Tala I Vaifanua

VAIASO FA'APITOA MO LE SI'OMAGA "LA'U PASEFIKA, LO'U LUMANAI!"

O le vaiaso fa'apitoa lenei o le Fa'asao o Lou Si'omaga, ma ua fa'ataua ai le manulauti, "Manatu i Suiga o le Tau - La'u Pasefika, Lo'u Lumana'i!"

O se lu'i e nofouta tagata uma o soifua i atumotu o le vasa pasefika, o Suiga Eseese o le Tau ma ona a'afiaga i le atuvasa ma lou lumana'i, ia mau tapena aga'i i nei suiga ua va'aia, e ono matuia ma ogaoga ona a'afiaga i lou Siomaga.

Ua va'aia ma fa'atulaga ai le totoina o la'au i nofoaga faitele po'o malae ta'alo ma matafaga e fiafia tagata e soloa'i i ai e fa'aaoga i a latou fa'atasiga.

O le Paka i le Suigaula a le Atuvasa i Utulei, ua mae'a totoina e le ASEPA la'au e aoga mo le apitagalu. E puipuia ai fo'i le solo atu o le palapala i le sami ae fa'amautu e a'a o nei la'au.

Ua totoina fo'i e le ASEPA la'au i le Paka Liona, ae o le Paka i Leone, ua fa'atulaga e feso'ota'i  le ASEPA ma Andra Samoa ma lana vasega o tupulaga o Leone, ina ia totoina la'au nei.

O se galuega fa'atino lea e fa'amau ai le talitonuga, o le toto o la'au, e aoga tele i le Siomaga atoa, aua o la'au latou te toe fa'auia le kaponi ma le sauvai manino ia tu'ufa'atasia e toe avea ma mea'ai mo meaola ma tagata, ona toe fa'aauau lea o le "Li'o o le Ola."

Ona o le toe vaiaso e Fa'ataua ai le Siomaga, o le a avea ai le aso Tofi ma taeao o le fa'afetai tele a le ASEPA i a latou pa'aga sa galulue fa'atasi ma i latou i galuega fa'amama sa atofa mo i latou e fa'ataunu'u i vaiaso ta'itasi.

"O le a tali atu ai le ASEPA i a latou pa'aga nei i se fa'afetai, ma o le a fa'atasia i matou uma i le matou Ofisa autu i Utulei lava,” o se fa'apupulaga lea a le tama'ita'i o Tumau Lokeni.

TAUSAILI AGAVA'A O LE FANAU A'OGA VASEGA 8

O le manulauti o le fa'atasiga a tamaiti a'oga uma o le atunu'u mai a'oga tulaga muamua na'o le vasega 8, ua taumafai ai le Matagaluega o A'oga, e fa'aosofia lagona e fia faigaluega i latou i se matata ua fiafia i ai, ma una'ia ai ma lona naunau ia a'oa'o tonu o ia mo lea ituaiga o galuega.

O le taumafaiga lona lua lenei, peita'i o le tausaga ua mavae sa na'o le vasega 5 na autova'a e fa'afofoga ma fetufa'i ma sui mai matata eseese o le Malo.

Na vaetolu le lautele o a'oga e tau fuafua ai le fa'aofiga o le fanau i le Gov. Rex Lee Auditorium i Utulei. O le falelima i sasa'e na amata ai ma sa auai mai uma a'oga i le falelima, e aofia ai ma Matafao Elementary.

O le aso ananafi o a'oga tetele lava e tolu, Manulele Tausala i Nuuuli, Tafuna Elementary i Tafuna ma Lupelele Elementary mai Iliili.  O le toe aso e fa'ao'o uma mai ai a'oga mai Fagali'i se'ia o'o i Leone Midkiff.

I le na'o le tolu ai lea o a'oga nei a Manulele, Lupelele ma Tafuna, ae matua fa'atumulia lelei le Lee Auditorium.

O saunia folasaga e aofia ai le ASPA i ana tautua e lima ua fa'amatala i le fanau, ma le anoanoa'i o ituaiga galuega e mafai ona faigaluega ai i latou pe afai o lea le vaega o le Malo o Amerika Samoa e fia galue ai.

O le ASCC i le Land Grant ma le Matagaluega o Fa'ato'aga ma Lafumanu, ma le tausiga lelei fo'i o lafumanu, atoa ma fa'ato'aga e fa'aaoga ai o vaila'au eseese, ia tusa ai ma mea e fa'ataga mo le fofoga taumafa o tagata lautele.

O le tama'ita'i o Sa'uila Fanene Kava sa avea ma sui sinia o le Matagaluega o Aoga na saunoa i le fa’atasiga a le fanau. "E taua lau filifiliga tonu o se galuega e te fia tula'i ai ma tautua ou tagata ma lou malo i le lumana'i. A vave fo'i ona faia lau filifiliga, e te tinou fo'i mo le fa'atinoga o lea fa'anaunauta'iga ua tamau i lou agaga, ona atili ai lea ona fa'aosofia lou fia maua o le a'oa'oga tonu e te gafatia ai ona galue i le galuega ua e filifilia.”

O le tama'ita'i o Athena Mauga, sa avea ma fofoga o le polokalama fa'asolo, e fa'afesuia'ia folasaga e fa'ata'amilo ai le fanau se'ia o'o ina ta le itula e 2:00 i le aso ananafi ona fa'ato'a mae'a lea o nei folasaga.

I le folasaga a le Matagaluega o Vaomatua ma le Gataifale na saunoa ai i latou sa malaga mai isi lala o nei tautua mai Amerika, Holly Todaro, Eric Fisher, Margeaux Wayne ma Jane Wong, fa’atasi ai ma se ali’i Samoa, lea sa avea ma fesoasoani i le fanau, ina ia fa'asamoa fo'i le folasaga.

O le taua o manufelelei ma so latou sao mo le Siomaga sa fesilgia e se tasi o tamaititi a'oga Manulele, ina ia fa'apupula atili le tulaga o manulele e ono lamatia ai le faitau aofai o nisi manulele, ae po'o le a fo'i se gaoioiga e faia i ai e le Matagaluega.

O le tali a ali'i ma tama'ita'i suesue nei mai fafo, o le manulele o le Mina, lea e uliuli ma e malo lava lona gutu, o le ituaiga lena o manulele ua matele ina latou 'aina isi manulele tumau i le atunu’u, e aofia ai segasegamo'u, iao ma isi. O manulele lea o Mina, sa fa'aulufale mai i le atu Samoa ina ia fa'aaoga e 'aina utu o povi i Samoa, peita'i e vavalalata tele Samoa Tuto'atasi ma i tatou iinei Amerika Samoa, lea ua felelei mai ai lava ma fa'anofoia fo'i le tatou atumotu.

O le vaega a le Public Health sa latou aumaia le itu atoa o fa'ato'aga o fuala'au 'aina e aoga tele i le tausiga o le soifua maloloina. O le tele o so'o se ituaiga o fa'amalositino e mafai ona avea ma se galuega tumau lou faia'oga ai, ina ia faia le fa'amalositino i aso ta'itasi e tagata o lo'o mana'omia ona fa'aitiitia pauna po'o lo latou mamafa.

O le tele o faleoloa e fa'atau mai ai oloa taua e tausia ai le soifua maloloina ma Me'ai Paleni mo tagata lautele. O le faigaluega fo'i i totonu o le falema'i tele i Faga'alu po'o isi fale ma'i i le afio'aga, ma o se fa'afesoa'i matagofie lea fo'i avanoa na maua e le fanau talavou.

"O le taumafaiga lenei ina ia una'ia mai le agaga o le fanau e vave fai se fa'aiuga o se sini o lona fa'amoemoe i le lumana'i, ia taumafai ai ia le tu'utia'ia e ia lana a'oa'oga, ae taumafai atili ia mautu lona fa'anaunauta'iga i le galuega e fia tautua ai,” ose tala lea a le tama'itai faia'oga Athena Mauga i lana tautalaga.

O le toe aso fo'i o lenei fa'amoemoe o le aso lea, e aumaia ai a'oga i Fofo ma le Alataua.