TALA I VAIFANUA

Pago Pago - AMERIKA SAMOA

MOLIA SE TUSITALA LAUILOA A SAMOA I LE FASIOTI TAGATA

Ua molia nei le tamaitai tusitala o Papali’i Sia Figiel, i tu’ua’iga o le fasioti tagata, i se faalavelave na tula’i mai i Vaivase-uta i le aso Toonai i Samoa, lea ua maliu ai se tina e 78 tausaga, o Caroline Sinavaiana Gabbard.

Sa ta’ua e le komesina a leoleo, le susuga ia Auapaau Logoitino Filipo, le mauaina o ni faamaoniga, i uluai suesuega a leoleo, ua mafua ai ona molia Figiel i le fasioti tagata. 

Na ta’ua e Auapaau le fa’aaogaina o se samala faapea ma se naifi e fa’ao’o ai manu’a i le ua maliu.  Ae peitai, e le o mautinoa le mafuaaga o lenei fa’alavelave, ae peitai, e foliga mai na tu’ua e le ua molia ia le ua maliu i lona fale, ae alu ma sana uo i le tafafao i Lotofaga.

O Figiel o se tusitala lauiloa mai Samoa.

GALULUE FAATASI LBJ MA ‘ONESIGHT FOUNDATION’ AUA NI VA’AIGA MO TAGATA O LE ATUNU’U

Ua fa’agasolo nei se polokalama fou a le falema’i tutotonu a Amerika Samoa (LBJTMC) aua ni va’aiga (mata tioata) fou mo gasegase o lo’o aga’i atu i le falemai, ona o tulaga faaletonu i la latou va’ai.

Na fa’aalia e le Faatonusili a le LBJ, le susuga i le alii fomai ia Dr. Akapusi Ledua, le agaga faafetai i se foa’i mai i le faalapotopotoga o le ‘OneSight EssilorLuxottica Foundation’, ona o se foa’i maoa’e, o ni mata tioata faitau tusi, e 2000, mo le falemai.

O lenei faalapotopotoga ua lima foa’i mai i le LBJ, e faamautu i Ausetalia ma o la latou misiona alofa lenei, o le fesoasoani i atunu’u ma malo, e ala i a latou foa’i mo va’aiga.

I le 2023, na silia ma le to’a 3,500 i latou sa tu’uina atu a latou taimi ma taleni i lenei faalapotopotoga, e fesoasoani i le siakiina o fofoga a tagata, faatulagaina o ni gaioiga e aoina ai ni tupe e fesoasoani i le faamoemoe a le faalapotopotoga, faapea ma le ofoina atu o a latou taleni i le atina’eina  o se polokalama mo le fa’atauaina o mata.

TO’A 16 FA’AU’U MAI I LE AOGA MAUALUGA A LE PACIFIC HORIZONS

E to’a 16 alo ma fanau a le teritori ua faai’uina mai nei a latou a’oa’oga, mai i le a’oga maualuga a le Pacific Horizon.

O le aso Toonai, o le vaiaso ua tuanai, Me 25, 2024, sa faataunuuina ai i Kanana Fou ia le fa’au’uga lona 19 a lenei aoga.

O lauga faapitoa o lea aso, o le susuga i le ta’ita’i ‘au ia Mapu Saei Jamias ma le afioga i le kovana, Lemanu P. S. Mauga.

O le tamaitai o Gabrielle Guyana sa ausia togi maualuga o le vasega fa’au’u ma avea ai o ia ma Valedictorian a le vasega fa’au’u, ae o le tamaitai o Erin Gebauer sa ausia le tulaga lua ma ua ia pale ai i le tulaga o le Salutatorian.

IOE SE ALII NA GALUE I LE VAEGA A LE ‘CIA’ I ONA MOLIAGA

O le vaiaso ua mavae, na ioeina ai e Alexander Yuk Ching Ma, e 71 tauaga o lona soifua, mai i Honolulu, Hawaii, lea na galue i totonu o se tasi o vaega su’esu’e a le malo tele (CIA), ia ona moliaga i lona taupulepule e faapotopoto ma fa’ao’oina atu i le malo o Saina, ia ni faamaumauga ma ripoti, mai i le CIA.

E tusa ai ma fa’amaumauga a le faamasinoga, na galulue faatasi ai le ua molia ma seisi o lona aiga tau toto, ma o i la’ua uma ua mae’a ona faatautoina e avea ma sitiseni o le malo o Amerika, ae na fananau mai i Hong Kong ma Shanghai.

Sa galulue faatasi i la’ua nei mo le CIA.  O le ua molia sa galue i le CIA mai i le 1982 seia o’o mai i le 1989 ae o lona aiga, sa galue mai i le 1967 seia o’o mai i le 1983.  Ma na o la galulue uma i totonu o ofisa e taulimaina nisi o faamaumauga pito sili ona taua ma lilo, a le CIA.

Ua ioeina e le ua molia, ina ua le toe galue mo le CIA, sa ia u’unaia ai le tagata lea o lona aiga, e auai i se fonotaga ma nisi mai i ofisa o le malo o Saina, i se potu o se faletalimalo i Saina.  I na aso e tolu, sa tauaaoina atu ai e le ua molia ma le tagata o lona aiga, ia ni faamaumauga a le CIA i sui mai i le malo o Saina.  Ae totogi tupe i la’ua e sui mai i Saina.

Ma o iina sa faia ai se maliliega i le va o le ua molia, le tagata o lona aiga faapea ma sui mai i le malo o Saina, o le a fa’aauau ona faia lenei fesuiaiga o faamaumauga a le CIA mo tupe.

O lo’o ta’ua foi i faamaumauga a le faamasinoga, a’o faamautu le ua molia i Hawaii, sa galue o ia i totonu o le ofisa a le FBI i Honolulu, ae o le taimi lena, ua nofo malamalama le malo o Amerika, i fesootaiga i le va o le ua molia ma le malo o Saina.  Ae sa fa’afaigaluegaina o ia e le FBI ina ia mafai ona o latou va’ava’aia ana gaioiga ma po o ai o lo’o galulue faatasi ma le ua molia.

Sa galue le ua molia mo le FBI, i le va o Aukuso 2004 ma Oketopa 2012.