TALA I VAIFANUA

Pago Pago - AMERIKA SAMOA

TO’A 82 FA’AU’U MAI I LE KOLISI A AMERIKA SAMOA (ASCC)

O le 10:00 i le taeao nei, o le a faapea ona faataunu’uina ai le fa’au’uga a le Kolisi a Amerika Samoa (ASCC) ma e to’a 82 i latou, na a’o’oga i le Kolisi a Amerika Samoa (ASCC) faapea ma ni isi ua fa’ai’uina mai a latou a’oa’oga i atunu’u i fafo, o le a faapea ona aloaina a latou taumafaiga ma aloaia lo latou ausia o lenei laasaga taua, o latou olaga.

Mo lenei fa’au’uga o le Tautotogo (Spring) 2024, ua filifilia ai e le vasega fa’au’u ia le Faatonusili o le Matagaluega o Fanau Talavou ma Tina/Tamaitai (DYWA), o Dr. Salote Aoelua-Fanene, e avea ma la latou lauga faapitoa.

O Dr. Aoelua-Fanene, e malaga mai i afioaga o Afonotele ma Fitiuta, Manu’a ma o ia o se tina o se fanau e to’alima, ma se fanau a fanau e to’alua.

O ia o se tasi, ua loa lana tautua i totonu o Amerika Samoa ma o se tasi ua loa ona fa’asagatau atu i lenei fa’ama’i mata’utia o le kanesa, ina ua a’afia ai lona tina ma mulimuli ane, o ia lava.

Sa saunoa le tamaitai faatonusili, i le 20 tausaga na feagai ai si ona tina ma lenei fa’ama’i, sa ia le to’ilalo ai lava, pe sui tulaga ai ona tiute fa’aletina.  Ma o se tulaga sa ia a’oa’oina mai i lona tina, e ui ina e feagai ma se gasegase, e mafai lava ona e ola i se olaga faamanuiaina.

O ni nai tausaga talu ai, sa faamaonia ai foi le a’afia o le tamaitai faatonusili i lenei faama’i, o le kanesa.  Ma o se tulaga, sa le’i fa’avaivai ai o ia ma fa’aauau ai ana su’esu’ega i auala e tausia ai o ia lava.

Saunoa Aoelua-Fanene, o se tasi o auala e mafai ai ona faia ni faaiuga sili ma le lelei, o le su’esu’e ma le fa’asoa atu i o tatou taitai, lea o lo’o gafa ma le faiva o faaiuga fai, aua le lelei o o tatou tagata.

SAUNI OFISA A LE MALO I HAWAII MO LE ‘HERITAGE FESTIVAL’ IA IUNI

O le aso 9 o lenei masina, sa fa’atautaia ai e le Ofisa a le Malo o Amerika Samoa, i Hawaii, ia se fonotaga tele, aua le soalaupuleina o le Fa’aaliga o le Faasinomaga FaaSamoa (Samoan Heritage Festival) lea ua fuafuaina mo le aso 15 o Iuni, 2024, i le paka a Ke’ehi Lagoon, i Hawaii.

I le fonotaga lea sa faataunuuina i le maota o le galuega a Kanana Fou i ‘Oahu, Hawaii, sa faamautuina ai le amataina o le polokalama, i se solo tele ma fa’aaliga o taavale teuteuina faapea ma ni ta’aloga fa’aleaganuu.

O le a faapea foi ona faia se po faaEvagelia ma tatala aloaia ai le polokalama, i se sauniga lotu e faataunuuina i le aso 16 o Iuni, ona soso’o ai lea ma se po o le Aganu’u, i le aso 17.

E to’atele ni taitai faaleagaga sa mafai ona auai atu i le fonotele lea sa faataunu’uina i le amataga o le masina, faapea taitai faaleautalavou, o ni taitai faalemiliteri, o taitai i totonu o Hawaii, o faipisinisi ma ni isi o le mamalu o le atunuu.

O le susuga ia Kesimale Fano, sa fofogaina auiliili ia polokalama o lea aso ma lea aso, faatasi ai ma faalapotopotoga o le a auai.  E pei o faalapotopotoga e sefulu (10) lea ua sauni mai mo fa’agatama eseese o le a faia.

Na fesiligia e le susuga i le Faifeau Toeaina ia Falelua Lafitaga ia tulaga o le ‘parade’ ma sa ia saunoa i le taua tele o le faamaoniga o i latou o le a auai i lea aso.

Sa saunoa le Faatonusili o le Ofisa a Amerika Samoa i Hawaii, le susuga ia Tuiafono ia le galulue malosi o le latou ofisa ina ia faamautuina faalapotopotoga eseese o le a ‘auai i lea vaega o le polokalama.

AUAI AMATA I FONOTAGA A TAITAI O LE PASEFIKA I LE KONEKERESI

O le vaiaso ua mavae, sa faataunu’uina ai se fonotaga faapitoa a taitai o le Pasefika, lea na auai ai ni sui se to’a luasefulu ma le tolu (23) mai motu o le Pasefika e sefulu valu (18).

Ma na fa’aalia e le afioga i le sui Faipule a Amerika Samoa i totonu o le konekeresi, ia Uifaatali Aumua Amata, lona agaga fa’afetai ona o se valaaulia sa ia maua, e auai atu ai i lenei fonotaga faapitoa, mo taitai o le Pasefika.

O lenei faatasiga, sa faataunu’uina lea i le laumua i Uasigitone, D.C. ma o se vaega o se polokalama mo le atina’eina o motu o le Pasefika.  Na mafai ona soalaupuleina o auala e mafai ai ona galulue faatasi ia motu eseese o le Pasefika, o le puipuiga o le saogalemu, tulaga o le siosiomaga, a’oa’oga faapea ma le tele o nisi mataupu.

O nisi sa mafai ona auai i lenei faatasiga, na aofia ai Senatoa Brian Schatz, sui Faipule Ed Case, sui Faipule Young Kim, Sui Failautusi DOI Carmen Cantor, sui Failautusi Keone Nakoa, Amepasa a Palau i Uasigitone, o Hersey Kyota; Amepasa a le RMI i Uasigitone o Charles Paul, Jackson Sorm mai i Micronesia, Dr. James Viernes ma Paki Ormsby mai i Niu Sila.