TALA I VAIFANUA

Pago Pago - AMERIKA SAMOA

FA’AMAVAE ATU LE OFISA A LE SUI FAIPULE I LE KONEKERESI, I LE AFIOGA IA PULU

O le aso Lua na se’i mavae atu nei na faamavae aloaia ai le Afioga ia Pulu Ae Ae Jr., mai i lana galuega i totonu o le Ofisa  a le Sui Faipule i le Konekeresi, e pei ona sa aofia potopoto ai le afioga i le sui Faipule ia Uifaatali Amata ma lana ‘Chief of Staff’ ia Leafaina Tavai ma le aufaigaluega i le latou ofisa i Fagatogo, mo le latou faamavaega ma Pulu.

O le afioga Pulu, o se tasi o sui tauva mo le tofi o le Lutena Kovana, faatasi ma le susuga ia Pula Nikolao Pula mo le tofi Kovana, i le palota ia Novema 2024.

Sa potopoto foi le aufaigaluega i le Sadies by the Sea mo le latou aiga faamavae ma le afioga Pulu lea ua toeititi atoa le sefulu tausaga, o lana tautua i totonu o le Ofisa a Amata.

E pei ona sa saunoa Amata, o ana tagata faigaluega muamua lava e toalua na ia filifilia, ae e le i o’o i lona uluai i totonu o le Koenekeresi, o lana ‘Chief of Staff’ faapea ma Pulu.  O i la’ua o ni fitafita tuai mai i le Ami ma sa ta’ua e le sui Faipule, o se faaiuga sili ona taua lea sa ia faia, aua le tautuaina o tagata o le atunu’u.

Na fa’aalia e Amata le faamanuiaina o ia, e ala i lo la galulue faatasi ma le afioga ia Pulu ma o le a le toe tutusa mea uma i lona to’esea.  

FEAVEA’I I LUGA O UPEGA TAFAILAGI TALA TAUFA’ASESE O SEISI TU’UGA FAUTASI

Na toatele nisi o le atunu’u, aemaise le aufaigaluega a le malo, na fa’aalia le agaga fiafia, ina ua salalau i le taeao o le aso Lulu, Aperila 24, 2024 ia se fa’aaliga, e foliga na sau mai i le Ofisa o le Kovana, e tusa ai ma le fa’aauauina o aso malolo i le faaiuga o le vaiaso nei.

Ae na faapea foi ona aofia i lea fa’aaliga fa’alauaitele ia se tu’uaiga e faasaga i le Sa a le afioaga o Nu’uuli, le Manulele Tausala lea ua manumalo i le tu’uga fautasi o lenei tausaga, e faapea, ua o latou soli ani tulafono o le tu’uga fautasi, ma ua a’e ai se manatu i le komiti  e toe faia seisi tu’uga i le aso a taeao.

O se tulaga na fa’aalia ai le le fiafia o matai faapea tagata o le afioaga o Nu’uuli, aemaise le kapeteni ma le auva’a a le Manulele Tausala.

Ae na mafai ona faamaonia mai i se taimi mulimuli e le Ofisa o le Kovana, e le o se fa’aaliga tonu ma sa’o lea fa’aaliga ma e le o se fa’aaliga na sau mai i le Ofisa o le Kovana, e ui ina sa sainia ai suafa o le afioga i le Kovana faapea ma le fa’ailo a le ofisa o le kovana.

O lo’o ua feagai nei le Ofisa o le Kovana ma suesuega e saili po o ai sa ia faia lenei tulaga, ona e le o se taimi muamua lenei ua tupu ai se mea faapea.

ASIASI MAI LE FAATONUSILI O LE WHO I SAMOA MA AMERIKA SAMOA

I se faatasiga i le aso 16 o Aperila, 2024, sa tauaaoina atu ai e le Faatonusili o le Faalapotopotoga o le Soifua Maloloina a le Lalolagi (World Health Organization-WHO), ia Dr. Saia Ma’u Piukala, ia se la’au okesene ma taumafa, i le Minisita o le Soifua Maloloina i Samoa, sa faatauina e le Iuni a Europa (European Union), pe a ma le $500,000USD lona tau.  E le gata i lea, sa faapea foi ona tauaaoina atu foi ia ni masini (ultrasound) se lua, sa faatupeina e le WHO i se tau e $48,000USD.

Sa faapea foi ona asiasi atu Dr. Piukala i le falemai tele i Motootua, i potu talavai mo le siakiina o fofoga.

Ina ua mae’a lea, ona agai mai lea o Dr. Piukala i Amerika Samoa ma na feiloai ai ma le afioga i le Kovana, Lemanu P. S. Mauga faapea le afioga i le Lutena Kovana, le tofa ia La’apui Talauega E. V. Ale, atoa ai ma taitai o le Ofisa o le Soifua Maloloina.  Sa faapea foi ona ia asia ma feiloai atu i taitai o le LBJ.