TALA I VAIFANUA

Pago Pago - AMERIKA SAMOA

FA’AAUAU PEA LAPATAIGA O MATAGI MA LOLOGA I TOTONU O AMERIKA SAMOA

I se lapataiga i le aoauli ananafi mai i le Ofisa o le Tau i Tafuna, ua fa’aalia mai ai le liua o taaviliga o matagi i le itu I saute i sasa’e o Manu’a i se ‘tropical depression 10F’ po o le amataga o afa.  O le a fa’aauau pea le malosi o TD10F a’o agai lemu atu i le itu I saute i sasa’e i le aoauli ananafi.  Ma o le a faapea ona iai nisi matagi malolosi i le itu i matu i sisifo o le atu Samoa o le a faapea ona agai faatasi atu ma TD10F i le itu i saute i sasa’e.

O le a fa’aauau pea tulaga o matagi ma timuga malolosi, e o’o mai i le aso nei.  Ma o le a fa’aauau pea ona tulata mai le faaputuga o ao i le atu Samoa, e o’o atu i le faaiuga o le vaiaso.

Ma o lo o  fa’aauau pea ona iai lapataiga o lologa tetele i totonu o Tutuila ma Aunu’u ona o le malosi o timuga.

AUAI ATU LUTENA KOVANA MA SUI MAI AMERIKA SAMOA I LE FONOTAGA O MOTU O LE PASEFIKA (SPC)

O le aso Lua, Fepuari 13, 2024 na tatala aloaia ai le fonotaga o motu o le Pasefika (SPC) i Suva, Fiti mo le soalaupuleina o mataupu e mafai ona faamalosia ai sootaga i va o motu o le pasefika, lea o lo o auai atu ai le afioga i le Lutena Kovana ia Talauega E. V. Ale ma nisi o taitai o le teritori, aua se taumafaiga ina ia u’unaia le auai o Amerika Samoa i talanoaga taua e faatatau i mataupu taua o le Pasefika.

I le uluai aso o lenei fonotaga, sa saunoa ai le afioga Talauega ma sa ia ta’ua ai le tu’uto o Amerika Samoa i le faalauteleina o le auai i fuafuaga faavaomalo, faapea ai ma le faateleina o le auai o le teritori i feutagaiga faavaomalo.

Sa faapea foi ona feiloai le aumalaga mai Amerika Samoa ma le komesina o Samoa i Fiti, ia Ali’ioaiga Feturi Elisaia e fa’asoa feso’otaiga tau i le aganu’u ma faamoemoega mo Samoa e lua.

Sa faai’uina le aso i se aiga ma le afioga Ali’ioaiga, ma sa auai ai foi le susuga i le Faafeagaiga ia Dr. Upolu Luma Vaai, le Pule o le Kolisi Fa’afaifeau a le Pasefia faapea ma le susuga i le Faafeagaiga ia Vavatau Taufao, se misionare a le EFKS i Fiti, ma nisi o tagata Samoa o lo o aumau i Fiti.

FILIFILIA SE PULE O FAATAUGA FOU A LE OFISA VA’A O LE NPDL

Ua filifilia nei e le ofisa va’a a le NPDL (Neptune Pacific Direct Line) ia le tamaitai o Michelle Brunt e faafoeina le latou ofisa o faatauga (Senior Sales Manager) mo Samoa ma Amerika Samoa.  O Brunt na soifua mai i Samoa ma sa galue o ia i Fiti ma Niu Sila, ae o lea ua toe taliu mai e tautuaina Samoa e lua.

Ua 28 tausaga o galuega Brunt i totonu o ofisa va’a ma o le 20 tausaga mulimuli sa galue ai i le NPDL, i le tele o vaega i totonu o le ofisa.  Na amata le soifuaga galue a Brunt i le 19 o ona tausaga.