TALA I VAIFANUA

Pago Pago - AMERIKA SAMOA

FA’AIGOAINA LE FALE FOU A LE LBJ I LE AFIOGA I LE KOVANA LEMANU

O le taeao o le aso Faraile, Me 3, 2024, sa faapaiaina ai le fanua lea o le a fausia ai se fale fou mo aoaoga a le LBJ, lea o le a fa’aigoaina o le ‘HC Lemanu Palepoi Sialega Mauga Training Center’, i le nofoaga tuai a le EMS, i leisi itu auala o le falema’i tele a le malo, i Faga’alu.

Ua silia ma le lua tausaga o fuafuaina lenei fale fou, e $5 miliona.

O le susuga i le faafeagaiga a le LBJ ia Rev. Petaia Tumau sa na ia taitaiina le sauniga lotu.

O se saunoga faapitoa na fofogaina e le taitaifono a le komiti faafoe a le LBJ, ia Dr. Malouamaua Tuiolosega, lea sa ia ta’ua le taua tele o lenei fale fou mo le faagaioiga o le falemai, ona o le a mafai ona faaleleia atili ai le tomai ma le atamai aoaoina, ae faapea foi ma le toe pasiaina ai, e le gata o le pulega ae faapea foi le aufaigaluega i totonu o le falemai.

O le a faapea ona si’itia ai le atamai a i latou o lo’o galulue i le LBJ, i le fa’aaogaina o masini ma tekonolosi faaneionapo, e pei ona fa’aaogaina i atunu’u i fafo.  Ma o le a faapea ona siitia ai le tautua i totonu o le LBJ.

O lenei ofisa fou o le a faapea ona fa’aaogaina ai masini ma tekonolosi faaneionapo, e faamautu ai le maualuga o tulaga o aoaoga o le a faataunuuina ai.

Na toe faamatu’u mai e le taitaifono a le LBJ le tu’uto o le falemai i la latou auaunaga sili atu, mo tagata o le atunu’u, ma o le fausiaina o lenei fale fou, o se faamaoniga lea o lenei sini, ma o se fa’ailoga lenei i le fa’aauauina pea o le auaunaga a le LBJ i totonu o le atunu’u.

Sa ta’ua e Dr. Tuiolosega, ina ua fa’ato’a talanoaina lenei fuafuaga e taitai o le falemai, sa le’i iai se vaegatupe i lena taimi e faatino ai le faamoemoe.  Ae sa o latou le’i uia ala masani mo le sailiga o le vaegatupe mo lenei galuega, o le talosagaina lea o se fesoasoani mai i le malo.   Ae sa taumafai lava le  pulega a le falemai e saili e i latou lava se vaegatupe mo lea faamoemoe.

Sa faaleoina e le susuga i le taitaifono le tele o lu’itau sa feagai ma i latou, ae peitai, sa lagolago malosi totino o le komiti faafoe ina ia mafai ona tino mai lenei faamoemoe.

I le saunoaga a le susuga ia Anthony Allen (LBJ Board Director Representative) sa ia fa’aalia ai le fa’aavanoaina foi o lenei fale fou aua le fa’aaogaina e i latou o le a auai i le polokalama fa’atausima’i a le ASCC, mo a latou aoaoga.

O le a faapea foi ona fa’amautu iai ia auaunaga a le vaega o le EMS mo le tautuaina o aiga ma tagata o le atunu’u, o lo’o fa’amautu ma papa’a’ao i afioaga i le Falelima i Sasa’e.

Sa fa’aalia e le afioga i le Kovana Lemanu P. S. Mauga ia lona agaga fa’afetai i le komiti faafoe a le LBJ, ona o le sogasoga ma la latou tu’uto i lenei galuega taua, ua mafai ona tino mai, e aunoa ma se fesoasoani tau tupe mai i le malo.

Na ia ta’ua e faapea, o le fatu lea o le tautua mo le mamalu lautele, ma o se tulaga e tatau ona ta’imua i so’o se auaunaga i totonu o le malo, aua o le latou faamuamua, e tatau ona ave i le tautuaina o tagata o Amerika Samoa.

Sa faapea foi ona faaleoina e le afioga Lemanu lona agaga fa’afetai, e avea ai o ia ma sui o le Malo, i le foa’i a le aiga a le afioga Fano Shimasaki, lea ua tu’uina mai ai lo latou fanua lenei o le a faatu ai lenei fale fou, e aunoa ma se totogi, aua se lelei mo tagata o Amerika Samoa.

FUAFUAINA SE FAUTASI FOU A LE AFIOAGA A PAVA’IA’I

O le vaiaso ua mavae na amataina ai se poloketi fou a le afioaga a Pava’ia’i mo le faia o se latou fautasi e mafai ona auai atu i Fa’agatama i le Tai a le atunu’u.

O lenei poloketi ua faapea ona tu’ufaatasia e le afioga i le Sa’o o Pava’ia’i, le afioga ia Tuanaitau faapea le faapotopotoga o matai ma le aumaga, o le nu’u.  

O le auga o lenei faamoemoega, ina ia mafai ona tasi ai le afioaga faapea ma le u’una’ia o fanau talavou i se taumafaiga aua se lelei mo le lumana’i.

Na fa’aalia e le afioaga lo latou agaga fa’afetai i le kamupani fau fale a le Interplan Inc-EZJ, mai Pava’ia’i mo la latou tu’uto i le afioaga ma ana taumafaiga, e ala lea i sa latou foa’i alofa e $30,000 e amata ai lenei poloketi ua faaigoaina o le “Latia Fautasi”.

E le gata i lea, sa faaleoina foi le agaga fa’afetai ia i latou uma sa fa’aalia le a’ao mafola ina ia mafai ona tino mai lenei faamoemoega ua leva ona moemiti ai le nu’u.