TALA I VAIFANUA

Pago Pago - AMERIKA SAMOA

TATALA ALOAIA SE FALE TAUMAFA MA FAAPAIAINA LAU’ELE’ELE MO FALEA’OGA A LE ASCC

O le aso Faraile, Mati 15, na tatalaina aloaia ai se fale ‘ai fou a le Kolisi Tu’ufa’atasi a Amerika Samoa (ASCC) ina ua mae’a se sauniga e faapaiaina ai se lau’ele’ele ua faamoemoe e fausia ai ni fale’aoga fou mo SACHEB (Small Art, Community & Higher Education Building), lea na auai atu iai le afioga i le Kovana ia Lemanu Peleti Mauga ma isi taitai o le malo, faatasi ma taitai ma le aufaigaluega a le ASCC, aiga faiaoga ma fanau aoga.

O le galuega mo fale’aoga fou, ua mae’a ona filifilia ai le kamupani fau fale a Willis Construction Corp, i luga o se ata na tusia e le Clifford Planning and Architecture LLC.  O lenei fale’aoga fou, e lua ona fogafale ma o le a aofia ai ma ni ofisa.

I le faapa’iaga o le fale ’ai fou a le ASCC, na fofogaina ai e le susuga i le Fa’afeagaiga ia Matai ia le tatalo amata.  O le susuga i le Faafeagaiga Toeaina ia Fouvale Asiata, o ia foi o le Taitaifono o le Komiti Faafoe mo Aoaoga Maualuga, lea o lo’o faamalumalu ai le ASCC, sa avea ma ulua’i tautalaga o le aso.  Ona soso’o ai lea ma le saunoaga a le Faatonusili o le Matagaluega o Galuega Lautele (DPW) ia Faleosina Voight ma ia tau’a’aoina ai le ‘Certificate of Occupancy’ i le peresetene o le ASCC, ia Dr. Rosevonne Makaiwi Pato.

O le faletua a le kovana, ia Ella Mauga sa na ia tauaaoina le lipine e tatalaina aloaia ai le fale ‘ai.

MANUMALO LE A’OGA TULAGA MUAMUA A TAFUNA I LE TAUVAGA PESE LONA LUA A FANAU AOGA

O le aso Faraile o le vaiaso ua mavae na faataunu’uina ai i le hall a le DYWA ia le fa’aaliga taleni ma le tauvaga pese a fanau aoga mai i a’oga tulaga muamua uma a le teritori.

O le manulauti o lea aso, i lona faaperetania, o le ‘I See ME (Music Education)”.

Sa molimauina le matagofie o lea polokalama, e le mamalu o le atunu’u na mafai ona auai atu i lea fuafuaga, na aofia ai ma matua ma nisi o taitai o le malo.  Sa le gata i le talenia o alo ma fanau i o latou siufofoga malie ae le gata i lea o tulaga o musika ma le siva.

O le susuga i le Faafeagaiga ia David Katina sa saunoa faapitoa aua se lu’itau ma tima’iga mo alo ma fanau laiti.  O le susuga ia Katina o se tasi o alo o le teritori, ua lauiloa foi i lenei taleni o le musika.

O lenei polokalama sa fa’ataunu’uina i lalo o le fa’amalumaluga a taitai o le Ofisa o Aoga a Amerika Samoa.

E tolu ni vaega patino sa faamasinoina ai taumafaiga a alo ma fanau, e aofia ai le Pese Fiafia (Fun Song), o se Pese na filifilia e aiga faiaoga (Selected song by teachers) ma ni Pese tu’ufaatasia se lua (compilation of 2 songs).

I le faaiuga o lea tauvaga, sa tula’i mai ai le mauaina e le aoga Matatula ia le tulaga muamua i vaega uma e tolu.

Pese Fiafia/Malie: Tulaga Muamua- Matatula; Tulaga Lua-Tafuna; Tulaga Tolu-Tuato’o/Olomoana

Pese filifilia e faiaoga:  Tulaga Muamua-Matatula; Tulaga Lua-Fitiuta; Tulaga Tolu-Tafuna

Pese e 2 tu’ufa’atasia; Tulaga Muamua-Matatula; Tulaga Lua-Tafuna; Tulaga Tolu-Fitiuta

I le aotelega o le tauvaga, na tula’i mai ai le faaiuga a faamasino, i le tulaga muamua – Tafuna; tulaga lua-Pavaiai ma le tulaga tolu-Matafao.

AUAI ATU SUI O LE DOH I FONOTAGA A LE A LE ASOSI O LE SOIFUA MALOLOINA A LE PASEFIKA (PIHOA)  I HAWAII

O le vaiaso ua mavae, na auai atu ai nisi o sui o le Ofisa o le Soifua Maloloina a Amerika Samoa i se tasi o polokalama a le PIHOA (Asosi o le Soifua Maloloina a le Pasefika), lea sa faataunu’uina i Honolulu, Hawaii ia Mati 22-24, 2024.

O le auai atu o Taputailo Fe’a, Meghan Paleitaoga, Dr. Anaise Uso, Ipuniuesea Eliapo-Untoa ma Bethany Toelupe, o ni totino o le polokalama a le PPHFP (Pacific Public Health Fellowship Program), o se ulua’i taimi lenei ua faapea ona auai atu ai sui o lenei polokalama i fuafuaga a le PIHOA.

O lenei avanoa, e pei ona fa’alauiloa mai e le Ofisa o le Soifua Maloloina, i la latou Itulau o Foliga (Facebook), o se faamanuiaga mo fanau aoga i totonu o le Kolisi o lo’o iai se naunautaiga e galulue i totonu o ofisa mo le tautuaina o le Soifua Maloloina lautele, e fa’alauteleina ai lo latou poto a’oa’o, e mafai ona tautuaina ai le mamalu lautele, i le tausiga o le soifua maloloina.

Sa le gata i sui mai i Amerika Samoa, ae sa auai foi nisi o fanau aoga ma o latou supavaisa mai i isi ofisa o le soifua maloloina, mai motu eseese o le Pasefika.

AUAI FANAU AOGA I POLOKALAMA MO LE FAAMANATUINA 50 TAUSAGA A LE ESA (ENDANGERED SPECIES ACT)

O le aso Lua o le vaiaso ua mavae, Mati 19, 2024 sa aofia potopoto ai nisi o fanau aoga a le teritori, amata atu i fanau iti se’ia o’o i fanau mai aoga maualuga, i se polokalama na faataunuuina i le ‘Tauese P.F. Sunia Ocean Center’ i Utulei aua se polokalama faapitoa mo le faamanatuina o le 50 tausaga o le tulafono e puipuia ai manu fa’asao (Endangered Species Act – ESA).

O nei fanau aoga sa auai i se tauvaga tusiga ata, sa auai ai fanau e to’a 600, mai i le Pasefika atoa, o so’o se manu fa’asaoina e aofia ai laumei, tafola ma ‘amu o le sami, lea o lo’o puipuia i lalo o le ESA.

Sa mafai ona auai mai le sui o le NOAA ia Celeste Hanley, lea o lo’o faamautu i lo latou ofisa tutotonu i Hawaii, tauala mai i luga o feso’otaiga i luga o ‘upega tafa’ilagi, mo le lauina o igoa o fanau aoga sa faamanuiaina a latou taumafaiga.

Ina ua mae’a lea, sa faapea ona saunoa le sui lotoifale a le NOAA, ia Fatima Sauafea-Le’au, aua se upu faala’ei’au ma le fa’aleoina o le agaga fa’afetai i alo ma fanau, mo le fa’aaogaina o taleni mai i le Atua e toe faamanatu ai i le mamalu lautele, lo tatou tiute fai fa’atasi, o le puipuiga o manu, e aofia ai i’a ma figota, fa’asaoina.