TALA I VAIFANUA

Pago Pago - AMERIKA SAMOA

MOLIA SE ALII I LE GAOI MAUA ATU O MOE I LUGA O LE MOEGA A LE AIGA

Ua lipotia mai i faamaumauga a le faamasinoga, le tu’uaia o le alii o Philip Ati, i lona osofaia o se fale a se aiga i Tafuna ma gaoia ni meatotino e o’o atu i le $3,000 lo latou tau.  Ma ua molia ai nei o ia i moliaga o le Faomea i lona tulaga e lua,  faapea le Gaoi, atoa ai ma le faatauina atu o ni a’upega, ma le solivale o fanua a isi. 

O mea totino o lo o masalomia na gaoia e Ati, e aofia ai se TV, o se moa vao, ofu, lavalava ma a’upega.  O nei mea totino o lo o masalomia na gaoia e Ati mai i se fale tu’ufua, i le va o Tesema 25 ma le 27.

I se faatalanoaga ma le e ana le fale, sa ia ta’ua ai e faapea, sa nofo ma ona matua i le latou fale i le itu i Sasa’e o le motu, ma o iina sa usu mai ai i lana galuega i lea taeao.

Ae o le latalata i taimi o taumafataga o le aoauli, na alu atu i lona fale e fai sana malologa, e pei ona masani ai, ae ona va’aia ai le tulaga faaletonu o lona fale, e pei sa osofa’ia e se tasi.

Ma na fa’ate’ia o ia, ina ua alu atu i lona potu moe, o lo o tofa mai ai le alii o Ati.  Ma sa ia taumafai ina ia aua ne’i pa’o, ae ia valaauina loa le ofisa a leoleo.  Na taunu’u atu loa leoleo ma ave faapagotaina lenei alii.

Sa aveina e leoleo ia Ati i lo latou ofisa i Tafuna ma faatalatalanoa ai ma sa ta’uina e Ati suafa o i latou na ia fa’atauina atu iai meatotino sa ia gaoia, lea e aofia ai ma ni la’au malolosi, o lo o lesitalaina i le suafa o le e ana le fale, na osofaia e Ati.

Na mafai ona toe maua mai e leoleo ia ni isi o meatotino sa faatauina atu e Ati.  Ma sa lipotia foi e le e ana le fale, lona vaaia o ona lavalava o lo o la’ei mai e nisi, ma sa ia fesiligia i latou ma na o latou ta’ua, o At isa fa’atauina atu nei lavalava ia i latou.

Sa faaleoina e le tamaitai nofo to’atasi, e ana le fale lea sa osofaia e Ati, sona popolega tele i le tupu so’o mai o nei ituaiga faalavelave, aemaise lava i le afioaga o Tafuna lea e iai lona maota.  Ua talitonu lenei tamaitai, o lo o toatele nisi o lo o latou galulue faatasi, e faia lenei tulaga o le osofaia o fale o aiga.

Na faamatalaina foi e lenei tamaitai  le gaoia o sana ta’ifau mai lona fale ma na o latou fiu e saili ae maua tala mai nisi o tuaoi, sa o latou tanuina se ta’ifau sa faaumatia e se tagata.

E $20,000 le tinoitupe faatulagaina e mafai ona tatalaina ai Ati mai i le falepuipui, e faatalitali ai lona faamasinoga.

MANUMALO LE TAUSALA A SAMOA TUTOATASI I LE TAUVAGA TAUSALA A LE PASEFIKA 2024

O le faaiuga o le vaiaso na se’I mavae atu nei, na faataunuuina ai le tauvaga Tausala o motu o le Pasefika, 2024, lea na talimalo ai le motu o Nauru.

E to’afitu ni tausala sa tausinio i lenei faamoemoe, na aofia ai Tausala a Amerika Samoa, Tonga, atu Malesala, Nauru, Papua Niu Kini, ma le malo tutoatasi o Samoa.

Ua faamanuiaina ai nei le tamaitai o Moemoana Safa’ato’a Schwenke mai Samoa, ina ua manumalo ma ua avea nei o ia ma Tausala o le Pasefika 2024.

O le tausala mai i Nauru na tulaga lua, soso’o mai ai ma le tausala mai i le atu Malesala i le tulaga tolu faapea ma le tausala a Amerika Samoa, i le tulaga fa.

Sa faamanuiaina foi le tausala a Amerika Samoa i lona mauaina o le faailoga mo tulaga o le Turisi Faavaomalo.

I sana faamatalaga i luga o ‘a’upega tafa’ilagi, na faaleoina ai le tausala a Amerika Samoa, o Judy Fa’afetai Taunu’u, lona agaga faafetai i le Tama Faalelagi mo Ana faamanuiaga e sautualasi.  O lana sini autu o iai, o le faauuina mai lea i le ASCC ma ulufale atu i totonu o vaega’au a le Ami mo le fa’aauauina o ana aoaoga, e avea ma Loia.  

Sa ta’ua e Taunu’u le tele o mea ua ia aoaoina mai i lenei avanoa matagofie sa auai atu iai, ma o le a fesoasoani tele ia te ia, i lu’itau ma avanoa o lenei olaga.

LE TAUNU’U MAKETI FAATAU MO LE MELI TURISI ANANAFI ONA O TULAGA FAALETONU O LE TAU

Ona o tulaga louloua o le tau, lea sa amataina mai i le afiafi o le aso Toonai, Iuni 3, 2024 se’ia o’o mai i le afiafi ananafi, sa fautuaina ai e le Ofisa Tagata Asiasi Mai, le le faataunuuina o maketi faatau oloa, e pei ona masani ai, i so’o se taimi e taunu’u mai ai ni va’a turisi i totonu o Amerika Samoa.

O le aso ananafi na fuafua e taunuu mai ai le meli turisi o le MS Insignia, ae peitai ona o le tulaga louloua o le tau, sa faapea ona le taunuu ai le faia o ni maketi faatau po o maimoaga masani mo turisi.

I se fa’aaliga mai i le Ofisa o Tau i le afiafi ananafi, e pei ona fa’asalalauina i luga o a’upega tafa’ilagi, sa ta’ua ai le fa’aauau pea ona iai timuga i totonu o Amerika Samoa i le vaiaso atoa.