TALA I VAIFANUA

Pago Pago - AMERIKA SAMOA

GALULUE FA’ATASI IA ‘AU SI’I U’AMEA MAMAFA A SAMOA MA AMERIKA SAMOA MO SE LUMANAI MANUIA O LENEI FA’AGATAMA

O le aso Toonai na se’i mavae atu nei, sa faataunu’u ai le sailiga Siamupini a le ‘Sau Ia’, o le lona valu ai lea o le latou tauvaga.  Ma sa faia fa’atasi ma le tufatufaina o fa’ailoga, a le vaega a le Si’i Mamafa, lea na auai mai ai ma sui tauva mai i Samoa.  O le lona lima ai lea o tausaga o tauvaga a le Si’i Mamafa, lea faia i le aso Faraile o le vaiaso ua mavae.

I le tauvaga a tamaitai, sa manumalo ai Nolita Motu i le pine auro, o le pine siliva na mauaina lea e Marcel McMoore, ma Flora Vaiaoga, sa na mauaina le pine apamemea.

Sa faapea foi ona maua e fanau talavou, lea o lo’o i totonu o aoga maualuga, ia a latou foi fa’ailoga.

Na fa’asoa mai le susuga ia Pepe Christian Fruean, o le peresetene o le vaega Si’i U’amea Mamafa mai Samoa (Samoa Powerlifting Federation-SPLF), i le matagofie o le va’ai atu i le toatele o fanau talavou ua auai i lenei fa’agatama.  E to’atolu ni sui mai Samoa na faimalaga mai ma le susuga ia Fruean, lea na tauva i le aso Faraile o le vaiaso ua mavae.

E tusa ma le fa’asoa mai a Pepe, na o la feiloai ma le Peresetene o le vaega Si’i U’amea Mamafa a Amerika Samoa (American Samoa Power Lifting Federation-ASPLF), le susuga ia Leone Peter Reid III, i ta’aloga o le Pasefika i Honiara i le tausaga ua mavae, ma na amata mai i iina ona o la galulue fa’atasi aua se lumana’i manuia mo kalapu a malo e lua.

Sa fa’aalia e Pepe lona agaga fa’afetai i le kalapu a Amerika Samoa mo le valaauliaina o la latou kalapu ma o lo’o iai se faamoemoe, o le a o latou talimalo mo Amerika Samoa i le masina o Iulai.

Na ausia e Olia Siusega Kirisome mai Samoa ia le pine siliva, ae maua e John Lose Ioane ia le pine apamemea, ae o Justin Pedro a Amerika Samoa sa na ausia le pine auro.  O se suiga lea mai i le tauvaga i Honiara, lea na manumalo ai Oliva Siusega Kirisome i le pine auro, ae maua e Justin Pedro ia le pine siliva.

O le aso Sa na se’i mavae atu, na toe taliu ai i fanua ia le aumalaga mai Samoa.

VALAAUINA GABRIEL REID O SE FESOASOANI LUA I LE AU PERESETENE AOAO A LE A’OGA SA A LE EKALESIA A IESU KERISO

O le faaiuga o le vaiaso nei na fa’ataunu’uina ai le Konefesi Aoao lona 194 a le Ekalesia a Iesu Keriso o le Au Paia o Aso e Gata Ai.  E lua aso sa fa’ataunuuina o lenei Konefesi Aoao, o le aso Toanai ma le aso Sa.  Ae o le taeao o le aso Toanai, Aperila 6, 2024 sa fa’alauina ai le valaauina o Gabriel Reid, o se tasi o lupe faalele a Amerika Samoa, e avea ma Fesoasoani Lua o le Au Peresetene Aoao a le Aoga Sa, o se valaauga e o’o atu lona taitaiga i itu uma o le lalolagi.

O Reid, o le lona lua ai lea o tagata mai Amerika Samoa ua umia se tofiga maualuga faapenei i totonu o le ekalesia.  O le susuga ia Vincent Haleck, lea o lo’o fa’aauau pea lona tofiga, o le uluai tagata mai Amerika Samoa, sa valaauina i se tofiga maualuga faapenei.

O Reid, o le uso a le susuga ia Adney Reid lea sa avea ma Peresetene o le Siteiki a Pago i Sisifo, ae ua avea nei o ia ma Peresetene fou a le Misiona a Apia Samoa.

O alo nei a le susuga ia Eugene Reid ma le faletua ia Tupu, lea sa pulea le Milovale i Nu’uuli.

O Gabriel na fanau ma soifua mai i Amerika Samoa ma sa faauuina mai i le aoga maualuga a Leone, ma fa’aauauina ana aoga i le BYU Provo ma sa ta’alo foi i le NFL.  E to’afa o la alo ma lona faletua o Heather.

O le taimi nei o lo’o avea ma Peresetene o le Misiona a Ausetalia Sydney.

FOA’I ALOFA A LE AFIOGA I LE FAIPULE A LE MA’OPUTASI #4 MO LE LBJ

Ua taulimaina nei e le pulega ma le aufaigaluega a le Maota Gasegase autu a le teritori (LBJTMC) ia ni masini faapitoa se tolu, sa faameaalofaina mai e le afioga i le Faipule ia Tapai Ala’ilepule Benjamin Vaivao, mai i le itumalo a le Ma’oputasi #4.

O nei masini o le a avea ma fesoasoani tele i le faatinoina ma le fa’afaigofieina o tiute a tausima’i ma foma’i, i totonu o le ER, potu tausi ma’i mo fanau afapea le ICU.

O ‘Handheld Vein Finder’ e fesoasoani i tausimai ma fomai, i le sailiga o uaua o le tino, aua le tuiina o IV a gasegase po o le tuiga o le toto.  

Sa fa’aalia e le afioga i le Faipule, sa mafua ona a’e se manatu mo lenei meaalofa, ona o se mea na tupu i nisi o fanau a lana fanau i totonu o le potu talavai a fanau, i le tau sailiga o uaua a le fanau iti, e tui ai a latou IV.  Ma sa ia taua, o le a mafai e nei masini ona fesoasoani e le gata i fanau iti, ae faapea foi le to’atele o gasegase.

Na fa’aleoina e le taitaifono o le Komiti Faafoe a le LBJTMC, le susuga i le alii fomai ia Dr. Malouamaua Tuiolosega le agaga fa’afetai i le alii Faipule mo lenei foai taua, aemaise mo fanau iti.