TALA I VAIFANUA

Pago Pago - AMERIKA SAMOA

TATALA TAUAOFIAGA FAAPITOA LONA LUA A LE MAOTA FONO – TOE FAAULU PILI MO LE FAASOASOAINA O LE $36 MILIONA

I le lua a’i o vaiaso talu ona malolo afioga i Sui Faitulafono, ua toe taloina e le afioga i le Kovana Lemanu P. S. Mauga ia se Tauaofiaga Faapitoa lona lua a le Nofoaiga lona 38 a le Fono Faitulafono, lea sa amataina i le taeao ananafi.

O le aso Toonai na se’i mavae atu, na faapotopoto ai e le afioga i le Peresetene o le Senate, Tuaolo Manaia Fruean ia sui o le Maota Maualuga e soalaupuleina le fanoga a le kovana.

O Tauaofiaga Faapitoa, e iai lava ona mataupu ma’oti e tatau ona iloiloina ai – e aunoa ma le toe faaopoopoina iai o nisi mataupu ese mai.

I sana tusitusiga i le aso 22 o Mati, 2024, sa talosagaina ai e le afioga i le Kovana ia afioga i sui faitulafono ina ia tatalaina se Tauaofiaga Faapitoa a le Fono Faitulafono, i le aso Gafua, Mati 25, 2024, ma ia le sili atu ma le sefululua (12) aso faigaluega.

O mataupu ua fuafuaina e iloiloina i lenei tauaofiaga faapitoa, e aofia ai;

1. Talosaga a le Faigamalo mo se Tulafono mo le fa’asoasoaina o le $36,000,000 i tupe faasili na maua e toe faaopoopo i le paketi mo le tausaga faaletupe 2023.
2. Faasoasoaina o le vaegatupe e $700,000 mai tupe e le i fa’asoasoaina, o tupe sa aoina i le tausaga faaletupe 2022, o le a avea ma tupe fa’aaopoopo i le paketi mo le tausaga faaletupe 2024.
3. Tofiga fou, e aofia ai, ae le limiti, i le Faamasino mo Tulafono Faigamalo (ALJ).

Sa fa’aalia foi le agaga fa’afetai a le afioga i le Kovana e tusa ai ma le aloaia mai o lana fanoga aemaise o le tuuto a sui faitulafono i o latou tiute ma mana’oga o tagata o le atunu’u.

E le i manino mai i le aso ananafi pe to’afia ni sui faitulafono o lo’o i atunu’u i fafo.

FAAMAONIA E PULU AE AE, JR. LE AVEA MA PAGA A NIKOLAO PULA I LE PALOTA MO LE KOVANA MA LUTENA KOVANA

I se fa’atalanoaga ma le Samoa News, na fa’amaonia mai e le afioga Pulu Ae Ae, Jr., le avea o ia ma tasi o sui tauva, mo le tofi Lutena Kovana i le palotaga a Amerika Samoa o lo’o loma nei, e paga ma le afioga ia Pula Nikolao Pula mo le tofi Kovana.

Sa ta’ua e le afioga Pulu, e le’i iai sona manatu e auai i le palotaga ia Novema o lenei tausaga, ae peitai, o le valaau a Pula, na ia manatu ai, atonu o se fa’aaliga lea ma i le Atua, o lona valaauga lea, e fesoasoani ai i tagata o Amerika Samoa.

Na fa’asoa mai foi Pulu, o le taimi nei, o lo’o fiafia lava i lana galuega i le Ofisa a le sui Faipule ia Uifaatali Aumua Amata, ma e sili atu foi lona totogi o lo’o maua ai, nai lo le totogi a le Lutena Kovana.  Ae ona o le tele o atugaluga a tagata o le atunu’u e tusa ai ma le tulaga o iai le malo ma le atunu’u i lenei vaitaimi, ma o se tulaga fa’anoanoa lea, ona e le gata i tulaga ua ia faalogo iai ae o tulaga va’aia foi.

Na fa’ailoa mai foi e le afioga Pulu, ua mae’a ona ia logoina le taitaiga a matai o lona afioaga i Pago Pago.  E ui ina sa talosagaina o ia e le afioga Mauga Tasi Asuega ina ia toe tu’u se avanoa i le afioga i le Kovana Lemanu P. S. Mauga mo le fa’aauauina o lana nofoaiga mo seisi fa tausaga.  Ae na saunoa Pulu, ua mae’a ona ia fa’amalulu atu ia Mauga, ona i sona talitonuga, o lona valaauga lea mai i le Atua ma ua a’e se lagona e ao ona fesoasoani i tagata o le atunu’u o lo’o sulufa’i atu ia te ia ona o nisi o mataupu ua tulai mai, o lo’o a’afia ai le malo, e pei ona lipotia e vaega faasalalau lotoifale ma atunuu i fafo.

Sa toe faamamafa e Pulu e faapea, o lona naunautaiga e avea ma paga a Pula i le palota, ona o sona mana’o ina ia tautuaina tagata o le atunu’u ma ia fai le mea tonu.

O le afiafi o le aso Tofi o le vaiaso ua mavae, na aofia potopoto ai nisi e pe a ma le to’a 200 i lona maota i Pago Pago, e pei ona tu’ufa’atasia e Taua Niualama Taifaine, e soalaupuleina ai poutu o le kemupeni a le paga tauva a PULA/PULU HOPE2024.

Ae o le aso 6 o Aperila ua faamoemoe e faalauiloa aloaia ai le la paga tauva.