumua o Fagaitua 

O le fa’ailoga muamua na tapena mai lea e Mr Savelio Ilalio ma le faletua o Lauie Laban-Ilalio lea sa taua’aoina ai fa’ailoga tupe e ta’i $500. e fa’amau fa’ailoga ai le soifua galue o le latou tina Aeto A’etonu Ilalio ma sa taua’aoina lea i le tamaititi a’oga sili ona amio lelei. Ao le fa’ailoga mo Loreta Laban ua taua’aoina lea i le Ta’ita’i o le Vasega fa’ai’uaso ua iloga lana tautua i le vasega faai’uaso 2024.

O le isi fa’ailoga fou ua mataina i lenei tausaga, ua taua’aoina lea fa’ailoga e tolu mo nisi o le fanau a’oga o le a a’e mo a’oa’oga i le ASCC i le tausaga a’oga fou. O le fa’ailoga fa’asikolasipi e le mafai ona fa’aliliuina e taua’ao i se tamaititi na manatu e a’oga i le ASCC ae toe maua sona avanoa e a’oga ai i isi Kolisi ma Iunivesite i Amerika.

E le taua’aoina fo’i le tinoitupe lea i le a’ao o le fanau a’oga ua agava’a i ai, ae ua fa’aulu sao lava ma le suafa o le tamaititi a’oga ua agava’a i le Kolisi Tuuf’aatasi o Amerika Samoa. Pe a mae’a ona ulufale le tamaititi mo ana a’oa’oga i le ASCC, o le a ia maua tonu ai lea fa’ailoga sikolasipi.

O fa’ailoga nei e tolu e ta’i $1000 sa tapena e le fanau a’oga i Fagaitua na fa’au’u mai le tausaga e 1994.  Ona ua atoa lelei le 30 tausaga talu ona fa’au’u mai i latou nei e aofia ai Carol Ma’afala, William Spitzenberg, le sui Pule o Denise Ah Sue ma isi uma sa latou foa’i mo lenei fa’amoemoe lelei, o le toe fa’afo’i i le Laumua sa utuvai ai i taumafaiga o le sailiga o le atamai lautele. E ese mai lea, ae o sui fo’i ua lautogia mo nei sikolasipi e a’oga ai i le ASCC ua i ai ma le pepa e tausami fua ai i le Sadies e $50. ma ua fa’alauiloa mai fo’i i latou ua lautogia mo nei avanoa fa’asikolasipi e aofia ai:

Ms Levalefaiva Kal-El Malala o Amouli, Sheree Pelenise o Faga’itua, and Lamasitina Tuigamala o Alofau. Fa’amalo le tauivi i le fanau a’oga uma i le Laumua o le Vikings ma o le Fetu Pupula lava lea i Sasa’e.

LUPE FA’ALELE MAI AUA – FA’AU’U MAI A’OA’OGA A LE ‘AIR FORCE’ I COLORADO

Ona o le masina o Me sa faamanatuina ai tagatanu’u o Amerika e iai piitaga i Asia ma atu motu o le Pasefika, ua vaaia le faaopoopoina o fanau lalovaoa mai le tatou Alamoana ua latou ausia matati’a fou ma ua lautogia i a’oa’oga i lenei vaitau o faauuga. 

Le tama’ita’i o Taylor Poia Miller, o se tasi lea o fanau faau’u mai A’oga Fa’apitoa a le Air Force ile sitete o Colorado, sa maua ai lana faailoga o le Bachelor of Science mo lana mataupu fa’asaeanisi, Biology. 

Ona o le faai’uina ma le manuia o ana a’oa’oga i lana kosi tau’ave lea, sa fa’apine ai lona  fa’ailoga fa’aofisa 2LT, ma savali ai lea  tama’ita’i o Miller i lona fa’auuga ia Me 30, 2024. 

E tele faailoga lautogia sa maua e le lutena o Miller i le 4 tausaga sa ‘aoga ai, ma ua faamanuiaina nei o ia e galue ile vaega-au a le Air Force i Mildenhall i Egelani.

 O ona matua, le tama o Bret Miller (ritaea mai le Air Force E8) ma le tina ia Lina Ma’afala (Chief Warrant Officer CW2 i le USArmy), sa avea ma poutu malosi ile sapasapaia o si o la alo ia Miller ile faataunuuina o ana a’oa’oga ma fuafuaga mo lona lumana’i manuia. 

 O le tina loto toa o le lutena ia Miller, o Lina Ma’afala na tupuga mai alalafaga o Aua Paepaeulupo’o, Leulumoega, ma Malie. O ona tuaa o le tama ia Sa’ousoali’i “Sa’o” Ma’afala-Amituana’i (e le’i leva ona maliu) ma le tina ia Poia Leoitiiti, ose faia’oga Manulele Tausala Elementary, mo tausaga e tele. E tumu le tama’ita’i o Miller ile olioli ma le mimita i lona itu Samoa ma le aganu’u Samoa e tiu ai. Faamalo mo le faaeaea ma le ola saili 2Liutena Miller!